كەشە ۇكىمەت باسشىسى ولجاس بەكتەنوۆ جۇمىس ساپارىمەن پاۆلودار وبلىسىنا كەلدى. پرەمەر-مينيستر ەرتىس-بايان ءوڭىرىنىڭ وندىرىستىك جانە مۇناي-گاز سالاسىنداعى ىرگەلى جوبالارىمەن تانىسىپ, پرەزيدەنت جۇكتەگەن تاپسىرمالاردىڭ جۇزەگە اسۋ بارىسىمەن تانىستى.
ەكىباستۇزدا سالىنىپ جاتقان بالالار شىعارماشىلىعى سارايىندا كەلەشەكتە 9 مىڭنىڭ ۇستىندە ءجاسوسپىرىم قوسىمشا ءبىلىم الادى دەپ جوسپارلانعان. ونىڭ ىشىندە 1,5 مىڭى – ەرەكشە قاجەتتىلىگى بار بالالار. شاھار مەكتەپتەرىندە بۇگىندە 22 590 وقۋشى ءبىلىم السا, ولاردىڭ نەبارى 31 پايىزى, ياعني 7 مىڭعا جۋىعى عانا مەكتەپتەن تىس ۋاقىتىن پايدالى وتكىزىپ جاتىر.
«بۇل – مەملەكەت باسشىسىنىڭ تىكەلەي تاپسىرماسىمەن سالىنىپ جاتقان نىسان. سوندىقتان ساپاسى دا وتە جوعارى دەڭگەيدە بولۋى كەرەك. مۇنداي ورتالىقتار بالالاردىڭ بوس ۋاقىتىن قامتىپ, ولاردىڭ شىعارماشىلىق قابىلەتىن دامىتۋعا, قوسىمشا ءبىلىم الۋىنا مۇمكىندىك بەرەدى. ورتالىق ىسكە قوسىلعاننان كەيىن قالادا قوسىمشا بىلىممەن قامتۋ دەڭگەيى 71 پايىزدى قۇراماق. جوبا جەكە باقىلاۋىمدا بولادى», دەدى و.بەكتەنوۆ.
كەلەشەك ورتالىقتىڭ ناتيجەسىندە قالاداعى 16 مىڭ بالا قوسىمشا بىلىممەن قامتىلادى دەپ كۇتىلىپ وتىر. شىعارماشىلىق سارايىندا شامامەن 102 ادام ەڭبەكپەن قامتىلسا, ونىڭ تەڭ جارتىسى پەداگوگتەر بولادى دەپ جوسپارلانعان.
«ۇيىرمەلەر 17 باعىتتا جۇمىس جۇرگىزەدى. ولاردىڭ ىشىندە شىعارماشىلىق, ونەر, مۋزىكا, IT-تەحنولوگيالار قامتىلادى. زامانعا ساي عيماراتتا عارىشتىق راديوبايلانىس كلۋبى, روبوتتەحنيكا ستۋدياسى, ونەركاسىپتىك ساۋلەت جانە ديزاين ستۋدياسى, عىلىمي-بيولوگيالىق زەرتحانا, كوۆوركينگ-ايماق, دىبىس جازۋ ستۋدياسى, فوتوگرافيا اكادەمياسى, كوركەم-ەستەتيكالىق شەبەرحانا, سپورتزال جانە ت.ب. اشىلادى دەپ كۇتىلىپ وتىر. ورتالىقتىڭ ءوزى تومەنگى قاباتىمەن ەسەپتەگەندە 4 قاباتتى نىسان بولىپ سالىنباقشى», دەپ اتاپ ءوتتى ەكىباستۇزدىڭ اكىمى ايان بەيسەكين.
ولجاس بەكتەنوۆ كوممۋنالدىق-ەنەرگەتيكالىق سەكتوردى جاڭعىرتۋ جۇمىستارىنىڭ بارىسىمەن جانە تۇرعىنداردى جىلۋمەن ۇزدىكسىز قامتاماسىز ەتۋ شارالارىمەن تانىستى. ەكىباستۇز جەو-دا ءوڭىر اكىمى اسايىن بايحانوۆ ۇكىمەت باسشىسىنا جىلۋمەن قامتۋ جۇيەسىن قالپىنا كەلتىرۋ اياسىندا بارلىق 10 قازاندىققا كۇردەلى جوندەۋ جۇمىستارى جۇرگىزىلگەنىن حابارلادى. ستانسا كورسەتىلگەن پارامەترلەرگە سايكەس قالىپتى قۋاتىندا جۇمىس ىستەپ تۇر. سونىمەن قاتار 4 جىلۋ ماگيسترالى مەن ورامىشىلىك جەلىلەر دە كۇردەلى جوندەۋدەن ءوتتى. جىل سوڭىنا دەيىن بارلىق ماگيسترالدى جەلىلەردى تسيفرلاندىرۋ اياقتالادى. سونداي-اق ءوڭىر باسشىسى وبلىستىڭ ءۇش قالاسىندا جوندەۋ ناۋقانىنىڭ جوسپارىن ۇسىندى. ەكىباستۇز قالاسى بويىنشا تم-1 جانە تم-2 جىلۋ ماگيسترالدەرىن كۇردەلى جوندەۋدىڭ جوبالاۋ-سمەتالىق قۇجاتتاماسى جانە ەكىباستۇزداعى كارىز كوللەكتورى مەن مايقايىڭ سۋ قۇبىرىن كۇردەلى جوندەۋ جوبالارى ازىرلەنىپتى. ال پاۆلوداردا تم-13 قۇرىلىسى جۇرگىزىلسە, اقسۋ قالاسىندا ورامىشىلىك جىلۋ جەلىلەرى كۇردەلى جوندەۋدى قاجەت ەتەدى.
پرەمەر-مينيستر ەكىباستۇزدىڭ جىلۋمەن جابدىقتاۋ جۇيەسىن قالپىنا كەلتىرۋ ۇدەرىسىن جالعاستىرۋ قاجەت ەكەنىن اتاپ ءوتتى. ۇكىمەت تاراپىنان تولىقتاي قولداۋ كورسەتىلەدى.
ء«بىز ەكىباستۇزدىڭ 2022 جىلدىڭ قىسىندا قانداي قيىنشىلىقتى باستان وتكەرگەنىن بىلەمىز. مەملەكەت باسشىسىنىڭ تاپسىرماسىمەن ۇكىمەت رەزەرۆىنەن جىلۋمەن جابدىقتاۋ جەلىلەرىن جوندەۋگە جانە جەو-نى جاڭعىرتۋعا 16,4 ملرد تەڭگە ءبولىندى. مەنشىك يەلەرىمەن بىرلەسىپ, جىلۋ ورتالىعىنىڭ تۇراقتى جۇمىسىن قامتاماسىز ەتۋ شارالار قابىلداندى. بارلىق قازاندىق جوندەۋدەن ءوتتى. قالانىڭ جىلۋ جەلىلەرىن جاڭعىرتۋ بويىنشا اۋقىمدى جۇمىس جۇرگىزىلدى. جۇمىس قارقىنىن ارتتىرىپ, جىلۋ جەلىلەرى مەن جىلۋ كوزدەرى جابدىقتارىنىڭ توزۋىن ازايتۋ قاجەت», دەدى و.بەكتەنوۆ.
كومىرلى شاھاردا سونداي-اق تەمىرجول دوڭگەلەكتەرىن شىعاراتىن «پرومماشكومپلەكت» جشس-نىڭ جۇمىسى تانىستىرىلدى. زاۋىت – قازاقستاندا اتالعان ءونىمدى شىعاراتىن جالعىز كاسىپورىن. ونىڭ اسسورتيمەنتى حالىقارالىق ستاندارتتارعا سايكەس كەلەتىن لوكوموتيۆتەرگە, جۇك جانە جولاۋشىلار ۆاگوندارىنا ارنالعان تەمىرجول دوڭگەلەكتەرىنىڭ 400-دەن اسا ءتۇرىن قامتيدى. قۋاتى جىلىنا 300 مىڭ بىرلىك ءونىم شىعاراتىن كاسىپورىندى ىسكە قوسۋ ەكىباستۇزدا تولىققاندى تەمىرجول كلاستەرىن قۇرۋعا جانە يمپورتتى الماستىرۋعا ەلەۋلى ۇلەس قوسۋعا مۇمكىندىك بەردى.
و.بەكتەنوۆ اتالعان ءوندىرىس ورنىنىڭ تولىق جۇكتەمەسىن قامتاماسىز ەتۋ ماڭىزدى ەكەنىنە توقتالدى. زاۋىت «قازاقستان تەمىرجولى» كومپانياسىنىڭ جانە ونەركاسىپتىك كاسىپورىنداردىڭ قاجەتتىلىكتەرىن ءىشىنارا وتەيدى, سونداي-اق ءونىمدى ازەربايجان, قىرعىزستان, رەسەي, تاجىكستان, وزبەكستانعا جەتكىزىپ وتىر.
تۇستەن كەيىن ۇكىمەت باسشىسى وبلىس ورتالىعىنداعى مۇناي-گاز جانە مەتاللۋرگيالىق كاسىپورىندارىن ارالاپ, وندىرىستىك كورسەتكىشتەرىن زەردەلەدى. ماسەلەن, پاۆلودار مۇناي-حيميا زاۋىتى جىلىنا شامامەن 6 ملن توننا مۇناي وڭدەيدى. شىعارىلاتىن ونىمدەردىڭ ىشىندە اۆتوموبيل بەنزينىنىڭ ءارتۇرلى ماركالارى, ديزەل وتىنى, مازۋت, بيتۋم, كوممۋنالدىق-تۇرمىستىق گازدار جانە ت.ب. بار. پرەمەر-ءمينيستردىڭ سوزىنشە, مەملەكەت باسشىسى ىشكى نارىقتى وتىنمەن قامتاماسىز ەتۋ بويىنشا ۇكىمەت الدىنا ناقتى مىندەتتەر قويدى. وسىعان بايلانىستى مۇناي وڭدەۋ زاۋىتتارى مۇناي ونىمدەرىنىڭ بۇكىل جەلىسى بويىنشا ءوندىرىس كولەمىن ۇلعايتۋ ءۇشىن بارلىق شارا كەشەنىن ىسكە اسىرۋى قاجەت.
«قازمۇنايگاز» كومپانياسىنىڭ توراعاسى ماعزۇم مىرزاعاليەۆ زاۋىتتاعى جاڭعىرتۋ جۇمىستارىنىڭ ارقاسىندا قايتا وڭدەۋ كولەمى 20 پايىزعا (16,6 ملن تونناعا دەيىن), مۇنايدى وڭدەۋ تەرەڭدىگى رەكوردتىق 86 پايىزعا, ال جەڭىل مۇناي ونىمدەرىن شىعارۋ 72 پايىزعا دەيىن وسكەنىن باياندادى. اۆتوموبيل بەنزيندەرى ءوندىرىسىن 80, ال ديزەل وتىنى ءوندىرىسىن 30 پايىزعا ۇلعايتۋ ەسەبىنەن ىشكى نارىقتىڭ قاجەتتىلىگى تولىعىمەن قامتاماسىز ەتىلدى. بۇعان قوسا بۇگىندە بيتۋم ءوندىرىسىن ەسەلەۋگە, قىسقى سۋىقتا قاتپايتىن ديزەل وتىنىن شىعارۋعا كۇش سالىنىپ جاتىر.
ۇكىمەت باسشىسى سونىمەن قاتار «نەفتەحيم LTD» كومپانياسى مەن «KSP STEEL» جشس-دا, قازاقستان ەلەكتروليز زاۋىتى مەن اليۋميني زاۋىتىندا بولدى. و.بەكتەنوۆ پاۆلودار وبلىسىندا مۇناي-حيميا كلاستەرىن دامىتۋ ءۇشىن بارلىق جاعداي جاسالعانىن اتاپ ءوتتى. اتاپ ايتقاندا, «نەفتەحيم LTD» زاۋىتى پوليپروپيلەن ونىمدەرىن يمپورتتاۋ ماسەلەسىن شەشىپ قانا قويماي, سونداي-اق وتىنعا قوسپا تۇرىندە ەكسپورتتالاتىن جاڭا باعىتتى يگەردى. ەنەرگەتيكا مينيسترلىگىنە ءارى قاراي ءوندىرىستى ۇلعايتۋ ءۇشىن كاسىپورىندى شيكىزاتپەن قامتاماسىز ەتۋ ماسەلەسىن مۇقيات پىسىقتاۋ تاپسىرىلدى.
ساپار سوڭىن اقسۋ قالاسىنداعى فەرروقورىتپا زاۋىتى مەن «ەەك» اق ەلەكتر ستانسالارىندا تۇيىندەدى.
پاۆلودار وبلىسى
