«ازىرگە, قارعىن سۋدى قارسى الۋعا ازىرلىك ويداعىداي ءجۇرىپ جاتىر. «قازگيدرومەتتىڭ» مالىمەتىنە قاراعاندا, بىلتىر كۇزدەگى توپىراقتىڭ ىلعالدىلىعى قالىپتاعىدان 67 پايىزعا ارتىق بولىپتى. بۇل قار سۋىنىڭ توپىراققا ءسىڭۋىن ازايتادى, سوندىقتان تاۋەكەل ايماعىنداعى اۋىلداردى سۋ باسىپ قالۋ قاۋپى بار. ءبىز تۇرعىندارى 5 مىڭ ادامنان اساتىن 1 729 اۋلاسى بار وسىنداي 87 ەلدى مەكەندى قازىر ەسەپكە الىپ, ولارعا جەدەل كومەك ۇيىمداستىرۋدى جوسپارلاپ وتىرمىز», دەدى ەرىك تەمىرحان ۇلى.
كەيىنگى جىلدارى تاسقىنعا قارسى امالدار بىزدە جاقسى جۇرگىزىلىپ كەلەدى. تاۋەكەلى زور ايماقتاردا ورنالاسقان 175 ەلدى مەكەننىڭ ماڭىنا 131 شاقىرىمعا سوزىلاتىن ورلار تۇرعىزىلعان. جەتى شاقىرىمداي جەرگە ارتىق سۋ جيناقتالاتىن دامبالار قازىلعان. وبلىستىڭ اۆتوموبيل جولدارىندا سۋ وتكىزەتىن 97 وتكەل تازالانعان. 60 شاقىرىمداي جەرگە درەناجدىق جۇيەلەر تارتىلعان. كولدەر مەن وزەندەردىڭ جاعالاۋلارى كوتەرىلگەن, سونىمەن بىرگە وزەندەردەگى بوگەتتەر تازالانعان.
«وسى جۇمىستاردىڭ ءبارى تاسقىننىڭ الدىن الۋعا مۇرسات بەرۋگە ءتيىستى. ءبىز بۇل جۇمىستاردى ءالى دە تىڭعىلىقتاي تۇسەمىز. جەدەل قارسى تۇرۋ جۇمىستارىنا تجد, پوليتسيا دەپارتامەنتى, ۇلتتىق ۇلان قاتارىنان 472 ادام مەن 134 تەحنيكا تارتىلىپ وتىر. ناقتى ايتار بولساق, تجد-دان – 250 ادام مەن 50 بىرلىك تەحنيكا, ۇلتتىق ۇلاننان – 60 ادام مەن 3 بىرلىك تەحنيكا, پوليتسيا دەپارتامەنتىنەن 162 ادام مەن 81 بىرلىك تەحنيكا دايىندىق ساپىندا تۇر. سونىڭ ىشىندە تجد قۇرامىندا حالىقتى كوشىرۋ مەن ەۆاكۋاتسيالاۋعا ارنالعان بوگەتسىز جۇرە الاتىن 10 ۆاحتوۆكا, 6 باتپاق كەشكىش تەحنيكا بار. سوڭعىنىڭ ەكەۋى پەتروپاۆلدا, قالعانى ەسىل, تيميريازەۆ, اقجار, مۇسىرەپوۆ اۋداندارىنا ءبىر-بىردەن بەرىلگەن. جەتى جۇزگىش قۇرالدار, 78 موتوپومپا, 370 سۋ وتكىزبەيتىن كوستيۋمدەر, 400 ادام سىياتىن 21 شاتىرىمىز دا دايىن», دەدى تجد باستىعى.
قۇتقارۋ كۇشتەرى بۇرناعى جىلدارداعى تاجىريبەنى ەسكەرىپ, بارىنشا قاۋىپتى ايماقتارعا شوعىرلاندىرىلعان. 24 قاڭتاردان باستاپ وبلىستا دايىندىقتىڭ جەتىلدىرىلگەن رەجىمى ەنگىزىلدى. تاسقىنعا قارسى كۇرەستى وبلىس اكىمى ءوز باقىلاۋىنا الىپ وتىر. تاسقىن بىلتىر قىركۇيەكتە عانا تاعايىندالىپ, مۇندايدى ءالى كورمەگەن وبلىس اكىمىن دە, تۇركىستان وبلىسىنان سول ۋاقىتتا كەلگەن تجد باستىعىن دا سىناقتان وتكىزبەك. جىل باسىنان بەرى وبلىس اكىمى ع.نۇرمۇحامبەتوۆ تاسقىنعا قارسى تۇرۋ شتابى مەن توتەنشە جاعدايلاردى جويۋ جونىندەگى كوميسسيانىڭ بىرنەشە جۇمىس وتىرىسىن وتكىزىپ, ءتيىستى تاپسىرمالار بەردى. وندا تاسقىننىڭ بارىسى مەن قارقىنىن باقىلاۋعا جانە قۇتقارۋ جۇمىستارىنا «قازاۆياقۇتقارۋ» اق تىكۇشاقتارىن تارتۋ ماسەلەسى دە قارالىپ, بۇل جۇمىستارعا 130 ملن تەڭگە ءبولىندى. پيلوتسىز ۇشاتىن اپپاراتتاردى دايىندىق ساپىنا قويۋ تاپسىرىلدى. اۋداندىق اكىمدىكتەردىڭ بالانسىندا وندايدىڭ 9-ى بار, ال بەسەۋى – تجد بالانسىندا.
ايىرتاۋ, ع.مۇسىرەپوۆ جانە ءۋاليحانوۆ اۋداندارىندا شاعىن وزەندەردىڭ اعىن سۋلارىن بوگەيتىن سەڭدەردى جارۋ ءۇشىن 11 ملن تەڭگەگە جارىلعىش زاتتار الۋ مەن مامانداردى تارتۋ قاراستىرىلعان.
جەرگىلىكتى اتقارۋ ورگاندارى دا 1 484 ادام كۇشى, 1 127 بىرلىك تەحنيكا, 71 بىرلىك سۋ ايدايتىن تەحنيكا جانە 297 موتوپومپادان تۇراتىن تاسقىنعا قارسى كۇشتەردى ازىرلەپ وتىر. بۇگىنگى تاڭدا اۋىلدىق وكرۋگتەر ءۇشىن تاعى دا 58 موتوپومپا الۋ جوسپارلانعان. سونىمەن بىرگە اۋىر ينجەنەرلىك تەحنيكالاردى قوسىمشا جالعا الۋ ءۇشىن كونكۋرستىق پروتسەدۋرالار جۇرگىزىلىپ جاتىر.
قازىرگى كەزدە پەتروپاۆل قالاسى مەن اۋدان اكىمدەرى سۋدى بوگەيتىن 9 مىڭ توننا ينەرتتى ماتەريالدار, 38 مىڭ توننا قاپتار جانە 87 توننا ججم ازىرلەپ وتىر. وبلىس بويىنشا ەۆاكۋاتسيالانعان تۇرعىنداردى قابىلدايتىن 242 قابىلداۋ بەكەتتەرى دايىندالعان. اكىمدىكتەر ولارعا تاماق ونىمدەرى جانە باسقا دا قاجەتتى زاتتاردى جەتكىزەتىن فيرمالارمەن كەلىسىمشارتتار جاساسىپ قويدى. دەنساۋلىق ساقتاۋ باسقارماسى قاجەتتى مەديكامەنتتەردى جەتكىزۋ جولدارىن انىقتاعان.
تاسقىننىڭ الدىن الۋ شارالارى ەلدى مەكەندەردىڭ ىشىندە دە جۇرگىزىلىپ جاتىر. جىل باسىنان بەرى 696 مىڭ تەكشە مەتر قار شىعارىلدى. بىراق بۇل ىستە سىلبىرلىق بارى بايقالادى. اسىرەسە پەتروپاۆل قالاسىنداعى جەكەمەنشىك ۇيلەردىڭ تۇسىنداعى تاۋ بولىپ اۋلالاردان شىعارىلعان قار ءالى كۇنگە تولىق تاسىلىپ بولعان جوق. كۇن كۇرت جىلىنىپ كەتسە, بۇلاردان كەلەتىن زيان از ەمەس.
سولتۇستىك قازاقستان وبلىسى
