جوبا اياسىندا تۋا ءبىتتى جانە حروموسومالىق پاتولوگيالارى بويىنشا تاۋەكەل توبىنداعى الماتى قالاسىنىڭ جۇكتى انالارى ىشتەگى شارانانىڭ دەنساۋلىعىن انىقتايتىن نەگىزگى تەكسەرۋدەن وتە الادى. زەرتتەۋ Fetal Medicine Foundation پرەناتالدىق دياگنوستيكا جونىندەگى جەتەكشى ەۋروپالىق ۇيىمنىڭ الگوريتمى بويىنشا ءبىر كۇن ىشىندە, زاماناۋي جانە وتە ءدال دياگنوستيكالىق جابدىقتاردا – يممۋنوحيميالىق تالداعىش پەن قۋاتتى ميكروسكوپتا جۇرگىزىلەدى. بۇعان دەيىن مۇنداي زەرتتەۋ كەيبىر جەكەمەنشىك ورتالىقتاردا عانا بار بولاتىن.
ء«بىزدىڭ ورتالىقتا پايدا بولعان پرەناتالدى سكرينينگتىڭ جاڭا ءادىسى اسا جىلدامدىعىمەن ەرەكشەلەنەدى: بارلىق تەكسەرۋلەر ءبىر كۇننىڭ ىشىندە جۇرگىزىلىپ, اياعى اۋىر ايەلدەرگە زەرتتەۋ ناتيجەلەرىن جىلدام ءارى بارىنشا ءدال الۋعا مۇمكىندىك بەرەدى. ورتالىقتىڭ AYALA قايىرىمدىلىق قورىمەن ءتيىمدى ىنتىماقتاستىعىنىڭ, سونىڭ ىشىندە مەملەكەتتىك مەديتسينالىق كومەك شەڭبەرىندە ءبىز دياگنوستيكالاۋمەن ەمدەۋدىڭ ەڭ زاماناۋي ادىستەرىنە قول جەتكىزىپ وتىرمىز», دەيدى الماتى قالاسىنىڭ پەريناتولوگيا جانە بالالار كارديوحيرۋرگياسى ورتالىعىنىڭ ديرەكتورى گۇلنارا نۇرلانوۆا.
مۇنداي پرەناتالدى سكرينينگ جۇكتىلىكتىڭ 12 اپتاسىنداعى جاتىرداعى ۇرىقتىڭ دامۋىنداعى ىقتيمال, تۋا ءبىتتى انوماليالاردى انىقتاۋدا شەشۋشى ءرول اتقارادى. جاڭا ءادىس دارىگەرلەرگە يممۋندىق-حيميالىق تالداۋ, ۇرىقتىڭ حروموسومالىق اۋىتقۋلارىن تسيتوگەنەتيكالىق زەرتتەۋ ارقىلى كەسەلدەردى دەر كەزىندە انىقتاۋعا, جۇكتىلىكتى جۇرگىزۋدە دۇرىس شەشىم قابىلداۋعا كومەكتەسەدى.
«قازاقستاندا بالالاردىڭ مۇگەدەكتىگىن ازايتۋ – قر دەنساۋلىق ساقتاۋ مينيسترلىگى ءۇشىن دە باستى مىندەتتەردىڭ ءبىرى. ءبىز بۇگىن ەلىمىزدىڭ تۋ كورسەتكىشى جوعارى باسقا ايماقتارىندا جالعاسىن تاباتىن العاشقى «بىر كۇن كلينيكاسى» جوباسىن باستادىق. الماتى قالاسىنداعى پجبكحو-نا بەرىلگەن يممۋنوحيميالىق تالداعىش نوبەل سىيلىعىنا يە بولعان بىرەگەي تەحنولوگيا نەگىزىندە ازىرلەنگەن. وسى تالداعىشتا پرەناتالدىق سكرينينگ ءۇشىن پايدالانىلاتىن ماركەرلەر بۇكىل الەمدەگى «التىن ستاندارت» بولىپ ەسەپتەلەدى. يننوۆاتسيالىق قۇرال-جابدىققا قول جەتكىزۋگە كومەك قولىن سوزعان «شەۆرون» كومپانياسىنا دا ەلىمىزدىڭ بولاشاق ازاماتتارىنىڭ گەنەتيكالىق دەنساۋلىعىن نىعايتۋعا قوسقان زور ۇلەسى ءۇشىن العىسىمىزدى بىلدىرەمىز», دەدى دەنساۋلىق ساقتاۋ مينيسترلىگى انا مەن بالا دەنساۋلىعىن قورعاۋ دەپارتامەنتىنىڭ ديرەكتورى ماعريپا حاميتوۆا.
سونىمەن پەريناتولوگيا جانە بالالار كارديوحيرۋرگياسى ورتالىعىنىڭ دارىگەرلەرى تەك 2024 جىلى 10 مىڭ جۇكتى ايەلدى پرەناتالدى سكرينينگتەن وتكىزۋدى جوسپارلاپ وتىر.
«مىنە, 15 جىلدان بەرى ءبىز AYALA جەكە قايىرىمدىلىق قورىنىڭ پەريناتالدىق جانە نەوناتالدىق دياگنوستيكانىڭ وزەكتى ماسەلەلەرىن شەشۋگە, ىشتەگى شارانا مەن جاڭا تۋعان نارەستەگە ساپالى مەديتسينالىق كومەك كورسەتۋگە, پەريناتالدىق جانە نەوناتالدىق ورتالىقتاردى ماتەريالدىق-تەحنيكالىق قامتاماسىز ەتۋدى جاقسارتۋعا, سونداي-اق نەوناتولوگ دارىگەرلەر مەن ورتا مەديتسينالىق قىزمەتكەرلەردىڭ بىلىكتىلىگىن ارتتىرۋعا باعىتتالعان جوبالارىن قولداپ كەلەمىز. بۇل ەلىمىزدەگى سابيلەردىڭ شەتىنەۋىن ازايتۋعا, جاستاي مۇگەدەكتىكتىڭ الدىن الۋعا ىقپال ەتەدى دەپ سەنەمىز», دەيدى «شەۆرون» كومپانياسىنىڭ الەۋمەتتىك ينۆەستيتسيالار جونىندەگى ۇيلەستىرۋشىسى جانار قوشپانوۆا.
ءوز كەزەگىندە 17 جىلدان بەرى پەريناتالدىق بالالار مەديتسيناسىنىڭ العا جىلجۋىنا ايتارلىقتاي ۇلەس قوسىپ كەلە جاتقان AYALA كايىرىمدىلىق قورىنىڭ نەگىزىن قالاۋشى جانە پرەزيدەنتى ايدان سۇلەيمەنوۆا: ء«بىزدىڭ ەلىمىز ءۇشىن بۇل ماسەلە ءالى دە كوكەيكەستى كۇيىندە قالىپ وتىر. جىل سايىن قازاقستاندا ءتۋابىتتى نەمەسە تۇقىم قۋالايتىن كەسەلى بار 3500-گە جۋىق بالا دۇنيەگە كەلەدى. جىل سايىن مۇمكىندىگى شەكتەۋلى مەكتەپ جاسىنا دەيىنگى بالالاردىڭ سانى 6 مىڭعا كوبەيىپ كەلەدى. تۋعاننان باستاپ, 18 جاسقا دەيىنگى 100 مىڭنان استام بالا مۇگەدەكتىككە شالدىققان. ء«بىر كۇندىك كلينيكانىڭ» اشىلۋى پەريناتولوگيانى دامىتۋدا جانە قازاقستاندا جۇكتى ايەلدەرگە ساپالى مەديتسينالىق كومەكتى قامتاماسىز ەتۋدە ماڭىزدى قادام بولىپ وتىر. بولاشاق انالارعا كەشەندى سكرينينگتىك زەرتتەۋ جۇرگىزۋدىڭ جاڭا ءتاسىلى ءتيىمدى قۇرال بولاتىنىنا سەنىمدىمىن», دەدى.
