فوتو: gkb7.kz
№ 7 قالالىق كلينيكالىق اۋرۋحانانىڭ تاجىريبەلى, جوعارى بىلىكتى ينتەرۆەنتسيالىق حيرۋرگتەرى جەدەل تەكسەرۋ بارىسىندا ناۋقاستىڭ جاعدايىنىڭ اۋىرلىعىن بايقادى.
جۇرەك تامىرلارىن دياگنوستيكالاۋ ماقساتىندا قان تامىرلارىنىڭ جاعدايى بويىنشا وتا جاساۋ تۋرالى شەشىم قابىلداۋ ءۇشىن الدىمەن كوروناروگرافيا جۇرگىزىلدى.
ناۋقاستىڭ جاعدايى وتە اۋىر ەدى, ءولىم قاۋپى جوعارى بولدى, ويتكەنى كوروناروگرافيا سول جاق كورونارلىق ارتەريانىڭ باعانالى زاقىمدانۋىن انىقتادى (90%).
«ناۋقاستىڭ دىڭدىك ارتەرياسى زاقىمدانعان. ەگەر ارتەريا 99,9% جابىلىپ قالسا, بۇل اۋىر زاقىمدانۋ - ولىمگە اكەلەدى. اسقىنۋ قاۋپى دە وتە جوعارى. مۇنداي جاعدايدا ادەتتە اشىق وتا جاساۋ كەرەك. زەرتتەۋ ناتيجەسى بويىنشا دا ستەنت قويۋعا بولادى, ەكى جاعدايدا دا اسقىنۋ قاۋپى بىردەي», دەدى ينتەرۆەنتسيالىق حيرۋرگيا بولىمشەسىنىڭ مەڭگەرۋشىسى, وتا جاساعان حيرۋرگ ساكەن انارتاەۆ.
دارىگەرلەر ناۋقاسقا وتانىڭ وتە كۇردەلى بولاتىنىن, قاۋپى تىم جوعارى ەكەنىن الدىن الا ەسكەرتكەن.
«قان تامىرلارىنىڭ جاعدايى تۇراقتى ەمەس ەدى. سول جاق كورونارلىق ارتەريانىڭ بيفۋركاتسيا (تارماقتالۋى, ءبولىنۋى) ايماعىندا كۇردەلى ستەنوز بولدى, بۇل قان تامىرلارىنىڭ قابىرعاسىنداعى تۇيىنشەكتەربار دەگەن ءسوز. سونىمەن قاتار ناۋقاستا تۇيىنشىكتەردىڭ جارىلۋى بايقالعان, سونىڭ سالدارىنان جۇرەكتىڭ يشەميالىق اۋرۋىنىڭ كلينيكاسى ۇلعايدى.
سونىمەن بىرگە ينفاركت پەن جۇرەك قىزمەتىنىڭ توقتاپ قالۋ قاۋپى بولدى. ناۋقاس شۇعىل وتاعا دايىن بولعاندىقتان, از ءينۆازيۆتى ادىسپەن وپەراتسيا جاساۋ تۋرالى شەشىم قابىلداندى.
«دارىگەرلەردىڭ الدىندا كۇردەلى مىندەت تۇردى, ال دارىگەرلەرگە ۇقىپتى بولۋ كەرەك ەدى. ويتكەنى, سول جاق كورونارلىق ارتەريا ءدىڭىنىڭ ديسسەكتسياسى جانە تۇراقسىز تۇيىنشىكتەر بولدى. وتا كەزىندە تارىلعان ايماق ارقىلى ميكروكاتەتەر مەن كورونارلىق وتكىزگىش قولدانىلدى. بۇل ءادىس قان اعىمىن توقتاتپاۋ ءۇشىن جۇزەگە اسىرىلادى. ءبىر وتكىزگىش الدىڭعى قارىنشاارالىق ارتەرياعا, ەكىنشى وتكىزگىش اينالمالى ارتەرياعا وتكىزىلدى جانە باياۋ باللونداۋ-كەڭەيتۋ جۇرگىزىلدى», دەلىنگەن اقپاراتتا.
دارىگەرلەر ازاماتتارعا جىلىنا ءبىر مارتە كارديولوگتىڭ كەڭەسىن تىڭداپ, جۇرەكتى تەكسەرىستەن وتكىزىپ تۇرۋعا كەڭەس بەرەدى.
