فوتو: تجم
قاراعاندى وبلىسىنىڭ توتەنشە جاعدايلار دەپارتامەنتىنىڭ ناقتىلانعان مالىمەتتەرىنە سايكەس, ساعات 15:00-دەگى جاعداي بويىنشا ۇيىندىلەردى شىعارۋ جالعاسىپ جاتىر. ءۇيىندىنىڭ 90 پايىزى تازارتىلدى.
ءبىرىنشى قابات دەڭگەيىندە گاراج قورابىندا اۆتوكولىكتەر تابىلدى, ونىڭ ىشىندە گاز جابدىعى بار دەلىنەدى. قۇتقارۋشىلار زارداپ شەگۋشىنىڭ ايعاقتارىنا سۇيەنە وتىرىپ, جەرتولەدە تۇرعان كولىكتەگى گاز جابدىعىنىڭ اقاۋى تۋرالى نۇسقانى العا تارتتى.
«1993 جىلى تۋعان جابىرلەنۋشىنىڭ دۇكەنگە كىرىپ, وتتىق ساتىپ الىپ, ونى تەكسەرۋ ماقساتىندا تۇتاتقانى انىقتالدى. وسى ۋاقىتتا 2-3 سەكۋند ىشىندە جارىلىس بولىپ, قابىرعالار قۇلاعان. وسىعان بايلانىستى گاز-اۋا قوسپاسى جارىلعان دەگەن نۇسقا قاراستىرىلىپ وتىر. وقيعانىڭ سەبەبى مەن ءمان-جايى انىقتالىپ جاتىر», دەپ حابارلادى ۆەدومستۆو وكىلدەرى.
قازاقستان رەسپۋبليكاسى قىلمىستىق كودەكسىنىڭ 292-بابىنىڭ 2-بولىگى «ابايسىزدا ادام ولىمىنە اكەپ سوققان ءورت قاۋىپسىزدىگى ەرەجەلەرىن بۇزۋ» بويىنشا قىلمىستىق ءىس قوزعالدى.
ەسكە سالا كەتەيىك, بۇگىن تاڭعى ساعات 08:06-دا تەمىرتاۋدا ەكى قاباتتى دۇكەندە گاز جارىلعان. قۇتقارۋشىلار ءۇيىندى استىنان 1973 جىلى تۋعان ايەلدىڭ دەنەسىن تاپتى. بەلگىلى بولعانداي, مارقۇم دۇكەن ساتۋشىسى بولعان. تاعى ءبىر ايەل ءۇيىندى استىنان شىعارىلىپ, قازىر اۋرۋحانادا جاتىر.
