ورال قالالىق پوليتسيا باسقارماسىنا قاراستى شاعان پوليتسيا ءبولىمى جەدەل-كريميناليستيكالىق توبىنىڭ كريميناليسى رۋسلان دوسقاليەۆ تەرەزەدە قالعان ساۋساق ىزدەرى ارقىلى پاتەر ۇرلىعىن اشتى.
وقيعا 2023 جىلى قىركۇيەك ايىندا بولعان ەدى. سول كەزدە 102 وپەراتورىنا حابارلاسقان جەرگىلىكتى تۇرعىن سارىمايداي ساقتاپ جۇرگەن قوماقتى قارجىسى سەيفتەن ۇرلانعانىن حابارلاعان. وقيعا ورنىنا دەرەۋ جەدەل-تەرگەۋ توبى جەتتى.
پوليتسيانىڭ انىقتاۋىنا قاراعاندا, بەلگىسىز بىرەۋ ورال قالاسىنداعى تۇرعىلىقتى ۇيلەردىڭ بىرىنە تەرەزەسىن سىندىرىپ كىرىپ, سەيفتەن 10 مىڭ دوللاردى جانە 3 ملن 700 مىڭ تەڭگە اقشانى ۇرلاپ كەتكەن. ارينە, بۇل جەردە ناعىز ماماننىڭ قىراعىلىعى, كاسىبي شەبەرلىگى قاجەت ەدى. پوليتسيا مايورى ر.دوسقاليەۆ وقيعا ورنىن, قىلمىسكەردىڭ كەلىپ-كەتۋ جولىن جان-جاقتى تەكسەرىپ شىقتى. ناتيجەسىندە, ۇرى كىرگەن تەرەزەدەن ساۋساق ىزدەرىن تاپتى.
ءبىر قىزىعى, كريميناليستيكالىق ەسەپ بازاسىنداعى ۇلگىلەر ارقىلى كۇدىكتىنىڭ كىم ەكەنى انىقتالدى. ول 33 جاستاعى وبلىس ورتالىعىنىڭ تۇرعىنى ەكەن.
جۇرگىزىلگەن جەدەل ىزدەستىرۋ ءىس-شارالارى ناتيجەسىندە تاۋلىككە جەتپەيتىن ۋاقىت ىشىندە كۇدىكتى ۇستالدى. باۋكەسپە ۇرلانعان اقشانى تۇگەل جۇمساپ ۇلگەرمەپتى. قالعان قارجى تاركىلەنىپ, زاڭدى يەسىنە قايتارىلدى.
جاقىندا ورال قالالىق قىلمىستىق سوتىنىڭ شەشىمىمەن كۇدىكتى سوتتالىپ, بەس جىلعا باس بوستاندىعىنان ايىرىلدى.
باتىس قازاقستان وبلىسى
