عىلىم جانە جوعارى ءبىلىم مينيسترلىگىنىڭ حابارلاۋىنشا, «قازىنا» ورتالىعى ينستيتۋتتىڭ عىلىمي-ينفراقۇرىلىمىن كەڭەيتۋ, ءبىلىم الۋشىلاردىڭ عىلىمي-زەرتتەۋ جۇمىستارىنا قىزىعۋشىلىعىن تۋدىرۋ جانە ەتنومادەني-تانىمدىق كوزقاراستارىن جەتىلدىرۋ, عىلىمي-زەرتتەۋ جۇمىستارىنىڭ ساپاسى مەن كوكەيكەستىلىگىن ارتتىرۋ ماقساتىندا اشىلدى. سونداي-اق عىلىمي-زەرتتەۋ, زاماناۋي-تاجىريبەلىك, اقپاراتتىق قىزمەت باعىتتارىن قامتيتىن ورتالىق تا ىزدەنۋشىلەر ۇلتتىق تاربيە ءىسىنىڭ جەتىستىكتەرىن ناقتى جاعدايدا پايدالانۋعا ۇيرەنەدى.
ورتالىقتىڭ اشىلۋىنا Altynsarin institute-نىڭ دوتسەنتى, ەتنوپەداگوگيكا پانىنەن ۇزاق جىلدار بويى ستۋدەنتتەرگە ءدارىس وقىعان زەينەتكەر-ۇستاز پەرنەكۇل احمەتوۆا, وبلىستىق دالا ولكەسى تاريحى مۇراجايىنىڭ ديرەكتورى راۋان ابدۋللاجان ۇلى, عىلىمي-زەرتتەۋ ورتالىعىنىڭ جەتەكشىسى جانار بايسەيتقىزى جانە ينستيتۋتتىڭ پروفەسسور-وقىتۋشىلار قۇرامى مەن ستۋدەنتتەرى قاتىستى.
اشىلۋىندا ءسوز العان ارداگەر پەداگوگ پ.احمەتوۆا: «ۇلت رۋحانياتىنىڭ الاسارماس بيىگىن ناسيحاتتايتىن ورتالىقتىڭ بولاشاعىنان ۇلكەن ءۇمىت كۇتەمىز. ءبىلىم الۋشى مەن ءبىلىم بەرۋشىلەردىڭ ۇلتتىق رۋح-جىگەرىن ۇشتايتىن, پاتريوتتىق سەزىمىنە قوزعاۋ سالاتىن, ۇلاعاتتى وي مەن رۋحاني قورەك بەرەتىن الاڭعا اينالاتىنىنا سەنىم بىلدىرەمىن. سەبەبى ءبىزدىڭ مەملەكەتىمىزگە تەك ءبىلىمدى ازامات ەمەس, وتانسۇيگىش, ۇلتجاندى پەرزەنت كەرەك. بولاشاق ۇستازداردى دايارلايتىن وقۋ ورنىندا وسىنداي ورتالىقتىڭ اشىلعانى قۋانتادى», دەدى.
الداعى ۋاقىتتا اتا-بابادان قالعان قازىنالارىمىزدى زەرتتەۋگە, زەرتتەۋلەر ناتيجەسىن پەداگوگيكا مەن پسيحولوگيادا پايدالانۋعا باعىتتالعان «قازىنا» ەتنوپەداگوگيكا جانە ەتنوپسيحولوگيا ورتالىعىنىڭ ۇجىمى ارقالىق قالاسىنىڭ مادەني-اعارتۋ وشاقتارىمەن قويان-قولتىق جۇمىس ىستەۋدى جوسپارلاپ وتىر.
