بيلەر كەڭەسىنىڭ اۋقىمدى جۇمىسى
مەملەكەت باسشىسىنىڭ ادىلەتتى قوعام ورناتۋ, ءتۇرلى كەلەڭسىزدىكتى جويۋ, جاستارعا ساپالى ءبىلىم مەن سانالى تاربيە بەرۋ, حالقىمىزدىڭ ىنتىماعىن ارتتىرۋ باستاماسىنا وراي ۇمىت بولىپ بارا جاتقان دالا دەموكراتياسى قاعيداتتارىن جاڭعىرتۋ اسا ماڭىزدى.
وسى ماقساتتا ء«بىر جاعادان باس, ءبىر جەڭنەن قول شىعارىپ», جۇمىس ىستەۋ ءۇشىن ەلىمىزدە ءتۇرلى قوعامدىق ينستيتۋت كۇش بىرىكتىردى. كەيىنگى جىلدارى ۇلتتىق قۇندىلىقتارىمىز دامۋىنىڭ تەجەلۋىنە اكەلىپ سوقتىرعان ءتۇرلى اعىمنىڭ, الەۋمەتتىك جەلىلەردەگى جاريالانىمداردىڭ جاستارىمىزدىڭ ساناسىن ايتارلىقتاي ۋلاعانى بەلگىلى. ەندى وسىنداي تەرىس ارەكەتتەرگە توسقاۋىل قويىپ, ۇلتتىق سالت-ءداستۇرىمىزدى ناسيحاتتاۋ ارقىلى جاستارعا دۇرىس تاربيە بەرۋ, حالىق اراسىنداعى كەيبىر تۇسىنبەۋشىلىكتى كەلىسە وتىرىپ شەشۋ ماقساتىندا ەلىمىزدە بيلەر كەڭەسى قۇرىلىپ, جۇمىستارىن جۇرگىزىپ جاتىر.
وسى يگى باستاما ءبىزدىڭ اۋداندا دا قۇرامى جەتى ادامنان تۇراتىن بيلەر كەڭەسىن قۇرۋ ارقىلى جۇزەگە اسسا, بارلىق 18 اۋىلدىق وكرۋگتە قۇرامدارىنا ءۇش ادامنان ەنگىزىلگەن بيلەر كەڭەسى قۇرىلىپ, ءوز جۇمىستارىن باستاپ كەتكەن. اۋىلدىق وكرۋگتەردەگى بيلەر كەڭەستەرىنىڭ مۇشەلەرى وكرۋگتەردە وتكىزىلگەن القالى جيىندارعا قاتىسىپ, اۋىلدىڭ الەۋمەتتىك-ەكونوميكالىق دامۋى, اۋىل تۇرعىندارىنىڭ تۇرمىس-تىرشىلىگىن جاقسارتۋ, ولاردى جايىلىمدارمەن, مالدى, ەگىستەردى سۋاراتىن اعىن سۋمەن قامتاماسىز ەتۋ, اۋىل جاستارىنىڭ بوس ۋاقىتىن ءتيىمدى پايدالانۋى, ولاردىڭ اراسىندا تۇسىنىك جۇمىستارىن جۇرگىزۋ ارقىلى تەرىس قىلىقتار مەن تەرىس ءدىني اعىمداردىڭ ىقپالىنا ءتۇسۋىنىڭ الدىن الۋ سياقتى كۇرمەۋى قيىن شارۋالاردى شەشۋمەن اينالىسىپ كەلەدى.
ەل ىشىندە كەيبىر ادامداردىڭ كوزقاراسى سايكەس كەلمەي قالىپ, ارتى ۇرىس-كەرىسكە ۇلاسىپ جاتاتىن جاعدايلار دا كەزدەسەدى. ءتىپتى سۇتتەي ۇيىپ وتىرعان بالالى-شاعالى وتباسىلاردىڭ شاڭىراقتارى شايقالىپ, سابيلەردىڭ ءتىرى جەتىم بولىپ جاتقانى دا قابىرعامىزعا باتاتىن. اۋداندىق جانە اۋىلدىق بيلەر كەڭەستەرى وسى پروبلەمامەن دە بەلسەنە اينالىسادى.
يساعالي سالىمباەۆ,
بايزاق اۋداندىق ارداگەرلەر كەڭەسى جانىنداعى بيلەر كەڭەسىنىڭ توراعاسى
جامبىل وبلىسى
ارتىق ءبىلىم العىڭ كەلسە, ەسىك اشىق
«وقۋعا قۇشتار مەكتەپ» جوباسى بويىنشا بارلىق سالادا ءىس-شارالار ۇزدىكسىز ۇيىمداستىرىلىپ, ءتۇرلى جوبا جۇزەگە اسىرىلىپ كەلەدى. كىتاپحانا – وسى كۇنگە دەيىن ادامزات تاريحىنىڭ كەرۋەنىن سۇرىندىرمەي كەلە جاتقان ءبىلىم مەن بىلىكتىڭ, ءتالىم مەن تاربيەنىڭ, پاراساتتىڭ مەكەنى. كىتاپحانانىڭ باستى ماقساتى – وسكەلەڭ ۇرپاقتى كىتاپ وقۋعا شاقىرۋ ارقىلى ادامگەرشىلىككە, ىزگىلىككە تاربيەلەۋ. «ارتىق ءبىلىم كىتاپتا, ەرىنبە وقىپ كورۋگە», دەپ حاكىم اباي جىرلاعانداي, كىتاپحاناعا كەلىپ, بوس ۋاقىتىڭدى ءتيىمدى پايدالانۋدان, ءبىلىمىڭدى شىڭداۋدان اسقان پايدالى ءىس بولماسا كەرەك.
كىتاپحانادا وتكىزەتىن ءىس-شارالارىمىزدا مۋلتيمەديانىڭ مۇمكىندىكتەرىن قولدانۋ ارقىلى ءبىز اۆتوردىڭ شىعارماشىلىعى مەن تاقىرىبىنا كوبىرەك توقتالا الامىز. ادەبي-سازدى كەشتەردە, مەديالەكتسيالاردا, كىتاپتاردىڭ تۇساۋكەسەرلەرىندە, شىعارماشىلىق كەشتەردە مۋلتيمەديالىق كورىنىستى قولدانا وتىرىپ, وقىرمانداردى كىتاپتىڭ ەلەكتروندىق نۇسقالارىن بەينەكورسەتىلىم مەن باسقا دا كورنەكىلىكتەر ارقىلى قىزىقتىرۋعا ۇمتىلامىز. بۇدان بولەك سلايد-جۋرنالدار, سلايد-رەپورتاجدار, سايىستار, سلايد-گالەرەيالار, ۆيرتۋالدى كورمەلەر دە كورسەتىلەدى. زامانعا ساي جاڭا ادىستەر ۇلكەن قىزىعۋشىلىقپەن جانە ەرەكشە ىقىلاسپەن قابىلدانادى.
ەندى ادامنىڭ كىتاپ وقۋعا قىزىعۋشىلىعىن ارتتىرۋدىڭ باسقا دا تىڭ ادىستەرىنە قىسقاشا توقتالا كەتەيىن. ماسەلەن, «بۋككروسسينگ», «فلەشموب», «سيقىرلى دوربا», «كوك شابادان», تاعى باسقالارى – اتا-انا مەن بالانىڭ, تۇتاستاي العاندا وقىرماننىڭ ەرتە دامۋىنا باعىتتالعان جوبالار. مۇنىڭ ىشىندە, اسىرەسە, بالانى كىتاپ وقۋعا ىنتالاندىراتىن ادىستەردىڭ تيىمدىلىگى جوعارى ەكەنىن اتاپ كورسەتكەن ءجون. جانە بالالارعا ارنالعان جوبالاردىڭ بارلىعى داۋىستاپ وقۋعا نەگىزدەلگەن. ويتكەنى بالالار تىڭداۋدى جاقسى كورەدى, كوپ جاعدايدا وزدىگىنەن وقۋدى قالامايدى, ونى جۇمىس رەتىندە قابىلدايدى.
قورىتا ايتقاندا, كىتاپ ءوزىڭدى دە, وزگەنى دە سىيلاۋعا ۇيرەتەدى. بالالاردىڭ ءبىلىمىن, وي-ءورىسىن كەڭەيتەدى. سوندىقتان ءبىز, مەكتەپ كىتاپحاناشىلارى, كىتاپ مارتەبەسىن كوتەرۋىمىز كەرەك.
روزا بۇلكەنوۆا,
ق.بەكقوجين اتىنداعى مەكتەپ كىتاپحاناسىنىڭ مەڭگەرۋشىسى
پاۆلودار
سۋدىڭ دا سۇراۋى بار
مەن ءامينا ناقىپبەكقىزىمىن. جاسىم 11-دە. شىمكەنت قالاسىندا تۇرامىن. بۇگىن سۋ تۋرالى جازعىم كەلىپ وتىر, سەبەبى انام ۇنەمى سۋدى ءوشىر, سۋدى تەككە اعىزا بەرمە دەسە, رەنجۋشى ەدىم. سويتسەم, بەكەرگە ايتپايدى ەكەن. بۇگىن قازاق ءتىلى مۇعالىمى گۇلنار اپايىم سوڭعى كەزدە اۋىز سۋىمىزدىڭ ازايىپ بارا جاتقانىن, بولاشاقتا كەيبىر شەت مەملەكەتتەردەگىدەي اۋىز سۋدان تارىعىپ قالۋىمىز مۇمكىن ەكەنىن ايتقاندا, قاتتى ۋايىمداپ كەتتىم. ەندى انام ايتپاسا دا ۇنەمدەيتىن بولدىم. بۇرىن جارىقتى دا جاعىپ جۇرە بەرەتىن ەدىم. ال قازىر ونى دا قاراڭعى تۇسكەنشە جاقپاۋعا, تەلەفوننىڭ قۋاتتاعىشىن توقتان اجىراتىپ قويۋعا تىرىسامىن.
قىتاي حالقى دا ەرتەرەكتە سۋ تاپشىلىعىنا تاپ بولىپتى, بىراق بەرتىندە ءبارىن زەرتتەپ, زەردەلەي كەلە, قولدانىلعان سۋدى قايتادان وڭدەپ تازا سۋ ەتىپ شىعاراتىن تەحنولوگياعا قول جەتكىزىپتى. وسىلايشا, اۋىز سۋ پروبلەماسىن شەشكەن كورىنەدى. وسى جەردە تاعى ءبىر مارتە ەكپىن تۇسىرە كەتەتىن جايت, عالىمداردىڭ زەرتتەۋلەرىنە قاراعاندا, تازا سۋ قورى وتە از جانە ونى ۇنەمدەمەسە, بولاشاقتا سۋ تاپشىلىعى سالدارىنان مەملەكەتتەر ءبىر-بىرىنە قارسى سوعىس اشۋى دا مۇمكىن ەكەن. وسى سەبەپتى بارىمىزدى باعالاي بىلەيىك, ۇنەمدەي جۇرەيىك دەگىم كەلەدى. ۇنەمدەۋ ارقىلى ءبىز ءوزىمىزدى ۇلكەن پروبلەمادان قۇتقارامىز. مىسالى, افريكا قۇرلىعىندا سۋ جەتىسپەيدى, ال ءبىز ونى ويلانباستان قالاي بولسا سولاي جۇمسايمىز. بارشامىز سۋدى ۇنەمدەۋ ارقىلى بولاشاقتا ەلدەر اراسىندا سۋعا قاتىستى تۇسىنىسپەۋشىلىكتەر تۋىنداماۋىن قامتاماسىز ەتۋگە ۇلەس قوسامىز. ونىڭ تۇك قيىندىعى جوق. تەك سۋ اتاۋلىنى ەسەپپەن پايدالانىپ, ىسىراپ ەتپەسەك بولعانى.
سوڭعى كەزدە ويلاپ قويامىن, نەگە بۇرىن انام ايتسا رەنجىگەنمىن دەپ. ولار تەككە ايتپايدى ەكەن عوي. اتا-بابالارىمىزدىڭ «سۋدىڭ دا سۇراۋى بار» دەگەن ناقىلىنىڭ ءمان-ماڭىزىن دا ەندى ۇققاندايمىن. وسىنى ناقتى ۇعىندىرعان گۇلنار اپايىما العىسىم شەكسىز.
سۋىمىزدى ۇنەمدەيىكشى, دوستار!
ءامينا اقىلبەك,
وقۋشى
شىمكەنت
