بۇل جيناقتىڭ وقىرمانعا بەرەتىن تانىمدىق ءتالىمى مول. اۆتور شىعارما باس كەيىپكەرىنىڭ باسىنان وتكەن قيلى تاعدىردى كوركەم بەينەلەگەن. تۋىندىدا مۇرتازا تىلسىم تابيعاتتىڭ كۇشىمەن قارۋ-جاراقسىز, قۇرال-سايمانسىز تاس داۋىرىندە قارت قاراتاۋدى مەكەندەگەن جابايى ادامدارمەن بىرگە ءبىر جارىم جىل ءتۇرلى قىزىقتى باسىنان وتكىزىپ, ەلگە امان-ەسەن ورالعانى تۋرالى شىنايى باياندالعان.
«بۇل كىتاپ – مۇرتازانىڭ اۋىزشا ايتقان اڭگىمەسىنىڭ قوسپاسىز كوشىرمەسى. سوندىقتان جيناقتىڭ نەگىزگى اۆتورى – مۇرتازا. كوپ وقىرمان ونىڭ ايتقان وقيعالارىنا سەنبەۋى مۇمكىن. سەبەبى ادام سەنبەس شىندىقتى ايتساڭ, ول وتىرىككە اينالادى. ال ادام سەنەر وتىرىكتى ايتساڭ, ول شىندىققا اينالادى. بىراق مۇنداعى جازىلعان دۇنيەنىڭ ءبارى – اقيقات», دەدى اۆتور.
ءىس-شارا بارىسىندا پارلامەنت سەناتىنىڭ دەپۋتاتى نۇرتورە ءجۇسىپ جانە تاعى باسقا دا ەلىمىزگە تانىمال ازاماتتار سەيىت-قاسىم بايبەكوۆتىڭ عىلىم مەن جازۋ ونەرىن قاتار الىپ جۇرگەن ەڭبەكقورلىعىن جوعارى باعالاپ, ىزگى لەبىزدەرىن ءبىلدىردى.
