پەداگوگتەر مەن وقۋشىلارعا پايدالى لايفحاكتاردى ۇسىنعان ونىڭ بۇل ەڭبەگى جۋىقتا «قازاقستان مۇعالىمدەرى» بايقاۋىندا توپ جاردى. يگور بەينەروليكتەرىندە ماماندىعىنىڭ قانشالىقتى ماڭىزدى ەكەنىن جانە بالالارمەن ورتاق ءتىل تابا ءبىلۋدىڭ قاجەتتىلىگىن كورسەتۋگە تىرىسقانى بايقالادى. ماماننىڭ پىكىرىنشە, وقۋشىلاردىڭ بەلگىلى ءبىر پانگە قىزىعۋشىلىعى ساباقتىڭ, تاپسىرمالاردىڭ قىزىقتى بەرىلۋىنە بايلانىستى.
– پەداگوگيكا سالاسىندا 7,5 جىلداي قىزمەت اتقارىپ كەلەمىن. بۇل ماماندىققا ويدا جوقتا كەلدىم دەۋگە بولادى. العاشىندا نەمىس ءتىلىنىڭ اۋدارماشىسى ماماندىعىنا قۇجات تاپسىرعام. كەيىن توپتا وقيتىندار از بولىپ, كوللەدج ءبىزدى وزگە ماماندىقتارعا ءبولدى. مەن باستاۋىش سىنىپتاردى وقىتاتىن پەداگوگ باعىتىن تاڭدادىم. ءوزىمدى باستاپقىدا مۇعالىم رەتىندە كورسەتە المايتىن شىعارمىن دەپ ويلايتىنمىن. دەيتۇرعانمەن, ديپلوم العان سوڭ وبلىس ورتالىعىنداعى №40 مەكتەپكە جۇمىسقا تۇرۋعا بەل بايلادىم, – دەپ اڭگىمەلەدى جاس پەداگوگ.
يگور كىشكەنتاي بالالاردىڭ وقۋعا زەيىنىن ارتتىرۋ ءۇشىن وقىتۋدىڭ نەبىر فورمالارىن قولدانادى ەكەن. كورنەكى قۇرالداردىڭ اشىق ءتۇستى ءارى بوياۋى قانىق بولۋى كەرەك. پروەكتور ارقىلى پرەزەنتاتسيالار مەن بەينەجازبالار كورسەتەدى. ساباقتىڭ تاقىرىبىن اۋىزشا بايانداعانشا, ونى بەينەلى تۇردە ۇسىنعان الدەقايدا ءتيىمدى دەپ ەسەپتەيدى. بالالار ءار ساباعىنا قىزىعا قاتىسادى.
– العاشقىدا ساباقتارىمدى تالداۋ ءۇشىن TikTok-تا بەينە-روليكتەر تۇسىرە باستادىم. بالالاردىڭ ساباق ۇستىندە جاۋاپ بەرگەنىن سىرتتان باقىلاۋ – مەن ءۇشىن ماڭىزدى ەدى. سەبەبى ولارعا نەنىڭ ۇناپ, نەنىڭ ۇناماعانىن ەكران ارقىلى كورە الاسىڭ, ءارى ءوز ارەكەتىڭدى باعالايسىڭ. وقۋشىلارىمنىڭ اتا-انالارىنىڭ رۇقساتىمەن بەينەجازبالاردى پلاتفورماعا ورنالاستىرعان سوڭ ارادا كوپ ۋاقىت وتپەي مەنىڭ ادىستەمەم, ساباق ۇستىندەگى بالالاردىڭ ءوزىن ءوزى ۇستاۋى, سىنىپتاعى احۋالدىڭ ادامدارعا ۇنايتىنىن بايقادىم. ءارى قاراي دا روليكتەردى سالۋدى جالعاستىردىم. ءسويتىپ, كوپشىلىك پىكىر جازا باستادى. بولاشاق پەداگوگتەر, وقۋ ورىندارىن ءبىتىرۋشى جاس ماماندار مەنىڭ ۆيدەولارىمنان وزدەرى ءۇشىن جاڭالىق تاپقانىن ايتىپ, حابارلاسىپ جاتادى. مۇنداي سوزدەردى ەستۋ مەن ءۇشىن قۋانىش, – دەيدى يگور.
پەداگوگ-زەرتتەۋشى بولاشاقتا دا ءوزىنىڭ قىزمەتىن مۇعالىمدىك سالادا جالعاستىرا بەرەتىن ويى بار. بالالاردىڭ جاعىمدى ەموتسياسىن كورۋ, ولاردىڭ وي-قيالدارىن دامىتۋدان ارتىق باقىت جوق دەپ ەسەپتەيدى جاس مامان.
پاۆلودار وبلىسى
