زاماناۋي فورماتتا جارىق كورەتىن باعدارلاما كورپوراتسيانىڭ الماتى فيليالىندا ءتۇسىرىلىپ جاتىر. سونىمەن قاتار حابارعا ۇلتتىق ارنانىڭ بەلگيا, رەسەي, ۇلىبريتانياداعى مەنشىكتى تىلشىلەرى بەلسەندى اتسالىسىپ وتىر.
«Qazaqstan» تەلەراديوكورپوراتسياسىنىڭ باس رەداكتورى ءارى باعدارلاما جۇرگىزۋشىسى بولات ءمۇرسالىمنىڭ ايتۋىنشا, «تەحنوكراتتار تالقىسى» تسيكلىندە بۇرىن ايتىلماعان تاقىرىپتار عالىمدار تالقىسىنا تۇسەدى.
«كورپوراتسيا باسشىسى ءلاززات تانىسباي بيىل عىلىم مەن تەحنولوگيا باعىتىنداعى باعدارلامالارعا ەرەكشە ءمان بەرىپ وتىر. جاڭا جوبا – وسى باعىتتاعى ىزدەنىستىڭ ءبىرى. باعدارلاماعا ۇلتتىق عىلىم اكادەمياسىنىڭ عالىمدارى, جوعارى وقۋ ورىندارىندا ءدارىس بەرەتىن وقىتۋشىلار مەن پروفەسسورلار, عىلىمي-زەرتتەۋ ينستيتۋتتارىنىڭ باسشىلارى مەن عالىمدارى قاتىسادى. اقش, كانادا, فرانتسيا, ۇلىبريتانيا, رەسەي, جاپونيا, وڭتۇستىك كورەيا, قىتاي ەلدەرىندە وقىپ, زەرتتەۋمەن اينالىسىپ جۇرگەن قازاق عالىمدارىن ونلاين-سۇحباتقا شاقىرامىز. سونىمەن بىرگە عىلىم سالاسىندا جاڭا ەسىمدەردى تانىتۋدى كوزدەپ وتىرعان جوبا اياسىندا «بولاشاق» باعدارلاماسىمەن وقىعان عالىمداردىڭ عىلىمي جاڭالىق-
تارى تۋرالى ەستيمىز. بۇگىندە كوكەيكەستى بولىپ وتىرعان اۋانى تازارتۋ تەحنولوگياسى, ەلەكترموبيلدەر ءوندىرىسى, ەنەرگيانىڭ جاڭا كوزدەرى, قۇرىلىس سالاسىنداعى 3د پرينتەر ءتارىزدى زاماناۋي قۇرىلعىلار, اقىلدى قالالار, گەندىك ينجەنەريا, جاساندى اعزا, روبوتتەحنيكا, جەردەن تىس ءومىر, جاساندى ينتەللەكت, كيبەرقاۋىپسىزدىك, بلوكچەين جانە كريپتوۆاليۋتا, نانوونىمدەرگە قاتىستى الەمدىك جاڭالىقتاردىڭ, عالىمداردىڭ ساراپتاماسىنىڭ وسى سالالاردا تىڭنان تۇرەن سالۋعا, ەلىمىزدە تىڭ جوبالارعا تۇرتكى بولاتىنىنا سەنىمىم مول», دەيدى ول.
وسى ورايدا باعدارلاما بارىسىندا تالقىلاناتىن تاقىرىپتىڭ ءبىرى – ەلەكتر كولىگى وندىرىسىنە توقتالىپ وتكەن ب.ءمۇرسالىم عالىمداردىڭ كولىكتى قۋاتتاۋعا قاتىستى شەشىمىنىڭ ماڭىزىنا نازار اۋداردى. مۇنداي كولىكتىڭ بەنزينمەن قوزعالاتىن اۆتوموبيلدەردەن ارتىقشىلىعى قورشاعان ورتانى لاستامايدى. ەنەرگياعا دا ۇنەم. بۇگىندە ەلىمىزدە 5 مىڭعا جۋىق ەلەكترموبيل بار دەسەك, ولاردى قۋاتتاۋ نەگىزگى ماسەلەنىڭ بىرىنە اينالىپ وتىر. مۇنداي كولىكتەردى قۋاتتاۋ بەكەتتەرى ەلىمىزدە عانا ەمەس, الەمدە از. باسىم جاعدايدا ليتي-يوندى باتارەيالار قولدانىلادى. وسى ورايدا نازارباەۆ ۋنيۆەرسيتەتىنىڭ پروفەسسورى جۇماباي باكەنوۆ ليتي-كۇكىرتتى باتارەيا ويلاپ تاۋىپ, جوبانىڭ ەنەرگيا ۇنەمدىلىگىن دالەلدەپ وتىر. قىسقاسى, اتالعان باعدارلاما وسىنداي تاقىرىپ اۋقىمدىلىعىمەن ەرەكشەلەنەدى.
الماتى
