باعدارلاماعا «وتباسى بانك» سالىمشىلارى, ونىڭ ىشىندە تۇرعىن ءۇي كەزەگىندە تۇرعان ازاماتتار قاتىسادى.
باعدارلاما تالاپتارى مىناداي:
- ۇمىتكەردىڭ جيناق شوتى ەڭ كەمى 18 ايلىق بولۋى كەرەك;
- ءوتىنىم بەرۋ ساتىندە دەپوزيتتەگى جيناق سوماسى 1 ملن تەڭگەدەن كەم بولماۋعا ءتيىس;
- باعدارلاماعا قاتىسۋشىدا جانە ونىڭ وتباسى مۇشەلەرىندە كەيىنگى 5 جىل ىشىندە جىلجىمايتىن م ۇلىكتىڭ بولعان-بولماعانى قاتاڭ تەكسەرىلەدى;
- الماتى جانە استانا قالالارىنان تۇرعىن ءۇي الاتىن جاعدايدا سول قالالاردا تۇراقتى تىركەۋى بولۋى قاجەت;
- جوباعا 18-63 جاس ارالىعىنداعى كەز كەلگەن ازامات قاتىسا الادى, دەگەنمەن 35 جاسقا دەيىنگى جۇمىس ىستەيتىن جاستارعا باسىمدىق بەرىلەدى.
«جىل سايىن ءبىز قارجىلاندىرۋعا 150 ملرد تەڭگە باعىتتايمىز. بۇل اقشا «وتباسى بانكتىڭ» ءوز قاراجاتى ەسەبىنەن بولىنەدى, سونداي-اق قازاقستان قارجى نارىعىنان دا قارىز الىپ, قاراجات تارتۋدى جوسپارلاپ وتىرمىز. «وتاۋ» باعدارلاماسى 7 جىلعا ەسەپتەلگەن. وسى كەزەڭدە ءبىز 50 مىڭ ازاماتتىڭ تۇرعىن ءۇي ماسەلەسىن شەشۋگە كومەكتەسەمىز, دەيدى «وتباسى بانك» اق باسقارما توراعاسى ءلاززات يبراگيموۆا.
ءوتىنىم بەرۋ ۋاقىتى اياقتالعاننان كەيىن, otbasybank.kz سايتىندا قاتىسۋشىلار ءتىزىمى اۆتوماتتى تۇردە جاساقتالادى. وعان ەڭ كوپ ۇپاي جيناعاندار كىرەدى.
ۇپايلار قالاي ەسەپتەلەدى؟
- سالىم بويىنشا سىياقى مولشەرى ءۇشىن – ءاربىر 1 000 تەڭگەگە 5 بالل;
- سالىم مەرزىمى ءۇشىن – سالىمنىڭ ءاربىر جىلى ءۇشىن 5 بالل;
- تىركەلگەن نەكە ءۇشىن – 10 بالل;
- بالالاردىڭ بولۋى ءۇشىن – سانىنا قاراماستان 50 بالل.
ەگەر ۇمىتكەرلەردىڭ ۇپاي سانى بىردەي بولىپ قالسا, وندا باسىمدىق سالىم سوماسى كوبىرەك جانە جيناقتاۋ مەرزىمى ۇزاعىراق ادامدارعا بەرىلەدى. ىرىكتەۋدەن وتكەن قاتىسۋشىلار 40 جۇمىس كۇنى ىشىندە نەسيەلىك ءوتىنىم بەرە الادى. بانكتەن وڭ ماقۇلداۋ العان جاعدايدا نەسيەلىك ءوتىنىم 6 اي ىشىندە جارامدى بولادى. وسى ۋاقىت ارالىعىندا باعدارلاماعا قاتىسۋشى باسپانا تاۋىپ, نەسيە الىپ, تۇرعىن ءۇيدى ساتىپ الۋى كەرەك.
زاەم كولەمى قانداي جانە قانداي تۇرعىن ءۇي ساتىپ الۋعا بولادى؟
- الماتى مەن استاناداعى زاەمنىڭ ەڭ جوعارى سوماسى – 30 ملن تەڭگەگە دەيىن;
- قالعان وڭىرلەردە – 18 ملن تەڭگەگە دەيىن.
- تەك العاشقى نارىقتاعى تۇرعىن ءۇي – الماتى, استانا, شىمكەنت قالالارىندا جانە وبلىس ورتالىقتارىندا (ونىڭ ىشىندە قتك كەپىلدىگىمەن ۇلەستىك قاتىسۋ شارتى بويىنشا);
- باسقا ەلدى مەكەندەردە كەز كەلگەن تۇرعىن ءۇي.
باعدارلاماعا قاتىسۋشى جاڭا تۇرعىن ءۇيدى باسپانا ماركەت (otbasybank.kz) پورتالىنان عانا ساتىپ الا الادى. بۇل قىزمەت جاڭا تۇرعىن ءۇي باعدارلاماسىنىڭ باستالۋى اياسىندا تۇرعىن ءۇي باعاسىنىڭ جاساندى وسۋىنە جول بەرمەۋگە ارنالعان. ءاربىر نىسان اتالعان پلاتفورماعا ورنالاستىرىلماستان بۇرىن, تۇرعىن ءۇيدىڭ اعىمداعى نارىقتىق باعاسى نەگىزىندە قۇنىن بەكىتۋ ۇدەرىسىنەن وتەتىن بولادى. ەگەر ول نارىققا سايكەس كەلسە, وندا قۇرىلىس سالۋشىمەن شارشى مەتر باعاسىن بەلگىلەي وتىرىپ, تۇرعىن ءۇيدى ساتۋ تۋرالى كەلىسىم جاسالادى.
«وتاۋ» باعدارلاماسىنىڭ نەگىزگى شارتتارى:
- العاشقى جارنا – 20%-دان باستالادى;
- كرەديت بويىنشا مولشەرلەمە – جىلدىق 9% (جتسم 9,2%-دان باستالادى).
- نەسيە مەرزىمى – 19 جىلعا دەيىن.
«وتاۋ» باعدارلاماسىن ىسكە اسىرۋدىڭ بارىنشا اشىقتىعى ءۇشىن ونىڭ قاتىسۋشىلارىنىڭ ءتىزىمى (زاەم الۋشىلاردىڭ كەلىسىمىمەن) «وتباسى بانكىنىڭ» سايتىندا جاريالانادى. ءاربىر ادام وتىنىمدەردى ىرىكتەۋ جانە ۇپايلاردى ەسەپتەۋ ناتيجەلەرىمەن otbasybank.kz پورتالدا تانىسۋ مۇمكىندىگىنە يە.
