بۇگىنگى ۋاقىت شىنايى شايقاستاردان گورى كيبەرشابۋىلدار مەن سوعىستاردىڭ زامانى بولىپ تۇر. ۆيرتۋالدى الەمدەگى شەكارامىزدى كۇن سايىن كىرپىك قاقپاي قورعاماسا بولمايدى. وسى ورايدا كيبەرقاۋىپسىزدىككە جاۋاپتى سالا ماماندارىنىڭ بىلىكتىلىگىن ۇنەمى كوتەرىپ وتىرۋ ماڭىزدى. «Astana IT University» ءبىلىم ورداسىنىڭ بەسجىلدىعىنا وراي جوو اسكەري كافەدراسىنىڭ ستۋدەنتتەرى اراسىندا وتكەن «AITU Military CTF» زياتكەرلىك سايىسى دا وسى ماقساتتا ۇيىمداستىرىلدى.
بۇل جارىس ءتورت باعىتتان تۇردى: Web جۇيەنىڭ وسال تۇسىن تابۋ, OSINT زەرتتەۋ جۇرگىزۋ, PWN بينارلىق وسالدىقتاردى پايدالانۋ جانە «Reverse engineering» باستاپقى كودىن وقۋ جانە ونى پايدالانۋ. سول سياقتى كيبەرشابۋىلدار ورىن الۋى ىقتيمال ۇيىم ءۇشىن شىعىندار نەمەسە جاعىمسىز سالدارلار بويىنشا «ىسكەرلىك تاۋەكەل» ويىنىنان ءوتۋ كەرەك بولدى.
ستۋدەنتتەردەن قۇرالعان 15 كوماندا كيبەرپوليگونداعى اسكەري ينفراقۇرىلىمدى «بۇعاتتاۋدا» باعىن سىناپ, بيزنەس تاۋەكەلدەرىن زەرتتەدى, سونىمەن قاتار كيبەرقاۋىپسىزدىك بويىنشا ءتۇرلى ماسەلەنى شەشتى. «Astana IT University» اسكەري كافەدراسى كيبەرقاۋىپسىزدىك تسيكلىنىڭ باستىعى, زاپاستاعى پولكوۆنيك تالايبەك ومىرزاقوۆ ءبىلىم مەكەمەلەرىندە مۇنداي جارىس ءبىرىنشى رەت ءوتىپ وتىرعانىن تىلگە تيەك ەتتى.
– وتكەن جىلى اسكەري كافەدرا بازاسىندا كيبەرپوليگون قۇرىلعان بولاتىن. سول جەردە CTF فورماتىندا كيبەرقاۋىپسىزدىك بويىنشا جارىستار وتەدى. قاتىسۋشىلار اقپاراتتىق قاۋىپسىزدىك ماسەلەلەرىن شەشۋ بويىنشا جارىسادى. بۇگىنگى جارىستىڭ باستى ماقساتى – ستۋدەنتتەردى وسى باعىتتاعى پراكتيكالىق داعدىلارعا باۋلۋ, – دەدى ول.
جارىس قورىتىندىسى بويىنشا جەڭىمپاز كوماندالار انىقتالدى. ءبىرىنشى ورىنعا 2800 ۇپاي جيناعان «P3NT4GON» كومانداسى يە بولسا, 2-ورىنعا 2400 ۇپايمەن «12» كومانداسى, ال 3-ورىنعا 2400 ۇپاي جيناپ, الايدا قارسىلاسىنان ۋاقىت بويىنشا ۇتىلىپ قالعان «M1GU3L» كومانداسى تابان تىرەدى.
– «Astana Hub» ۇيىمداستىرعان جارىسقا قاتىسۋ مەنىڭ العاشقى تاجىريبەم بولعان. تارتىستى سايىسقا اسكەري كافەدراداعى ۆزۆود بالالارىنان قۇرالعان كوماندا بولىپ قاتىستىق. سايىس وتە قىزىق بولدى. بولاشاقتا كيبەرقاۋىپسىزدىك سالاسىندا جۇمىس ىستەۋدى جوسپارلاپ وتىرمىن, – دەدى «Astana IT University» اسكەري كافەدراسىنىڭ ءبىرىنشى كۋرس ستۋدەنتى ءانۋار اسقاروۆ.
ءىس-شارا «AITU Orchestra» جانە «AITU Music Club» كلۋبتارىنىڭ كونتسەرتتىك باعدارلاماسىمەن اياقتالدى. زياتكەرلىك سايىس جەڭىمپازدارى گراموتالارمەن جانە باعالى سىيلىقتارمەن ماراپاتتالدى.
