فوتو: ijf.org
– بيىلعى جىلى قاتىسقان ەكى بىردەي ايتۋلى دودادا قولا مەدال يەلەندىڭ. قاڭتار ايىندا پورتۋگاليادا وتكەن گران-پري الامانىندا ۇشتىككە ەنىپ ەدىڭ. اراعا از كۇن سالىپ ازەربايجاندا دا جۇلدەلى بولدىڭ. جاراقاتىڭنان قۇلان تازا ايىعا الدىڭ با؟
– تولىققاندى جازىلدىم دەپ ايتۋعا ءالى ەرتە, ءتىپتى وتا جاساتۋ كەرەك. وعان ۋاقىت وتە تىعىز, قىر استىندا پاريج وليمپياداسى تۇر. سودان كەيىن عانا وتا جاساتپاسام, قازىر ۇلگەرمەيمىن.
– دەمەك, وليمپيادا ويىندارىنا جولداما الساڭ, جاراقاتپەن كۇرەسكە تۇسەسىڭ بە؟
– باسقا قانداي امال بار؟ قىرسىق قىلعاندا يىعىمنىڭ ءبىر ەمەس, ەكى جەرىنەن ەتى سوگىلىپ, ءسىڭىرى جىرتىلىپ كەتىپ وتىر. قولدان كەلەر ءبىر عانا قايران – يىقتىڭ بۇلشىق ەتىن شىنىقتىرىپ, جاراقاتتى ۇلعايتىپ الماۋ عانا. تۋرنيككە تارتىلسام, قاقساپ اۋىرادى.
بىلتىرعى جىلدىڭ مامىر ايىندا قاتار استاناسى دوحادا وتكەن الەم چەمپيوناتىندا موڭعول قىزىمەن كۇرەسكەندە جاراقاتتاپ الدىم. قارسىلاسىم يىعىمدى جانشي قۇلاعاندا مەرتىكتى. سودان بەرى ەمدەلىپ كەلەمىن. يىعىمنىڭ جاراقاتىن اسقىندىرىپ الماي باپپەن جاتتىعۋ جاساتۋدىڭ ناتيجەسىندە دوداعا قاتىسىپ ءجۇرمىن.
– باكۋدە وتكەن Grand Slam تۋرنيرىندە جاراقاتىڭ اشىلىپ كۇرەسۋگە كەدەرگى كەلتىرگەن سەكىلدى.
– ارينە, قورىنىپ تۇراسىڭ. جايشىلىقتا اۋىرماعانىمەن وقىس قيمىل جاساعاندا, بولماسا يىعىڭمەن جەر سۇزە قۇلاعاندا سىرقىراپ اۋىرادى.
– وسى سايىستا قولا مەدالعا تالاسىپ, بەلگيالىق بالۋانمەن كۇرەستىڭ. قارسىلاسىڭ تىم دورەكىلىك تانىتتى.
– ونىڭ بەلدەسۋ ءادىسى وسىنداي ءوزى. توبىقتان قاعىپ شالعانسىپ, تەپكەنى ءۇشىن ەسكەرتۋ الدى. كوزىمدى دە شۇقىپ جىبەردى. بەلگيالىق دزيۋدوشىمەن بۇعان دەيىن دە ءۇش رەت كۇرەسىپ جەڭگەنمىن, ايلاكەرلىگىن ءجىتى بىلەمىن. لۋيز پەتيتپەن ءدال وسىلاي كۇرەسۋ كەرەك. ورشەلەنىپ العا ۇمتىلىپ ءادىس جاسايمىن دەگەنىڭمەن قيىن بولادى. ۇنەمى وسىلاي ەرەجە بۇزىپ كۇرەسەتىندىكتەن تاكتيكامەن باسىم تۇسۋگە ۇمتىلدىم.
– ازىرگە الەمدىك رەيتينگتە 9-ساتىدا كەلەسىڭ. دەسە دە پاريج جولداماسى ءۇشىن باسەكەلەستىك وتە جوعارى بولىپ تۇر عوي.
– ءبىزدىڭ سالماقتا ۇزدىك بەستىكتەگى بالۋاندار تەگەۋرىندى دەپ قالعانىنا توقمەيىلسىپ قاراۋعا بولمايدى. ويتكەنى رەيتينگتە 100-ورىندا تۇرعان سپورتشى بارلىعىن جايپاپ ءوتۋى بەك مۇمكىن. كىم-كىمگە دە بارىمىزدى سالىپ دايىندىق جۇرگىزۋ قاجەت.
قازاق سپورتىنىڭ تاريحىندا دزيۋدو كۇرەسىنەن ايەلدەر اراسىندا وليمپيادا ويىندارىنىڭ مەدالىن ولجالاعان جەرگىلىكتى بالۋان جوق. راس, 2021 جىلى توكيو تورىندە گالبادراح وتگونتسەتسەگ قولا جۇلدەگەر اتاندى. موڭعوليادان شاقىرتقان بالۋاننىڭ جەتىستىگى وراسان. بىراق قازاق قىزدارى اراسىندا دزيۋدو كۇرەسىنەن وليمپيادانىڭ مەدالىن يەلەنگەن ازىرگە ەشكىم بولماي تۇر. وسى ولقىلىقتى بۇتىندەگىم كەلەدى.
– بىزدە سپورتتىق مەديتسينانىڭ دامۋى كوش كەيىن قالعانى دا ناتيجەگە ايتارلىقتاي اسەر ەتەدى...
– سپورتتىق مەديتسينانىڭ قاۋقارىن كوتەرۋ ماسەلەسى قوزعالىپ, سەڭ كوبەسى سوگىلدى. ءبىز قاجەتتى دارۋمەننىڭ كەيبىرىن ءوز اقشامىزعا ساتىپ الامىز. مينيسترلىكتەن دە بەرىلەدى. سپورتتىق مەديتسينانى دامىتپاي ناتيجەگە ۇمتىلۋ بوس اۋرەشىلىك. الەم مۇنى ايقىنداپ وتىر. بىزدە ياعني دزيۋدودان قىزدار قۇراماسىندا ماسساجيست, دارىگەر دە تۇراقتى ەمەس, ءار وقۋ-جاتتىعۋ جيىنى سايىن اۋىسىپ وتىرادى. ەندى تۇراقتى مامان بەكىتەتىن شىعار. ەلىمىزدە سپورتتىق مەديتسيناعا كوڭىل ءبولىپ, شارۋانى قولعا الۋى قۋانتادى. سونىڭ ءبىر ايعاعى رەتىندە ۇلتتىق قۇراماعا فرانتسيادان شاقىرتقان مامانداردىڭ بىزگە وراسان پايداسى ءتيىپ جاتىر. فيزيوتەراپەۆتتىڭ نۇسقاۋىمەن ەم-دوم الىپ, فيزيكالىق الەۋەتىمىزدى نىعايتىپ كەلەمىز. ەۋروپادان كەلگەن ماماندار ەڭبەگى الداعى ۋاقىتتا ناتيجەسىن بەرەدى دەپ ويلايمىن.
