بۇل ەڭبەكتە ەۋرازيالىق ۇلكەن يمپەريا التىن وردا ۇلىسىنىڭ مەملەكەت باسقارۋ جۇيەسى, اسكەري-شارۋاشىلىق قۇرىلىمى, سونىمەن قاتار دۇنيە ءجۇزى ەلدەرىمەن ورناتقان ديپلوماتيالىق قاتىناسى حاقىندا, اسىرەسە وردانىڭ قاس-قاباعىنا قاراپ ءومىر سۇرگەن رۋس كىنازدەرىنىڭ ارەكەتى ت.ب. تاريحي وقيعالار تىڭ كوزقاراسپەن, جاڭاشىل باعىتتا جازىلعان, دەيدى ماماندار.
كىتاپتى ءبىز دە شولىپ كوردىك. راسىندا وي سالارلىق دەرەك كوپ ەكەن. ويتكەنى ءبىزدىڭ بۇعان دەيىنگى التىن وردا حاقىنداعى يدەولوگيالىق ۇستانىمىمىز رەسەيلىك كوزقاراس پەن ولاردىڭ دەرەكتىك نەگىزدەرى بويىنشا قالىپتاسقان ەدى. ال ماري فاۆەرۋ حانىمنىڭ كىتابى جاڭاشا ويلاۋعا جەتەلەيتىن دۇنيە ەكەن.
وسى ورايدا ايتپاعىمىز, 368 بەتتىك كولەمدى تۋىندىنى كوكتەي شولىپ كەلە جاتىپ, 121-بەتىندە تۇرعان مىنا ءبىر سابىنا ۇلۋ ءمۇسىنى بەينەلەنگەن التىن ساپتىاياققا تاپ بولدىق. كەشىكپەي عالام قاقپاسىن اشىپ, ۇلۋ جىلى كەلە جاتقاندىقتان بۇل جادىگەرگە ەرىكسىز نازار اۋداردىق.
كىتاپتاعى ساپتىاياق تۋرالى انىقتامادا: ء«حىىى عاسىر. التىن وردا جادىگەرى» دەلىنىپ, ءارى قاراي, «ساپتىاياق سابىنداعى ۇلۋ بەينەسى حياتان, التىن نەمەسە ءسۇن مەملەكەتتەرىنىڭ ءرامىزى بولعانى انىق, دەيتۇرعانمەن بۇل ساپتىاياق جوشى ۇلىسىنا تيەسىلى ەكەنى داۋسىز. بۇل ىدىسپەن ۇلىستىڭ بيلەۋشى تۇلعالارى قىمىز ىشكەن» دەپ جازىلىپتى.
جوعارىداعى دەرەكتەردى نەگىزگە الا وتىرىپ, ساپتىاياققا ينتەرنەت جەلىسى ارقىلى سۇراۋ سالىپ كورسەك, بۇل جادىگەر قازىر سانكت-پەتەربۋرگتەگى مەملەكەتتىك ەرميتاجدىڭ «التىن وردا» ءبولىمى قورىندا ساقتاۋلى ەكەن. وسىنداعى التىن ساپتىاياق تۋرالى انىقتامالىقتا: «كوۆش. ۋلۋس دجۋچي, سەرەدينا-ۆتورايا پولوۆينا XIII ۆ., زولوتايا گراۆيروۆكا, ۆىسوتا – 4, ديامەتر 12,5 سم. مەستو ناحودكي: روسسيا, ستاۆروپول» دەگەن ءماتىن جازىلىپتى.
