جەكەمەنشىك مال فەرمەرى پىقىپ بۇدان گورى وقىپ-توقىعانى بار, كوزى اشىق اعاسى اقالاق اۋىلعا اكىم بولىپ بەكىگەندە:
– كوكە, اكىم بولدىڭىز, اكىمدىگىڭىز مەملەكەتتىك قىزمەتكە جاتادى, بۇعان دەيىنگى «بۇرقىراتىپ» كەلگەن سىن-مىنىڭىزگە اباي بولىڭىز, – دەپ قالىپ ەدى, اعاسى الارا قاراپ:
– قۇلدىق پسيحولوگيادان ارىلار كۇنىڭ بولار ما ەكەن سەنىڭ! قۇلدىق قۇلدىراۋ انا قاراماعىڭداعى مالشىلارىڭا عانا جاراسادى, – دەپ الىپ, ايدا كەپ لەپىرمە «لەكتسياسىن» وقىسىن...
اۋىل جۇرتى دا اعاسىنىڭ وسى ءبىر ءمىنشىل قىزبا مىنەزىن باعالاپ, اۋدانعا كەلگەن جاڭا اكىم ەل-جۇرتتى جيناپ اۋىلدى باسقاراتىن ادامدى وزدەرىنە جۇكتەگەندە, ءبىراۋىزدان وسى اقالاقتى ۇسىنىپ بەكىتتىرىپ العانى بار.
كوپ وتپەي اعاسى اۋداندا وتكەن القالى جيىلىستا ءسوزىن كىل سىناپ-مىنەۋگە باعىشتاپ:
– قۇلدىق پسيحولوگيادان ارىلماي ادام بولمايمىز! باستىق اتاۋلىنىڭ قيسىنسىز ءىس-ارەكەتىنە ء«لابباي, تاقسىر!» دەپ باس شۇلعىپ ماڭگىرىپ جۇرە بەرسەك, كۇنىمىز قاراڭ, بولاشاعىمىز ب ۇلىڭعىر!.. – دەپ كوسىلگەنىندە بۇل جەر شۇقىپ, جيىننىڭ ارتىن كۇتپەي, بىرگە بارعان اعاسىنان بۇرىن اۋىلعا جەتىپ العانى بار.
نە ىستەسىن, ءوز قولىن ءوزى كەسە مە... ايتقان باعىتىنان قايتپايتىن اعاسىنىڭ قىرسىق مىنەزى بالا كەزىنەن بار. ايتىپ كورسىن... قايتارىمى اعىل-تەگىل بولاتىنىن بىلەدى. مۇندايدا «بۇكىردى مولا عانا تۇزەيدى» دەۋشى مە ەدى.
اۋدانداعىلار دا قاراپ جاتپاپتى, وندا دا «كوزىقاراقتىلار» جەتىپ-ارتىلادى, التى ايلىق قورىتىندى بويىنشا بۇلاردىڭ اۋلىن سىن تەزىنە سالىپ, اقالاق اعاسىنا سوگىس ارقالاتىپ جىبەرىپتى...
اعاسى دا ايىلىن جيماي, كەزەكتى وبلىستىق باسقوسۋدا كيلىگىپ ءسوز الىپ, مىنبەردەن ايدا كەپ كوسىلىپتى دەپ ەستىدى... ونىسىن تاۋەلسىز تەلەارنا ءىلىپ الىپ, «ىلگەرى» وزدىرىپتى.
وبلىس بۇنىسىنا «وقىرىنا» قاراپ, ەكى اي وتپەي اعاسىنىڭ «وي-شۇڭقىرىن» قازبالاپ... نە كەرەك, قاي-قايدا دا بار كەمشىلىكتىڭ تىزبەسىن ءتىزىپ, وبلىس اكىمىنىڭ بۇيرىعىمەن اعاسىنا «قاتاڭ سوگىستى» بۇيىرتتى.
اعاسى دا قاراپ قالماي, سارى جاعال باسىلىم بۇنىڭ «قۇلدىق پسيحولوگيا قۇردىمعا قۇلاتادى» اتتى كولدەي ماقالاسىن جاريالاپ, ايدى اسپاننان ءبىر-اق شىعارعانىن قايتەسىڭ...
...ءبىر-اق كۇندە «اۋىل اكىمى اقالاق اساباس قىزمەتىنەن بوساتىلسىن» دەگەن بۇيرىق بۇرق ەتىپ, اعاسى «اتىنان» اۋدارىلىپ ءتۇسىپ, باياعى تاز قالپىنا تۇسە قالدى.
فەرمەر پىقىپ ءۇيلى-جاندى اقالاق اعاسىن ءبىر-اق كۇندە تاۋ اسىرىپ, مالى جايلاعان جايلاۋدان ءبىر-اق شىعاردى... سونداعى قورا-قوپسىعا قارايدى, كەزەكتەسىپ قوي باعادى... ەستۋىنشە, اعاسى سونداعى ەكى-ءۇش قويشىنىڭ باسى قوسىلعاندا اعىل-تەگىل «قۇلدىق پسيحولوگيا» تۋرالى لەكتسياسىن اندا-ساندا تاۋ-تاستى جاڭعىرتا وقىپ قويادى ەكەن...
بەرىك سادىر
