پەتروپاۆل پوليتسەيلەرى ينتەرنەت الاياقتىقتىڭ كوبەيۋىنە جول بەرمەس ءۇشىن ءتۇرلى شارا جاساپ ءجۇر. قالالىق پوليتسيا باسقارماسىنىڭ ءبىرىنشى ءبولىمىنىڭ قىزمەتكەرلەرى ساۋدا ۇيلەرىندە جادىنامالار تاراتىپ, ادامداردى الداپ-ارباۋدىڭ نەگىزگى سحەمالارىن كورسەتىپ, ولاردان قالاي ساقتانۋدى ءتۇسىندىرىپ كەلەدى.
الاياقتار دا كەيىنگى كەزدەرى بەلسەندى «جۇمىس ىستەپ» جاتىر. تەك جىل باسىنان بەرى ءبىرىنشى پوليتسيا ءبولىمىنىڭ اۋماعىندا عانا جەلىلىك الاياقتىقتىڭ 30 فاكتىسى تىركەلدى. بۇل وتكەن جىلدىڭ سايكەس كەزەڭىمەن سالىستىرعاندا ەكى ەسە كوپ. قىلمىسكەرلەر «بانكتەن قوڭىراۋ شالۋ», ءوزىن «پوليتسيا قىزمەتكەرىمىن» دەپ تانىستىرۋ سياقتى سحەمالاردى ءجيى قولدانادى. كەيىنگى كەزدەرى «ۇيالى بايلانىس وپەراتورى» بولىپ قوڭىراۋ سوعۋ «ستسەناريى» پايدا بولدى. ولاردىڭ بارلىعى ادامداردى ۇرەيلەندىرىپ, ۇلكەن نەسيە الۋعا كوندىرۋگە جانە اقشانى بەلگىلى ءبىر «قاۋىپسىز شوتقا» اۋدارۋعا – ءىس جۇزىندە الاياقتاردىڭ قولىنا تۇسىرۋگە باعىتتالعان. جوعارىدا ايتقان پەتروپاۆلدىق ءدال وسى سحەمادان زارداپ شەككەن.
«ەگەر بىرەۋ ءسىزدىڭ شوتىڭىزعا قاۋىپ ءتونىپ تۇر, ۇيالى بايلانىس ءنومىرى ءوشىرىلۋى مۇمكىن نەمەسە م ۇلىككە تىيىم سالىنادى دەپ قورقىتاتىن بولسا, اسىعىس شەشىم قابىلداماڭىز. حابارلانعان اقپاراتتى رەسمي ارنالار ارقىلى قايتا تەكسەرىڭىز. قوڭىراۋ شالۋشىدان ونىڭ قالالىق ءنومىرىن سۇراپ, اقپاراتتى ۇيىمنىڭ رەسمي تەلەفونى ارقىلى حابارلاسىپ تەكسەرۋگە بولادى. الاياقتار قالالىق ءنومىر بەرمەيدى. كۇدىكتىنىڭ قوڭىراۋىن العان سوڭ, سويلەسۋدى دەرەۋ توقتاتىپ, «102» ارناسىنا قوڭىراۋ شالىڭىز», دەيدى ءبىرىنشى پوليتسيا ءبولىمىنىڭ باسشىسى, پوليتسيا پودپولكوۆنيگى تىلەگەن ءالجانوۆ.
«سونىمەن قاتار قانداي جاعداي بولماسىن نومىرلەردى, PIN-كودتاردى جانە بانك كارتالاردىڭ CVV-كودتارىن, SMS ارقىلى كەلەتىن كودتاردى ەشكىمگە بەرمەڭىز. ءۇشىنشى تۇلعالاردىڭ قىسىمىمەن تەلەفوندارعا قاشىقتان قاتىناۋعا مۇمكىندىك بەرەتىن «AnyDesk», «TeamViewer» جانە باسقا وسى سياقتى باعدارلامالاردى ورناتپاڭىز, – دەيدى مامان. – سەبەبى بۇل باعدارلامالار الاياقتارعا ازاماتتاردىڭ قۇرىلعىسىن باسقارۋعا جانە ونىڭ اتىنان وپەراتسيا-
لار جاساۋعا مۇمكىندىك بەرەدى».
الاياقتار بايلانىسقا شىققاندا قىراعىلىق تانىتىپ جۇرگەن ادامدار دا بار. وبلىستىڭ ءبىر تۇرعىنى پوليتسياعا كەلىپ, قايىن اتاسىن الاياقتاردىڭ ارباۋىنان قالاي قۇتقارعانىن ايتىپ بەرگەن. «قايىن اتاممەن ءبىر شارۋالار بويىنشا كەزدەسۋگە كەلىسكەن ەدىك. ۋادەلەسكەن جەرگە كەلسەم ول تەلەفون ارقىلى الدەبىرەۋمەن ەمەن-جارقىن سويلەسىپ وتىر ەكەن. تۇتقانىڭ ار جاعىنداعى ەر ادام كۇدىك تۋعىزاتىن ۇسىنىستار ايتىپ جاتتى. قايىن اتام: «مىنە شىقتىم, سالدەن سوڭ كەلەمىن. تەرمينال «Dostyq mall» ساۋدا-ساتتىق ورتالىعىندا ما؟ قازىر جەتەمىن», دەگەن سوزدەردى جەدەل ايتىپ, ماعان سول ورتالىققا جەتكىزۋدى ءوتىندى. مەنىڭ «ول كىم؟» دەگەن سۇراعىما: «مەن پوليتسياعا الاياقتى ۇستاۋعا كومەكتەسىپ جاتىرمىن. قازىر اقشا اۋدارامىن, كەيىن ونى بىردەن استانادا قولعا تۇسىرەدى», دەپ ءماز بولىپ تۇر. سويتسەم, ونىڭ تەلەفونىنا الدەبىرەۋلەر حابارلاسىپ, «استانا قالاسىنىڭ پوليتسيا دەپارتامەنتىنەنبىز» دەگەن ەكەن. بانكتەگى ەسەپشوتىنا الاياقتار قول جەتكىزگەنىن, ەگەر قايىن اتام نەسيە السا, الاياقتى ۇستاۋعا بولاتىنىن ايتقان. مەن: «بۇل – الاياقتار! ساق بولىڭىز. اڭگىمەنى دوعارىپ, تۇتقانى قويا سالىڭىز», دەسەم, قايىن اتام تىڭدايتىن ەمەس. ەگەر مەنىمەن كەزدەسپەگەندە, نەسيە الىپ, الاياقتاردىڭ قارماعىنا تۇسەيىن دەپ تۇر», دەيدى ول.
«قايىن اتامنىڭ قولىنان تەلەفونىن زورعا الىپ, الگىمەن سىپايى سويلەسە باستادىم. «ەسىمىڭىز, شەنىڭىز جانە قالالىق جۇمىس تەلەفونىڭىزدى ايتىڭىزشى», دەگەن ەدىم, ار جاقتاعى جاس جىگىت باستىرمالاتىپ: «ول نە ءۇشىن كەرەك؟ ونى قايتەسىز؟» دەگەن سۇراقتارىن جاۋدىردى. مەن دە قالىساتىن ەمەسپىن. «سەندەردى تەكسەرۋ ءۇشىن», دەپ ەدىم, جارقىن شىققان داۋىس بىردەن ءوشىپ, تۇتقانى قويا سالدى. قايىن اتاما الاياقتاردىڭ ءىس-ارەكەتتەرىنىڭ قانداي بولاتىنىن ايتىپ بەرىپ, وعان حابارلاسقان ءنومىردى قايتا تەرۋدى ۇسىندىم. ء«نومىر ءبىزدىڭ جۇيەمىزدە تىركەلمەگەن» دەگەن داۋىستى ەستىگەننەن كەيىن عانا ول كىسى ءوزىن الاياقتاردىڭ الداپ سوقپاق بولعانىنا كوزى جەتتى», دەيدى جىگىت.
وكىنىشكە قاراي, مۇنداي مىسالدار كوپ. سوندىقتان «بانكتىڭ قاۋىپسىزدىك قىزمەتىنەنبىز», «بايلانىس وپەراتورىمىن», «پوليتسيادان قىلمىستىق ىسكە قاتىستى حابارلاسىپ تۇرمىن» دەگەن قوڭىراۋلارعا سەنبەگەن ءجون. وبلىستىق پد ءباسپاسوز قىزمەتىنىڭ وكىلى يگور مەرتسالوۆ: «ەستەرىڭىزدە بولسىن, پوليتسيا قىزمەتكەرلەرى تەلەفون ارقىلى جەدەل ارەكەتتەر جۇرگىزبەيدى. ادامداردان تەك ارنايى شاقىرتۋ قاعازىن جىبەرگەن سوڭ جاۋاپ الۋعا قۇقىلى. قارجىلىق وپەراتسيالارمەن بايلانىستى كەز كەلگەن اقپاراتتى تەك رەسمي ارنالار ارقىلى تەكسەرىپ العان ءجون», دەيدى.
پەتروپاۆل
