فوتو: ۆيدەودان سكرينشوت
ىشكى ىستەر مينيسترلىگىنىڭ اقپاراتىنا سۇيەنسەك, ۇيىمداسقان توپ ەكى تانىسىن كۇشتەپ كولىككە وتىرعىزىپ, پاتەردە قارۋ-جاراقپەن قورقىتقان. جابىرلەنۋشىلەردىڭ 300 مىڭ تەڭگە اقشاسى مەن ۇيالى تەلەفوندارىن تارتىپ العان. سونىمەن قاتار تاعى ءبىر ميلليون تەڭگە تالاپ ەتكەن.
ۇستالعانداردىڭ ءبىرى قاشپاق بولىپ, بەسىنشى قاباتتان سەكىرىپ كەتكەن. ونىڭ اۋىر جاراقات العانى انىقتالدى. كۇدىكتىلەر ەكىنشى جابىرلەنۋشىنى كولىككە وتىرعىزىپ, ءىزىن سۋىتپاق بولعان كەزدە قولعا ءتۇستى. بۇل فاكتى بويىنشا قىلمىستىق كودەكستىڭ بىرنەشە بابى نەگىزىندە ءىس قوزعالدى.
سونىمەن قاتار پوليتسيا قىزمەتكەرلەرى ورالدا توناۋ, بوپسالاۋ, الاياقتىقپەن اينالىسقان كوللەدج ستۋدەنتتەرىنەن قۇرالعان قىلمىستىق توپتى ۇستادى.
اتالعان فاكتى بويىنشا سەگىز قىلمىستىق ءىس تەرگەلىپ, كۇدىكتىلەردىڭ باسقا قىلمىستارعا قاتىسى بار-جوعى انىقتالىپ جاتىر.
«بارلىق فاكتى بويىنشا كۇدىكتىلەر ۇستالدى. تەرگەۋ مۇددەسىنە ساي وزگە اقپارات جاريالانبايدى. قۇرمەتتى ازاماتتار, ەگەر سىزدەر قىلمىستىق توپتار تاراپىنان قول سۇعۋشىلىققا تاپ بولساڭىزدار, دەرەۋ پوليتسياعا حابارلاسىڭىزدار. ءبىز ءسىزدىڭ اقپاراتىڭىزدىڭ قۇپيالىلىعىنا كەپىلدىك بەرەمىز جانە ءسىزدى قورعاپ, قاۋىپسىزدىگىڭىزدى قامتاماسىز ەتۋگە بار كۇش-جىگەرىمىزدى سالامىز», دەدى دەپارتامەنت باستىعى, ءىىم رەسمي وكىلى شىڭعىس الەكەشەۆ.
ايتا كەتەيىك, ءىىم جىل باسىنان بەرى 130-دان اسا ۇيىمداسقان قىلمىستىق توپتىڭ ارەكەتىن توقتاتتى.
