استانا تەاترى: ىزدەنىس پەن ىركىلىس

استانا قالاسىنداعى ق.قۋانىشباەۆ اتىنداعى قازاق مۋزىكالىق دراما تەاترى بۇل – تاۋەلسىزدىكتىڭ جەمىسى. ارقا وڭىرىندە دۇنيەگە كەلگەن جاس ونەر ۇجىمىنىڭ 20 جىلعا جۋىق تاريحىندا تىزگىنىن ۇستاعان قازاق ساحنا ونەرىنىڭ كورنەكتى تۇلعالارى وزىندىك قولتاڭبالارىن قالدىردى. قويىلىمدارى قازاق ساحناسىنا وزىندىك قۇبىلىس بولىپ ەنگەن جاقىپ وماروۆ, قادىر جەتپىسباەۆ, ءازىربايجان مامبەتوۆتەردىڭ – ارقايسىسى ۇلتتىق تەاتر تاريحىنا بەدەرلى ىزدەرىن قالدىرعان سۋرەتكەرلەر. وزدەرىنىڭ سوڭعى جىلدارى شاڭىراعىندا بولىپ جاتقان قۋانىشتارىمەن ورتاقتاسۋعا, مامانداردىڭ پىكىرىن بىلۋگە سوناۋ ارقا وڭىرىنەن استانا تەاترى الماتىعا جان-جاقتى دايىندىقپەن كەلگەن ەكەن دەسەك, ولار الماتىلىقتار نازارىنا م.اۋەزوۆتىڭ “اباي” /رەجيسسەرى ءا.ورازبەكوۆ/, “قاراگوز” /رەجيسسەرى ءا.مامبەتوۆ/, گرۋزيالىق اۆتور ا.تساگارەلي مەن كومپوزيتور گ.كانچەليدىڭ كوپشىلىككە “حانۋما” دەگەن اتپەن تانىلعان “گاماردجوبا!” مۋزىكالىق كومەدياسى /رەجيسسەرى ە.تاپەنوۆ/, دراماتۋرگ دج.پاتريكتىڭ “قىمباتتى پامەلا” كومەدياسى /رەجيسسەرى يۋ.حانينگا-بەكنازار/, ە.جۋاسبەكتىڭ “ۇيلەنۋ” /رەجيسسەرى ن.جۇمانيازوۆ/, ق.ءجۇنىستىڭ “ماحاببات مەلودراماسى” /رەجيسسەرى ب.ۇزاقوۆ/ پەسالارى ۇسىنىلدى. “اباي” سپەكتاكلىنىڭ ساحنالىق شەشىمىن سۋرەتشى د.دوسباەۆ قىسقا دا نۇسقا بەينەلەۋ ادىستەرىمەن شەشكەن. ساحنا كەڭىستىگى قوپ سوزدىلىكتەن ادا. نەگىزگى وقيعا وتەتىن ورىندا ساحنا اينالاسىن تەرەڭ دە تۇڭعيىق ەتىپ كورسەتەر قارا ماۋىتى ماتامەن كومكەرىپ, شاعىن دوڭگەلەك الاڭقاي ورناتىلعان. ورتاداعى اق دوڭگەلەك شار مەن ساحنانىڭ ەكى جاعىنان كوتەرىلىپ-تۇسىرىلەتىن ۇزىن قۇرىقتار اباي مەن جيرەنشەنىڭ ۇستانعان ومىرلىك كوزقاراستارىن, جاڭا مەن كونەنىڭ تايتالاسىن ويعا ورالتادى. رەجيسسەر وسى شاعىن كەڭىستىككە سالماقتى تراگەديانىڭ قىم-قۋات تارتىس پەن كۇرەسكە تولى وقيعالار جەلىسىن ىقشامداپ قويا بىلگەن. ارينە, بۇل تۋىندىنى بۇگىنگى تاڭدا سول جازىلعان قالپىندا تۇتاستاي ساحنادان كورسەتۋ شارت ەمەس. رەجيسسەر تاراپىنان پەسا ماتىنىندە رەداكتسيالىق قايتا قاراۋلار مەن قىسقارتۋلار, كەيبىر كەيىپكەرلەردىڭ ءتۇسىپ قالۋى سەكىلدى وزگەرىستەر بايقالادى. سوعان قاراماستان, رەجيسسەر نەگىزگى ايتپاق وي-يدەياسىن ورنىمەن, بايىپتى كورسەتە العان. رەجيسسەر ساحناعا ءبىر مەزگىلدە ءبىر ابايدىڭ ەكى بىردەي وبرازىن ەنگىزەدى. ساحنادا نەگىزگى ارەكەت ەتۋشى اباي بولعانىمەن, سپەكتاكلدىڭ كورەرمەنگە تۇيدەك-تۇيدەك وي ايتار ءتۇيىندى تۇستارىندا درامالىق وقيعا اقىننىڭ ء“تول سوزىمەن” ەنگىزىلگەن اعا اباي بەينەسى ارقىلى ىرىلەنەدى. اعا اباي ساحنادا ارەكەت ەتۋ مۇمكىندىگى مول كەيىپكەر بولىپ شىققان. وعان ءوز كوزقاراسىن بۇگىنگى – ءححى عاسىرداعى قانداستارىنا باتىرىپ-باتىرىپ ايتاتىنداي ەتىپ بەرسە دە ارتىقتىق ەتپەس ەدى. قويىلىم باستالعاندا ساحنا ورتاسىنداعى ۇلكەن دوڭگەلەك شاردىڭ تاساسىنان شىعاتىن ابايدىڭ جاستاردىڭ قارا ماتامەن بايلانعان كوزدەرىن شەشىپ, بولاشاققا, بىلىمگە جول سىلتەۋى ۇلى دانىشپاننىڭ ۇلتتىڭ رۋحاني ۇستازى رەتىندەگى كەلبەتىن تانىتادى. رەجيسسەر ءا.ورازبەكوۆتىڭ باستى كەيىپكەر ابايدىڭ تولعانىسىن, جان كۇيزەلىسىن كۇشەيتۋگە اعا ابايدى ەنگىزۋى – وتە ورىندى تابىلعان شەشىم. الايدا قويۋشى-رەجيسسەر اعا ابايدى قويىلىمنىڭ باسىنان اياعىنا دەيىن اۆانستسەنادا ءجۇرىپ-تۇرىپ, ساحنالىق وقيعاعا اراكىدىك قانا كىرىستىرۋمەن شەكتەگەن. رەجيسسەر وسى جەردە ساراڭدىق تانىتىپ, ءرولدى اتقارعان اكتەر ت.مەيراموۆتىڭ ورىنداۋشىلىق شەبەرلىگىنىڭ تولىق اشىلۋىن شەكتەپ تۇر. اكتەردىڭ بار شەبەرلىگىن سالىپ تەبىرەنە ورىنداعان وبرازى كورەرمەننىڭ كوڭىلىن قوزعايتىنداي جوعارى دەڭگەيدە جاسالعان دەسەك تە, ەكى ابايدىڭ پورترەتتىك ۇقساستىعى, بىردەي كيىم كيىسى, ءبىر ۋاقىت ارالىعىندا ءومىر سۇرەتىندىگى سپەكتاكلدىڭ ءدال بۇگىنگى كۇنمەن ۇندەسەتىن كەيبىر مۇمكىندىكتەرىنەن ايىرعان. قويىلىمنىڭ نەگىزگى سالماق جۇگى ن.وتەۋىلوۆتىڭ ابايىنا ارتىلعان. سىرت كەلبەتى كەلىستى, ايتار ءسوزى سالماقتى ابايدى اكتەر رەجيسسەر ۇسىنعان ويىن ەرەجەسىن قابىلداي وتىرىپ, وزىندىك شىعارماشىلىق ىزدەنىستەن تۋىنداعان وي ورنەگىمەن سومدايدى. ءبىز بۇل ورىنداۋدا قورعانسىز ەكى جاستىڭ تاعدىرىنا ءوزىنىڭ جاۋاپتىلىعىن وتكىر سەزىنگەن, ادىلدىك ءۇشىن كۇرەسكەن ارەكەت ۇستىندەگى كۇردەلى وبرازدى كورەمىز. كەرىمدى سومداعان تالانتتى اكتەر ە.مالاەۆ كەيىپكەرىنىڭ ىشكى جان دۇنيەسىندەگى تراگەديا وقيعاسىن قوزعالىسقا كەلتىرەتىن نەگىزگى سەبەپتەر مەن سالدارلاردىڭ سوڭىنان جۇرۋگە تىرىسقان. بۇل ورىنداۋدا كەرىم ءوز ۇستازى ابايعا جان-تانىمەن بەرىلگەن, تابىنعان جان. سويتە تۇرا, ونىڭ ونەر ءباي­گە­سىندە تالانتىمەن وزا شاۋىپ, شىعار­ما­شى­لىعىمەن ءوزىن كولەڭكەلەپ كەتكەن ايدارعا ىشتارلىق جاساپ, كەك الماققا باراتىن كەيپىن كورەمىز. سپەكتاكلدىڭ ەكىنشى بولىمىندە كەرىم – ە.مالاەۆتىڭ بويىندا دىنشىلدىگى, موينىنا ايداردىڭ قانىن جۇكتەگەن “تاقۋالىق” كەيپى بۇگىنگى قوعامدا دا كورىنىس بەرىپ قالاتىن “قوس ستاندارتتى”, ەكىجۇزدى ادامداردىڭ جيناق­تال­عان وبرازىن تانىتادى. ورىنداۋشىنىڭ كەرىم بەينەسىن سيپاتتاۋدا ۇستانعان ز ۇلىمدىق تابيعاتىنىڭ استارىنان وسىنداي استار وقىلادى. سپەكتاكلدىڭ مۋزىكالىق پارتيتۋراسى جەكەلەگەن ارتىستەر مەن كوپ داۋىستا حورمەن قو­سىلا اتقارعان ابايدىڭ ءتول اندەرىن ورىنداۋدان تۇرادى. “جەلسىز تۇندە جارىق اي”, “مەن كوردىم ۇزىن قايىڭ قۇلاعانىن”, “تاتيانانىڭ حاتى” اندەرىن اكتەرلەردىڭ ءبى­ر­نەشە داۋىستارعا ءبولىپ ساۋاتتى ايتۋى ۇجىم­نىڭ مۋزىكالىق ورىنداۋشىلىق دەڭگەيى مەن مۇمكىندىكتەرىنىڭ جوعارى ەكەندىگىن كورسەتتى. تەاتر كلاسسيكالىق رەپەرتۋاردى بۇگىنگى كوزقاراسپەن وقۋدا باس-اياعى ءبۇتىن, ءبىر دەممەن وتەتىن قىزىقتى سپەكتاكل جاساعان. قازاقتىڭ “قاللەكيى” اتانعان ۇلتتىق ساحنا ونەرىنىڭ ءبىرتۋار تۇلعاسى قاليبەك قۋانىشباەۆ سوناۋ 1940 جىلى اباي وبرازىن ساحنا رامپاسى ارقىلى حالقىمەن ءساتتى تابىستىرعان. تا­لانتتى اكتەردىڭ اتىن يەمدەنگەن تەاتردىڭ رەپەرتۋارى م.اۋەزوۆتىڭ “ابايىمەن” تولىعۋى ورىندى. ساحناعا قويىلعان سپەكتاكلدىڭ ۋاقىتپەن بىرگە ەسەيىپ-ەسكىرەتىن كەزى بولادى. بوساڭ­سىعان, باستاپقى قويىلعان كەزدەگى جەلىسىنەن اجىراپ قالعان, جۇيەلى ساحنالىق شەشىمىن قايتا قاراپ شيراتا ءتۇسۋدى قاجەت ەتەتىن تۇستارى بار قويىلىمدار قاتارىنا جاتاتىن م.اۋەزوۆتىڭ “قاراگوز” تراگە­ديا­سى­مەن تەاتر ءوزىنىڭ التى كۇندىك گاسترولدىك ساپارىن قورىتتى. تەاتر بۇل پەسانى 1999 جىلى تەاتردىڭ باس رەجيسسەرى ءا.مامبەتوۆتىڭ رەجيسسۋراسىمەن قويعان بولاتىن. م.اۋەزوۆ اتىنداعى اكادەميالىق تەاتردان كەيىن استانا تەاترىنا بارعان ازەكەڭ بۇل شىعارماعا ءار ساحنادا بىرنەشە مارتە اينالىپ سوققان. تەاتردىڭ بۇل تۋىندىسى اكادەميالىق تەاتردىڭ بۇدان جيىرما-وتىز جىلداي بۇرىنعى بيىك بەلەستەردەن كورسەتكەن سپەكتاكلدەرىنىڭ ەستەتيكاسىن ەسكە ءتۇسىر­گەندەي بولدى. رەجيسسەرلىك ۇتىمدى شەشىمدەر مەن قىزىقتى تابىلعان ميزانستسەنالار ءوزىنىڭ ورالىمدى ويلارى مەن تۇسپالداپ بەرەر تۇجىرىمدارىنان ايرىلماعان. قاراگوزدى اۋىلدان شىعارىپ سالار تۇستا ورتاعا الا ارقانعا كوگەندەلىپ سىرىم توبىنىڭ شىعۋى مەن وسى ساحنانىڭ اياعىنا دەيىنگى ءىس-ارەكەتتىڭ دامۋ بارىسى سياقتى كورىنىستەر از ارەكەتپەن كوپ وي سالاتىن تۇششىمدى تۇستار. تەاتر اكىمشىلىگى تاراپىنان سپەكتاكلدى رەپەرتۋاردا قالدىرۋ جايلى شەشىم قابىلدانسا, العاشقى قۇرامداعى ورىنداۋشىلار ورنىنا جاس ارتىستەردى ەنگىزۋ ارقىلى رەجيسسەرلىك نۇسقانى قايتا قاراپ, جاڭالاپ سپەكتاكلگە جاڭا تىنىس بەرۋ جاعىن ويلاستىرۋ قاجەت سياقتى دەگەن ويىمىزدى دا ايتساق دەيمىز. قويىلىمدا ءساتتى اكتەرلىك ىزدەنىستەر, كورەرمەنگە وي سالارلىق وبرازدار بار. كلاسسيكالىق رەپەرتۋاردى ويناۋ ءبىرىنشى كەزەكتە تەاتردىڭ اكتەرلىك قۇرامىنىڭ كوركەمدىك دەڭگەيىنە سىن بولار اۋىر جۇك. م.اۋەزوۆتىڭ شۇرايلى كوركەم ءتىلىنىڭ قۇنارلى ءنارىن جوعالتپاي بەرە ءبىلۋ, وبرازدىڭ باس- اياعىن تارازى باسىندا تەڭ ۇستاۋ اكتەرلىك شەبەرلىككە بايلانىستى دەسەك, ورىنداۋ­شىلىق قۇرام تراگەديانىڭ تابيعاتىن كورەرمەنگە بارىنشا اشۋعا تالپىنعان. اكتەرلىك جۇمىستار ىشىنەن سىرىم – س.قاشقاباەۆتى, قاراگوز – ا.نوگەربەكتى, نارشا – ن.وتەۋىلوۆتى ءبولىپ اتاۋعا بولادى. الايدا ورىنداۋشىلار جۇمىسىنان جەكەلەگەن سالماقتى وبرازداردىڭ ءىزىن كورگەنىمىزبەن, سان الۋان وقيعالار مەن تاعدىرلاردىڭ جەلىسىنەن تۇراتىن قويىلىمدا ۇجىمدىق بىرلىك جەتپەي جاتتى. سپەكتاكلدىڭ بويىندا تراگەديالىق اتموسفەرانى اياعىنا دەيىن شيىرشىق اتتىرىپ, ءبىر دەممەن الىپ شىعاتىنداي رەجيسسەرلىك قولدىڭ قاجەتتىلىگىن كوردىك. كلاسسيكالىق ۇلتتىق رەپەرتۋاردى يگەرۋ دەگەنىمىز, ءبىرىنشى كەزەكتە حالقىمىزدىڭ بار قۇنارىن بويىنا جيناعان قازاق ءتىلىنىڭ پوەتيكاسىن, اسەم اۋەزدىلىگىن تامىلجىتىپ بەرە الاتىن اكتەرلەردىڭ ترۋپپادا جەتكىلىكتى مولشەردە بولۋى. استانالىقتار كورسەتكەن م.اۋەزوۆتىڭ ەكى تراگەدياسىندا ورىنداۋ­شىلار قۇرامى بۇل تالاپتىڭ دەڭگەيىنەن شىعا العان. ساحناعا شىققالى كوپتەگەن تىلدەرگە اۋدارىلىپ, سان الۋان رەجيسسەرلىك نۇسقا­لارمەن كورسەتىلىپ كەلە جاتقان “حانۋما” مۋزىكالىق كومەدياسىن تەاتر ساحناعا “گاماردجوبا!” دەگەن اتپەن قويىپتى. اۆتورى ا.تساگارەلي مەن كومپوزيتور گ.كانچەلي. قازاق تەاترلارىنىڭ نازارىندا بولىپ, بىرنەشە مارتە اۋدارىلعان بۇل كوڭىلدى كومەديانى استانالىقتار وزدەرىنىڭ ساحناسىنا وتكەن جىلى كەرەكۋلىك رەجيسسەر ەرسايىن تاپەنوۆتىڭ رەجيسسۋراسىندا كوردى. ج.اي-ماۋىتوۆ اتىنداعى پاۆلودار وبلىستىق مۋزىكالىق كومەديا تەاترىندا ءدال وسى جانردا, وسىنداي قۇراممەن جۇمىس ىستەيتىن رەجيسسەردى مۋزىكالىق سپەكتاكلگە استانا تەاترى دۇرىس تاڭداعان. ەسكى وقيعانىڭ ساحنالىق كىلتىن رەجيسسەر ە.تاپەنوۆ ورنىمەن تابا العان. سپەكتاكل ءبىر دەممەن وزىندىك قالىپتى ىرعاعىنان اينىماي جۇرەتىن كوڭىلدى قويىلىم بولعان. تەاتر ساحناسىندا دج.پاتريكتىڭ “قىمباتتى پامەلا” كومەدياسىن رەجيسسەر يۋ.حانينگا-بەكنازار جۇزەگە اسىرعان. بارلىق وقيعا جەلىسى مەن ءىس ارەكەتتى رەجيسسەر جانى جايساڭ, قاراپايىم دا سابىرلى جان پامەلا توڭىرەگىندە وربىتەدى. بۇل كورەرمەندى وڭ قۋاتپەن سەرگىتەر اتموسفەرا سىيلايتىن زاماناۋي كومەديالىق قويىلىم بولعان. اسىرەسە گۇلجان اسپەتوۆانىڭ جەكە سولوسىنان, ياعني پامەلا رولىنەن كورەرمەن جۇرەگىنە شىم-شىمداپ وي تاستايتىن قاراپايىم جاننىڭ كۇردەلى وبرازىن كوردىك. اكتريسا بۇل رولدە توقتاۋسىز ارتتا قالىپ جاتقان جىلدارعا, اش قاسقىرداي انتالاعان قوعامدىق ورتاداعى ادامداردىڭ تار پەيىلىنە تاۋەلدى ەمەس, كەرىسىنشە تابيعي قالپىن ساقتاعان, جۇزىنەن جىلۋى كەتپەيتىن كەڭپەيىلدى ادامعا ءتان بولمىس-بىتىمىمەن ەستە قالدى. ورىنداۋشى ءوز كەيىپكەرىنىڭ جان دۇنيەسىنە تەرەڭ ءۇڭىلىپ, ونىڭ وزگەگە ۇقسامايتىن ىشكى الەمىن تولىمدى اشا الدى. ال “ۇيلەنۋ” كومەدياسى تەاتردىڭ بۇگىنگى كۇن تاقىرىبىن يگەرۋدەگى ءساتتى قادامى. ە.جۋاسبەك كومەدياسىندا وقيعا ومىرلىك سيتۋاتسيالارعا قۇرىلىپ, جانر تابيعاتىنا ۇيلەسەدى. اۆتور پەرسوناجداردى ومىردەن الا وتىرىپ, ولارعا وزىندىك مىنەزدەمەلەر بەرە بىلگەن. تەاتر مۋزىكانتتارىنىڭ سپەكتاكلدىڭ ورىنداۋشىلار قۇرامىندا ارەكەت ەتۋلەرى بۇل قويىلىمنىڭ باستى جاڭالىعى. ءتىپتى مۋزىكانتتار توبىن پەسا وقيعاسىنا سايكەس قاتىcۋشى كەيىپكەرلەر رەتىندە ساحناعا شىعارعاسىن ولاردى قويىلىمنىڭ تولىق­قاندى مۇشەسى دەپ ساناۋعا جانە قويىلىم جانرىن ءجاي كومەديا ەمەس, مۋزىكالىق كومەديا دەسە دە جاراساتىن سەكىلدى. كومپوزيتور سەرىك ءابدىنۇروۆتىڭ ارنايى جازعان مۋزىكاسى كومەديالىق قويىلىمنىڭ كوڭىلدى اتموسفەراسىن, كەيىپكەرلەردىڭ ءار الۋان حاراكتەردەگى مىنەز-ق ۇلىقتارىن تەرەڭ دە نازىك اشۋعا كومەكتەسىپ تۇر. سكريپكا مەن فلەيتا سۇيەمەلىندەگى, قويىلىم فينالىندا ورىندالار ەكى جاستىڭ ءانى سپەكتاكلگە ءنار بەرەرلىكتەي اسەرلى جازىلعان. دەسەك تە, ءبىزدىڭ كومپوزيتورلارىمىز وسىنداي كوڭىلدى كومەديالار مەن مۋزىكالىق سپەكتاكلدەرگە مۋزىكا جازۋ بارىسىندا كورەرمەنگە ەرەكشە اسەر ەتەتىن, قۇلاققا ءسىڭىستى, ايتۋعا جەڭىل, كوپشىلىككە ۇنامدى جۇرەكتى قوزعايتىن اۋەندەر جازا الماي ءجۇر. كومەديا كەيىپكەرلەرىنىڭ ەسىمدەرى ساحناداعى مىنەز-ق ۇلىق پەن ارەكەتتىڭ باعىت-باعدارىنا قاراي شارتتى تۇردە بەرىلگەن. جانە ءبارىنىڭ وزىنە ءتان اۆتور سىزىپ بەرگەن ناقتىلى ارەكەت ەتۋ جەلىسى بار. سوندىقتان دا كەيىپكەرلەردىڭ زەرەك, جەلەك, ەرەك, تەرەك, كومەك, بولەك, ت.ب. بولىپ كەتە بەرۋى ورىنداۋشىلارعا قوعامداعى بەلگىلى ءبىر الەۋمەتتىك توپتىق مىنەزدەردىڭ جيناقتالعان كەلبەتىن جاساۋعا مۇمكىندىك بەرەدى. كومەديا كەيىپكەرلەرى جۇپ-جۇپپەن ءبولىنىپ, ءوزارا باسەكەگە تۇسەدى. بۇل اسىرەسە, ءۇي يەلەرى, ونىڭ ورىنباسارلارى, كەلىندىككە ۇمىتكەر قىزدار اراسىنداعى سايىستا كورىنىس بەرەدى. اكتەرلەر وزدەرى سومداعان كەيىپكەرلەرىنىڭ بار ءبىتىم-بولمىسى مەن كەلبەتىن كورەرمەندەرگە تانىتۋ ءۇشىن ايانىپ قالماعان. ۇيلەنەتىن ۇل بولەكتىڭ شەشەسى دەرەكگۇل ەرەكشەقىزىنىڭ ءرولىن ورىنداعان لەيلا بەكنازار-حانينگا جۇمىسىنان ءتورت قۇبىلاسى تۇگەل, “جاڭا قازاقتىڭ” كۇيەۋى مەن ۇلىن ۋىسىندا ۇستاعان ايدىك ايەل بولۋمەن بىرگە بويىندا جۇمساق ادامي كەلبەتى بار كەلبەتتى كەلىنشەكتى كورەمىز. ونىڭ ءۇي شارۋاسىنداعى قىز زەرەككە مەيىرىمدىلىگى, ءوز ۇلى بولەككە دەگەن انالىق ماحابباتى ەرەكشە سەزىلەدى. بۇل كەيىپكەردىڭ قاسىندا م.قايسانوۆ ورىنداعان اكەسى كەرەك ايتەۋىر ۇلىنىڭ بەينەسى ءبىر- جاقتىلاۋ, ۇستانعان ومىرلىك كوزقاراسى اياعىنا دەيىن تولىق انىقتالماعانداي شاشىراڭقى شىققان. اكتەر كەيىپكەردىڭ اتىنا, مىنەزىنە ءتان كەيبىر ۇقساستىقتاردى تاۋىپ, سىرت بەينەسىن سالماقتى جاساعانمەن كورەرمەن ونىڭ ەستە قالارلىقتاي قىلىقتارىن نەمەسە وزىنە ءتان بولمىسىن جادىندا ساقتاي المادى. ونىڭ كۇزەت ءبولىمىنىڭ باستىعى بولىپ كەلەتىن سىنىپتاسى كومەك – ق.قىستاقباەۆقا دەگەن وزىندىك كوزقاراسى بايقالا بەرمەيدى. سپەكتاكلدە ۇتىمدى كەيىپكەر بۇل – د.ءالىموۆ ورىنداعان اسابا. بۇل اكتەردىڭ دە ساحنادان كەسكىندەگەن وبرازىندا ومىردە كۇندە كورىپ جۇرگەن, جوقتان بار جاساپ, ۇيقاستىرىپ ولەڭدەتىپ, ەلدىڭ كوڭىلىن تاباتىن كاسىپ يەلەرىنىڭ جيىنتىق بەينەسى بار. سپەكتاكلدە بۇل اكتەر سومداعان وبرازدىڭ كوڭىلدى دە كۇلكىلى جاقتارىنىڭ كوپ بولعانىن مويىنداي وتىرىپ, ءالى دە بولسا ورىنداۋشى ءۇشىن ىزدەنسە كۇلكى تۋدىرار شتريحتار مەن دەتالدار كوپتەپ تابۋعا بولاتىندىعىنا كۇمانىمىز جوق. جالپى ءوز بەتىنشە ىزدەنىپ, جاڭاشا بوياۋلار تابۋ – بارلىق تەاتر اكتەرلەرى ءۇشىن دە وتە ماڭىزدى قاجەتتىلىك ەكەنىن ەسكە سالا كەتەمىز. وسى ارادا ءبىر ايتا كەتەتىن ءجايت, وكىنىشكە وراي استانا تەاترى گاسترولدىك ساپارمەن الماتىعا اپارعان بارشا سپەكتاكلدەردى كەڭىنەن تالداۋعا گازەت مۇمكىندىگى كوتەرمەدى. سوعان وراي, ءبىز اڭگىمەمىزدى وسى ارادان شەكتەۋگە ءماجبۇر بولىپ وتىرمىز. امانكەلدى مۇقان,  م.اۋەزوۆ اتىنداعى  ادەبيەت جانە ونەر ينستيتۋتى  تەاترتانۋ ءبولىمىنىڭ مەڭگەرۋشىسى.