الەۋمەتتىك جەلىلەردە «O‛zbekiston havo yo‛llari» دەگەن جازۋى بار ءھام وزبەكستاننىڭ تۋى بەينەلەنگەن ۇشاقتان قازاقستان ۇلتتىق قۇراماسىنىڭ فۋتبولشىلارى ءتۇسىپ كەلە جاتاتىن بەينە بار. قۇراما – قازاقتىكى, ۇشاق – وزبەكتىكى. «مۇنىسى قالاي؟» دەرسىز. سويتسەك, ۇلتتىق قۇراماعا ۇشاق ۇسىناتىن وتاندىق كومپانيالاردىڭ باعاسى باس اينالدىرادى ەكەن. ال وزبەكستاننىڭ ۇلتتىق اۋە تاسىمالداۋشىسى ءبىزدىڭ كومپانيالارمەن سالىستىرعاندا الدەقايدا ارزان باعانى قويادى. قالتاسىنا قاراپ كوسىلەتىن كوماندا سوڭعىسىن تاڭدايدى, البەتتە. ويتكەنى نارىقتىق ەكونوميكانىڭ زاڭى سولاي. باسەكەلەستىك بار جەردە تاڭداۋ جاساۋعا دا مۇمكىندىك بار. الايدا...
الايدا اقشادان دا ارتىق دۇنيەلەر بار ەكەنىن ءبىر ءسات ەستەن شىعارۋعا بولمايدى. ايتالىق, ۇلتتىق بەدەلىمىز. بالكىم, قازاقستان فۋتبول فەدەراتسياسىنىڭ وتاندىق «Air Astana» سەكىلدى الپاۋىتتىڭ ۇشاقتارىن جالداۋعا قارجىسى جەتپەيتىن شىعار. بىراق ۇلتتىق اۋە كومپانياسىنىڭ ەلدىڭ ابىرويىن ەۋروپادا اسقاقتاتىپ جۇرگەن باس كومانداعا جەڭىلدىك جاساپ, ءبىر جاعىنا شىعىساتىنداي ءجونى بار. داڭقتى دانيانى تۇزدە تىزە بۇكتىرىپ, ازۋلى فينليانديانى توپتان شىعار تۇستا توبىقتان قاققان قۇراما جىگىتتەرىنىڭ قازاقستان تۋى بەينەلەنگەن وتاندىق كومپانيانىڭ ۇشاعىنان ءتۇسىپ كەلە جاتقانى قانداي جاراسىمدى.
دەمەك, ۇلتتىق بەدەل مەن اقشا تارازىعا تارتىلعاندا العاشقىسىنىڭ سالماعى باسىم بولۋعا ءتيىس. قۇراما كاپيتانى اسحات تاعىبەرگەننىڭ «نەگىزى ۇلتتىق قۇراماعا ءبىر ۇشاقتى ارنايى بەكىتكەنى جاقسى بولار ەدى. ونىڭ سىرتىنا ەلىمىزدىڭ تۋىن, باس كوماندانىڭ بەلگىسىن بەينەلەسە ءتىپتى كەرەمەت. بۇل دا ەلىمىزدى, فۋتبولدى ناسيحاتتاۋدىڭ ءبىر جولى. باسقا مەملەكەتتەرگە وتاندىق اۋە كومپانياسىنىڭ ۇشاعىمەن بارعانىمىز عانيبەت ەمەس پە؟» دەگەن سوزىندە جان بار. ءارى-بەرىدەن كەيىن بۇل اياقدوپشىلارعا سەنىمدىلىك سىيلايتىن بىردەن-ءبىر ماڭىزدى فاكتور ەكەنىن دە ۇمىتپايىق.
– ەلدىڭ نامىسىن قورعايتىن فۋتبولشىلارىمىزدىڭ وزگە مەملەكەتتىڭ ۇشاعىمەن ۇشۋى كورەر كوزگە ەرسىلەۋ, البەتتە. سويتسەك, «Air Astana» سەكىلدى كومپانيالاردىڭ ۇسىناتىن باعاسى «وزبەكستان اۋە جولدارىنان» ەكى ەسە قىمبات ەكەن. ماسەلەن, ۇلتتىق قۇراما ەۋروپا چەمپيوناتىنىڭ ىرىكتەۋ دوداسىنداعى سوڭعى ماتچقا – سلوۆەنياعا قارسى ويىنعا وزبەكستان ۇشاعىمەن ۇشىپ باردى. ليۋبليانا اۋەجايىنان وزگە ەلدىڭ تۋى جاپسىرىلعان ۇشاقتان ءتۇسىپ كەلە جاتقان جىگىتتەرىمىزدى كورىپ جۇرەگىمىز اۋىردى. مەنىڭشە, ەرەكشە نازار اۋدارىلۋعا ءتيىس ماسەلەنىڭ ءبىرى – وسى, – دەيدى فۋتبول جانكۇيەرى, بەلگىلى تەلەجۋرناليست نۇرسۇلتان قۇرمان.
جالپى, بۇل ماسەلە 2017 جىلدان بەرى دۇركىن-دۇركىن كوتەرىلىپ كەلەدى. ءتىپتى قازاقستان فۋتبول فەدەراتسياسىنىڭ ارنايى مالىمدەمە جاساعانى دا ەسىمىزدە. وندا «Air Astana» كومپانياسىنىڭ چارتەرلىك رەيستەردى ورىنداۋعا ۇشاق ۇسىنۋ مۇمكىندىگى جوق ەكەنى ايتىلعان ەدى. سول سەبەپتى فەدەراتسيا وزبەكستان, رەسەي, ارمەنيا, گرۋزيا سەكىلدى ەلدەردىڭ اۋە كومپانيالارىنا جۇگىنەتىنىن جەتكىزگەن بولاتىن. سودان بەرى دە بەس جىلدان اسا ۋاقىت ءوتتى. بىراق جاعداي وزگەرگەن جوق. فۋتبولشىلارىمىز ءالى كۇنگە دەيىن باسقا مەملەكەتتىڭ اۋە كومپانيالارىنا يەك ارتىپ ءجۇر.
– «Air Astana» ءوزىن ۇلتتىق اۋە كومپانياسى دەپ ساناعانىمەن, كەيبىر ارەكەتتەرى ۇلتتىق دەڭگەيگە ساي ەمەس. وعان مىسال رەتىندە فۋتبولشىلارىمىز بەتپە-بەت كەلىپ جۇرگەن جاعدايدى ايتساق تا جەتكىلىكتى. كومپانيا كەيدە رەسپۋبليكا ءۇشىن ماڭىزى شامالى ءىس-شارالارعا ۇشاق قاراستىرادى دا, ەلدىڭ ابىرويى سىنعا تۇسەتىن شاقتا تارتىنىپ قالادى. «Air Astana» وزدەرىن «ۇلتتىق اۋە كومپانياسى» دەپ اتاعان سوڭ ۇلتقا, ەلگە قاتىستى جاعدايدىڭ بارىنە دايىن بولۋى كەرەك, قانداي جاعداي بولسىن قازاقستاننىڭ مۇددەسىنە جۇمىس ىستەۋگە ءتيىس. «Air Astana» وسىنى ەسكەرە بەرمەيدى. باسقا ەلدەردە مۇنداي ماسەلە جوق. سوندىقتان ەۋروپاعا ۇشا الاتىن اۋە كومپانيالارىنىڭ قاتارىن كوبەيتۋ كەرەك. سوندا بۇل ماسەلە وزدىگىنەن شەشىلەدى, – دەيدى اۆياتسيا سالاسىنىڭ مامانى ابىل كەكىلباەۆ.
قالاي دەسەك تە, ەلدىڭ نامىسى ءۇشىن سىنعا تۇسەتىن ۇلتتىق قۇرامانى ەندىگى جەردە وزگە مەملەكەتتىڭ اۋە كومپانياسىنا تەلمىرتىپ قويعان ءجون ەمەس. بۇل – ەلدىگىمىزگە سىن. ايتپاقشى, جاقىندا ۇلتتىق قۇرامامىز گرەكيا فۋتبولشىلارىمەن سىرت الاڭدا شەبەرلىك بايقاسادى. سونداي قايتەر ەكەن؟ كورەمىز...
فارحات قايرات ۇلى,
جۋرناليست
