فوتو: مينيسترلىكتىڭ ءباسپاسوز قىزمەتى
قازاقستان مەن ورتالىق ازياداعى سۋ رەسۋرستارىن ءتيىمدى پايدالانۋ مەن قورعاۋ ماسەلەلەرى تالقىلانعان فورۋمدا سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ەلىمىزدەگى سۋ سالاسىن ترانسفورماتسيالاۋ باعىتىندا جۇرگىزىلىپ جاتقان نەگىزگى جۇمىستار تۋرالى بايانداپ بەردى. ۆەدومستۆو باسشىسى ەلىمىزدەگى سۋ تاپشىلىعى پروبلەماسىن شەشۋ ءۇشىن ەكى نەگىزگى قۇجات - جاڭا سۋ كودەكسى جانە ۇكىمەت قابىلداعان سۋ رەسۋرستارىن باسقارۋ جۇيەسىن دامىتۋدىڭ 2030 جىلعا دەيىنگى تۇجىرىمداماسى ازىرلەنگەنىن اتاپ ءوتتى.
«جاڭا سۋ كودەكسىندە سۋ ۇنەمدەۋ ماسەلەسى ماڭىزدى ءرول اتقارادى. اتاپ ايتقاندا, سۋ رەسۋرستارىن ۇتىمدى پايدالانۋعا, سۋ ۇنەمدەۋ تەحنولوگيالارى مەن سۋدى قايتا پايدالانۋ جۇيەسىن قارقىندى ەنگىزۋگە, سونداي-اق جەراستى اۋىز سۋلارىن ماقساتسىز پايدالانۋعا جول بەرمەۋگە باسىمدىق بەرىلىپ وتىر. سۋ سالاسىنداعى بۇزۋشىلىق ءۇشىن جاۋاپكەرشىلىك زاڭ دەڭگەيىندە قاتاڭداتىلادى. سونداي-اق كودەكسكە اۋىز سۋدىڭ ساپاسىن جاقسارتۋعا قويىلاتىن تالاپتار ەنگىزىلدى», دەدى نۇرجان نۇرجىگىتوۆ.
مينيستر اۋىل شارۋاشىلىعىندا سۋ ۇنەمدەۋ ماسەلەسىنە جەكە توقتالدى. ۆەدومستۆو شارۋالاردى سۋ ۇنەمدەۋ تەحنولوگيالارىن ورناتۋعا ىنتالاندىرۋ ءۇشىن اۋىل شارۋاشىلىعى مينيسترلىگىمەن بىرلەسىپ سۋ ۇنەمدەۋ جۇيەلەرىن ورناتۋ جانە ساتىپ الۋ شىعىندارىن سۋبسيديالاۋ ۇلەسىن 50%-دان 80%-عا دەيىن ۇلعايتۋ بويىنشا جۇمىس جۇرگىزىپ جاتىر.
«مەملەكەت باسشىسىنىڭ تاپسىرمالارىن ورىنداۋ ءۇشىن ۇكىمەت سۋ رەسۋرستارىن باسقارۋ جۇيەسىن دامىتۋدىڭ 2030 جىلعا دەيىنگى تۇجىرىمداماسىن بەكىتتى. ماڭىزدى قۇجات سۋ قورعاۋ قۇرىلىستارىن سالۋ جانە رەكونسترۋكتسيالاۋ, گيدروتەحنيكالىق قۇرىلىستاردى, يرريگاتسيالىق جۇيەلەردى رەكونسترۋكتسيالاۋ, سۋ ۇنەمدەۋ تەحنولوگيالارىن تسيفرلاندىرۋ جانە ەنگىزۋ جونىندەگى بىرقاتار شۇعىل شارانى ىسكە اسىرۋدى كوزدەيدى. مينيسترلىك كەشەندى جوسپاردىڭ ناتيجەسىندە ەل ەكونوميكاسىن كەپىلدى سۋمەن قامتاماسىز ەتۋگە, توتەنشە جاعدايلاردىڭ الدىن الۋعا جانە تاسىمالداۋ كەزىندە سۋدىڭ ءونىمسىز شىعىنىن 25%-عا دەيىن ازايتۋعا نيەتتى», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
نۇرجان نۇرجىگىتوۆ «Global water» فورۋمى سۋ سالاسىنداعى ماسەلەلەر بويىنشا تاجىريبە, ءبىلىم جانە يدەيا الماسۋ, سونداي-اق ءتۇرلى مۇددەلى تاراپتار اراسىندا سەرىكتەستىك بايلانىستار مەن ىنتىماقتاستىق ورناتۋ ءۇشىن بىرەگەي الاڭعا اينالاتىنىنا سەنىم ءبىلدىردى. سونداي-اق مينيسترلىك وكىلدەرى فورۋم اياسىندا ايتىلعان ۇسىنىستاردى نازارعا الىپ, جۇمىس بارىسىندا مىندەتتى تۇردە زەردەلەيتىنىن مالىمدەدى.
