وڭىرلەردى دامىتۋ جانە مەملەكەتتىڭ وڭىرلىك ساياساتىن ءتيىمدى ىسكە اسىرۋ – سەنات جۇمىسىنداعى نەگىزگى باعىتتاردىڭ ءبىرى. ءوز سوزىندە ماۋلەن اشىمباەۆ پارلامەنت كەيىنگى جىلداردا وڭىرلەردەگى پروبلەمالاردى شەشۋگە ارنالعان ونداعان زاڭ قابىلداعانىن اتاپ ءوتتى.
قازىرگى تاڭدا ەلىمىزدە ءماسليحاتتاردىڭ قوعامدىق-ساياسي ماڭىزى ارتا ءتۇستى. وسىعان بايلانىستى پارلامەنت سەناتىنىڭ ۇيىتقى بولۋىمەن ەلىمىزدەگى ءماسليحاتتار ينستيتۋتىنىڭ 30 جىلدىعىنا وراي 2024 جىلعى 18–19 ءساۋىر كۇندەرى حالىقارالىق كونفەرەنتسيا وتكىزۋ جوسپارلانىپ وتىر.
ايتا كەتەيىك, 5 ناۋرىزدا مەملەكەت باسشىسى قاسىم-جومارت توقاەۆ سەنات توراعاسى ماۋلەن اشىمباەۆتى قابىلدادى. كەزدەسۋدە پالاتا سپيكەرى رەفورمالاردى زاڭنامالىق تۇرعىدان قامتاماسىز ەتۋ جۇمىستارىنىڭ وتكەن ايلارداعى قورىتىندىسى جانە الداعى كەزەڭگە ارنالعان جوسپارى جونىندە باياندادى. قابىلداۋ كەزىندە بەرىلگەن تاپسىرمالاردىڭ ءبىرى – پارلامەنتتىڭ زاڭ شىعارۋ قىزمەتىنە جەرگىلىكتى وكىلدى ورگانداردىڭ دەپۋتاتتارىن كەڭىنەن جۇمىلدىرۋ.
«پرەزيدەنت قاسىم-جومارت توقاەۆ ەلىمىزدە جۇرگىزىلىپ جاتقان رەفورمالاردى زاڭنامالىق تۇرعىدان قامتاماسىز ەتۋدىڭ ەرەكشە ءرولىن جانە پالاتانىڭ وڭىرلەردى دامىتۋعا تيگىزىپ كەلە جاتقان زور ىقپالىن اتاپ ءوتتى. كونفەرەنتسيا الاڭىندا مەملەكەت باسشىسىنىڭ باستاماسىمەن قولعا الىنعان ساياسي جانە ەكونوميكالىق رەفورمالاردى ىسكە اسىرۋ كەزىندەگى ءماسليحاتتاردىڭ ءرولى جان-جاقتى تالقىلانادى. قۋاتتى وڭىرلەر الەۋمەتتىك-ەكونوميكالىق ءال-اۋقاتتىڭ نەگىزى جانە ەلدىڭ درايۆەرى ەكەنى انىق. سوندىقتان وڭىرلەردىڭ تەڭگەرىمدى دامۋىنا جانە ءماسليحاتتاردىڭ ناتيجەلى جۇمىس ىستەۋىنە ىقپال ەتۋ جولىندا كۇش جۇمىلدىرۋدىڭ ماڭىزى زور», دەدى ماۋلەن اشىمباەۆ.
حالىقارالىق كونفەرەنتسياعا پارلامەنت دەپۋتاتتارىمەن بىرگە بارلىق دەڭگەيدەگى ءماسليحاتتاردىڭ توراعالارى, سونداي-اق قازاقستاندىق جانە شەتەلدىك ساراپشىلار قاتىسادى دەپ جوسپارلانىپ وتىر.
