ىشكى ىستەر مينيسترلىگى ارىپتەستەرىمەن جۇمىس ورنىندا تۋعان كۇنىن نەمەسە قىزمەت بويىنشا جوعارىلاۋدى اتاپ وتكەندە داستارحانعا الكوگول قويسا, ايىپپۇل تولەيدى نەمەسە اكىمشىلىك قاماۋعا الىناتىنىن مالىمدەدى.
قوعامدىق ورىنداردا ىشىمدىك ءىشۋ اكىمشىلىك قۇقىق بۇزۋشىلىق بولىپ سانالادى. ال جۇمىس ىستەيتىن ۇيىمدار مەن كاسىپورىنداردىڭ كوپشىلىگى - قوعامدىق ورىندار.
ءىىم بەرگەن اقپاراتقا سايكەس, قوعامدىق ورىندارعا ءبىلىم بەرۋ جانە دەنساۋلىق ساقتاۋ ۇيىمدارى, كىتاپحانالار مەن مۇراجايلار, مەملەكەتتىك ورگانداردىڭ مەكەمەلەرى جاتاتىنىن ايتتى. سونىمەن قاتار اكىمشىلىك قۇقىق بۇزۋشىلىق تۋرالى كودەكستىڭ 440-بابىنا سايكەس, الكوگولدىك ىشىمدىكتى ساتۋعا رۇقسات ەتىلگەن ساۋدا جانە قوعامدىق تاماقتانۋ ۇيىمدارىنان باسقا جەرلەردە: كوشەدە جانە باسقا دا قوعامدىق ورىنداردا ىشسە نەمەسە ماس بولسا, وعان بەس ايلىق ەسەپتىك كورسەتكىش مولشەرىندە ايىپپۇل سالىنادى (2024 جىلى 18 460 تەڭگە).
اكىمشىلىك جازا قولدانىلعاننان كەيىن ءبىر جىل ىشىندە قايتالانسا, ون ايلىق ەسەپتىك كورسەتكىش مولشەرىندە ايىپپۇل سالىنادى (2024 جىلى 36 920 تەڭگە) نەمەسە بەس تاۋلىككە دەيىنگى مەرزىمگە اكىمشىلىك قاماۋعا الىنادى.
- وسى باپ بويىنشا اكىمشىلىك ءىس قوزعاۋ ءۇشىن جەكە نەمەسە زاڭدى تۇلعانىڭ ءوتىنىشى تالاپ ەتىلمەيدى, – دەپ ناقتىلادى ءىىم.
