الىپ جۇرەك يەسى 1909 جىلى لوندوندا دۇنيەگە كەلگەن جانە 106 جاسقا دەيىن ءومىر سۇرگەن. قاراپايىم ەۆرەي وتباسىنان شىققان نيكولاس تابىستى بروكەر بولىپ قىزمەت اتقارعان. ول قانشاما جاننىڭ ءومىرىن تاعدىر تالايىنان قالاي قۇتقارىپ قالدى؟
1938 جىل. قىركۇيەك ايى. ۇلىبريتانيا, فرانتسيا, يتاليا جانە گەرمانيا مەملەكەتتەرىنىڭ باسشىلارى «ميۋنحەن كەلىسىمىنە» قول قويدى. قۇجات بويىنشا چەحوسلوۆاكيانىڭ سۋدەت وبلىسى گەرمانياعا ءوتۋى كەرەك. ال بۇل وبلىستا قانشاما ەۆرەي وتباسى تۇراتىن. نەمىستەردىڭ ەۆرەيلەرگە دەگەن كوزقاراسىن, كورسەتكەن ازابىن ايتپاسام دا, ءبىلىپ وتىرسىز.
ۇلى مەيىرىم كوشى وسى كەزدە باستالعان. نيكولاس بالالاردى قۇتقارامىن دەگەن شەشىمگە كەلەدى. ول جەتىمدەردىڭ, اتا-انالارى قاماۋعا الىنعانداردىڭ, ناۋقاستاردىڭ, كەدەيلەردىڭ ءتىزىمىن جاسايدى. كۇن سايىن پراگانىڭ اينالاسىندا بوسقىندار لاگەرلەرىن ارالاپ, ءبارىن حاباردار ەتەدى. بالالار انگلياعا كەتۋى ءۇشىن ولارعا ءۇي-جاي, قامقورشى تابادى. ءوز قالتاسىنان بارىنە اقشا بەرەدى. ءىستىڭ بارلىق كەم-كەتىگىن تولىقتىرىپ, جۇيەلەپ العان سوڭ, 7 پويىزعا 669 بالانى وتىرعىزىپ, ءولىم مەن ازاپ تۇزاعىنان الىسقا الىپ كەتەدى.
ودان كەيىن قاھارلى سوعىس باستالدى. ۋاقىت زىمىراپ ءوتىپ, بارلىعىن ءوز ورنىنا قويدى. ال نيكولاستىڭ ەرلىگى تۋرالى ءتىرى جان بىلمەدى. ءيا, بۇل ءىس 49 جىل بويى قۇپيا كۇيدە جاتتى. 1987 جىلى ايەلى ونىڭ ەسكى جازبا كىتاپشاسىن كەزدەيسوق تاۋىپ الادى. سولاي عالامعا ىزگىلىگىن شاشقان ءىز كۇللى الەمگە ايگىلى بولادى.
1988 جىل. BBC ارناسى ۋينتوندى توك-شوۋعا شاقىرادى. مۇنى ەستىگەن باتىرىمىز اڭ-تاڭ. ال جۇرگىزۋشى ونىڭ قايىرىمدى ءىسى تۋرالى ايتقاندا, تىپتەن تاڭعالادى. دەگەنمەن توسىنسىي مەن تاڭعاجايىپ ساتتەر مۇنىمەن بىتپەدى. زالدا نيكولاس 50 جىل بۇرىن ءومىرىن ساقتاپ قالعان بالالار دا وتىر. مەيىرىمدى جۇرەك يەسى ولاردى كورگەندە كوزىنە جاس الدى. مەيىرىم كوشى وسىمەن اياقتالدى دەپ ويلاساڭىز, قاتەلەسەسىز. ول ەشقاشان اياقتالمايدى.
