بوتانيكالىق باقتى كۇردەلى جوندەۋدەن وتكىزۋگە 300 000 000 تەڭگە ءبولىندى. ەلىمىزدە ەكى بوتانيكالىق باق بولسا, سونىڭ ءبىرى پەتروپاۆل قالاسىندا ورنالاسقان. 1800 شارشى مەتر اۋماقتى الىپ جاتقان جىلىجايدا الەمنىڭ ءار قيىرىنان اكەلىنگەن تروپيكالىق, سۋبتروپيكالىق وسىمدىكتەردىڭ 400-گە جۋىق ءتۇرى جايقالا ءوسىپ تۇر. مۇندا حالىقارالىق “قىزىل كىتاپقا” ەنگەن وتە سيرەك دەكوراتيۆتى جاسىل وسىمدىكتەر مەن اعاشتار دا كەزدەسەدى. ماسەلەن, ۆاشينگتون پالماسى ەلىمىز بويىنشا وسىندا عانا بار. پەتروپاۆل ەت-كونسەرۆى كومبيناتى جانىنان قۇرىلىپ, العاشقىدا “تابيعات پەرزەنتتەرى” ەكولوگيالىق ورتالىعى, كەيىن “قىزىلجار ورانجەرەياسى” كاسىپورنى بولىپ اتالسا دا كوپتەن بەرى كۇردەلى جوندەۋ كورمەگەنى ءبىلىنىپ تۇراتىن.
جۋىردا وسىندا وبلىس اكىمى سەرىك ءبىلالوۆ بولىپ, “جول كارتاسى” اياسىندا اتقارىلىپ جاتقان جۇمىستارمەن تانىستى. باعدارلاما بويىنشا 300 ميلليون تەڭگە ءبولىنىپ, قۇرىلىس بريگادالارى ىسكە جۇمىلا كىرىسىپ كەتكەن. تروپيكالىق ساياباقتى ارالاپ كورگەن سەرىك سۇلتانعازى ۇلى بيىكتىگى ءتورت قاباتتى ۇيگە پارا-پار شىنى كۇمبەزدەر, سۋبۇرقاقتار ورناتىلاتىنىن, اينالانى كوركەيتۋگە 75 ميلليون تەڭگە قاراستىرىلاتىنىن, باسقا دا شارالار اتقارىلاتىنىن, ءسويتىپ, قالا تۇرعىندارى دەمالاتىن سايالى ورىنعا اينالاتىنىن جەتكىزدى. ءومىر ەسقالي. سولتۇستىك قازاقستان وبلىسى.
