اتالعان جارىستا قازاقستان قۇراماسى تولاعاي تابىسقا قول جەتكىزدى. اسىرەسە كورەرمەندەر ايبوتا ەرتايقىزىنىڭ ايشىقتى ونەرىنە تامساندى. وسىدان ەكى جىل بۇرىن ءدال وسى دودادا 19 جاستاعى قازاق قىزى ءتۇرلى-ءتۇستى مەدالداردىڭ ارقايسىسىن ءبىر-بىردەن يەلەنگەن ەدى. ال ونىڭ بيىلعى ناتيجەسى ودان دا كەرەمەت بولدى. ەرتايقىزى دوپ, تاسپا جانە ۇرشىقپەن ونەر كورسەتۋدە تەڭدەسسىز دەپ تانىلىپ, التىننان القا تاقتى. كوماندالىق ارىپتەسىنىڭ جەڭىستى جولىن ەريكا جايلاۋوۆا جالعاستىردى. 16 جاستاعى اسا دارىندى سپورتشى «شىعىرشىق» جاتتىعۋىندا الدىنا جان سالمادى. كوپسايىستىڭ قورىتىندىسى بويىنشا ايبوتا كۇمىس (125,2 ۇپاي) جانە ەريكا قولا جۇلدەنى (122,25 ۇپاي) ولجالادى. ال ميلانا پارفيلوۆا ءتورتىنشى ورىنعا تابان تىرەسە, زەرە باقىتجانقىزى مەن ايىم مەيىرجانوۆا التى مەن جەتىنشى ساتىلارعا جايعاستى.
سپورتتىق گيمناستشىلار دا ءدۇبىرلى دودالاردا دارالانىپ جاتىر. كۇنى كەشە عانا مىسىردىڭ باس شاھارى كايردە وتكەن الەم كۋبوگىنىڭ كەزەڭدىك سايىسىندا «ات» جاتتىعۋى بويىنشا سىنعا تۇسكەن زەينوللا ىدىرىسوۆ قولا مەدالدى ەنشىلەدى.
