بيىلعى ماۋسىمنىڭ شىمىلدىعىن «استانا» مەن «جەڭىس» اراسىنداعى كەزدەسۋ اشتى. ەلوردالىق قوس كوماندانىڭ باسەكەسىندە گريگوري باباياننىڭ شاكىرتتەرى 2:0 ەسەبىمەن جەڭىسكە جەتتى. 10-مينۋتتا ۋسمان كامارا گول سوقسا, 62 مينۋتتا ەلحان استانوۆ دوپتى توردا تۋلاتتى. قىزىلورداداعى سايىن مۇراتباەۆ اتىنداعى ستاديونعا جينالعان جانكۇيەرلەر ۇيىنە كوڭىلى قۇلازىپ قايتتى. سەبەبى وزدەرىنىڭ سۇيىكتى كوماندالارى «اقتوبەگە» لايىقتى قارسىلىق كورسەتە المادى. بۇل ويىندا يدريس ۋماەۆ دۋبل اۆتورى اتانىپ, ماكسيم سامورودوۆ ءبىر مارتە مەرگەندىك تانىتتى. «قايساردىڭ» ساپىنان توقتار جاڭعىلىشباي عانا نىسانانى ءدال كوزدەدى – 1:3. سول كۇنى تالدىقورعاندا «جەتىسۋ» مەن «اقسۋ» كۇش سىناسۋعا ءتيىس ەدى. بىراق ەڭ سوڭعى ساتتە قارجىلىق جاعدايدىڭ قيىندىعىن العا تارتقان اقسۋلىقتار چەمپيوناتقا قاتىسۋدان باس تارتتى.
كەلەسى كۇنى تاعى ءتورت باسەكەنى تاماشالادىق. الماتىداعى ورتالىق ستاديوندا «قايرات» «قىزىلجاردى» قابىلدادى. ءبىرىنشى كەزەڭ اياقتالار تۇستا جواو پاۋلو ەسەپ اشتى. 63-مينۋتتا تيمۋر مۋلدينوۆ تارازى باسىن تەڭسەلتتى. 71-مينۋتتا گيورگي زاريانىڭ سوققان گولى ارقىلى الماتىلىقتار جەڭىسكە جەتتى – 2:1. سەمەيدىڭ «ەلىم-ايى» مەن «اتىراۋ» پاۆلوداردا شەبەرلىك بايقاستى. بۇل باسەكەدە ەسەپ اشىلعان جوق – 0:0. شىمكەنتتە قار جاپالاقتاپ جاۋىپ تۇرعانىنا قاراماستان «ورداباسى» مەن «شاحتەر» اراسىنداعى كەزدەسۋ قىزىقتى ءوتتى. الاڭ يەلەرى قاراعاندىلىقتاردىڭ قاقپاسىنا جاۋاپسىز بەس دوپ سوقتى – 5:0. بۇل گولداردىڭ اۆتورلارى – يگور پلاستۋن, شوحبوز ۋماروۆ, دجاسۋربەكا ياحشيبوەۆ, زلاتان شەحوۆيچ جانە سەرگەي مالىي.
ءبىرىنشى تۋردىڭ سوڭعى ماتچى «توبىل» مەن «تۇراننىڭ» اراسىندا ءوتتى. بۇل ويىندا قوستانايلىق كلۋبتىڭ ساپىنداعى لەگيونەرلەر – احمەد ءال-مەسساۋدي مەن داۆيد ەنەن تۇركىستاندىقتاردىڭ قاقپاسىنا جاۋاپسىز ەكى گول سوعىپ, ءوز كوماندالارىنا جەڭىس سىيلادى – 2:0.
