پارلامەنت سەناتى اپپاراتىنىڭ باسشىسى ماكسيم سپوتكاي مەن فەدەراتسيا كەڭەسى اپپاراتىنىڭ باسشىسى گەننادي گولوۆتىڭ كەزدەسۋى بارىسىندا ءوزارا ءىس-قيمىلدى ودان ءارى نىعايتۋ تالقىلاۋدىڭ نەگىزگى تاقىرىبى بولدى. تاراپتار سونداي-اق ىنتىماقتاستىق تۋرالى ءتيىستى مەموراندۋمدى ازىرلەۋ جانە وعان قول قويۋ مۇمكىندىگىن تالقىلادى.
ماكسيم سپوتكاي باسقوسۋدا ەلدەرىمىز ەكى جاقتى كۇن تارتىبىندەگى اۋقىمدى ماسەلەلەر بويىنشا بارلىق دەڭگەيدە ءوزارا ءتيىمدى جانە ناتيجەلى ءىس-قيمىلدى ورىستەتىپ كەلە جاتقانىن اتاپ ءوتتى.
«قازاقستان مەن رەسەي باسشىلارى كەزدەسۋلەر مەن كونسۋلتاتسيالاردى جۇيەلى تۇردە وتكىزىپ كەلەدى. پارلامەنتتەر اراسىندا دا ءتيىمدى جۇمىس قاتىناسى قالىپتاستى. سەنات توراعاسى ماۋلەن اشىمباەۆ پەن فەدەراتسيا كەڭەسىنىڭ توراعاسى ۆالەنتينا ماتۆيەنكونىڭ باستاماسىمەن پارلامەنتارالىق ىنتىماقتاستىقتى دامىتۋ جونىندەگى ءىس جۇزىندەگى شارالار جوسپارىنا قول قويىلىپ, تابىستى جۇزەگە اسىپ كەلەدى. ءبىزدىڭ كەزدەسۋ, شىن مانىندە, سول جۇمىستىڭ جالعاسى», دەدى م.سپوتكاي.
گەننادي گولوۆ ءوز كەزەگىندە پارلامەنتتەر پالاتالارىنىڭ اپپاراتتارى اراسىنداعى ءوزارا ءىس-قيمىلدىڭ جوعارى دەڭگەيىن اتاپ ءوتتى. ول سونداي-اق تاجىريبە الماسۋ جۇمىسىنا قارقىن بەرۋ ءۇشىن اپپاراتتاردىڭ ءتيىستى قۇرىلىمدىق بولىمشەلەرى قىزمەتكەرلەرىنىڭ ءوزارا تاعىلىمداماسىن ۇيىمداستىرۋدى ۇسىندى.
كەزدەسۋگە قاتىسۋشىلار سونىمەن قاتار ەلەكتروندىق قۇجات اينالىمىندا, اقپاراتتىق جۇيەلەردە, زاڭنامالىق ۇدەرىستەردى ۇيىمداستىرۋدا جانە اپپارات قىزمەتىنىڭ وزگە دە سالالارىندا جاڭا تاسىلدەردى قولدانۋ ماسەلەلەرىن تالقىلادى.
