وندا قازاق ءتىلشىسى قىتاي ۇلتىنىڭ وكىلىنەن "جەڭگە" دەپ سۇحبات الدى.
ول ءوزىن تانىستىرۋ كەزىندە ۇلتىنىڭ حانزۋ ەكەنىن, بىراق قازاق وتباسىنا كەلىن بولىپ تۇسكەنىن باياندايدى.
- قازاقشا اتىم – جاۋحار. ەكى بالام بار. ۇلكەنىم ايدانا جيىرماعا, كىشىم ايدىن ون ۇشكە تولادى. قازىرگى كەزدە قۇلجادان شايحانا اشتىم. ەڭ العاشىندا - ون جىلداي بۇرىن ۇكىمەتكە جۇمىس ىستەدىم. اعالارىڭ (كۇيەۋى) التى جىل بۇرىن اۋىر دەرتتەن قايتىس بولدى, سول كەزدە قاتتى قينالعان ەدىم. كۇيەۋىم قايتىس بولاردان بۇرىن ءوزىم شانحايعا بارىپ جۇرەگىمە وتا جاساتقانمىن. مەنەن كەيىن كۇيەۋىم ەكى جىل بويى اۋىردى, سول كەزدە ەم-دومعا قاجەت دەپ قارىزعا كىرىپ كەتتىم. اعالارىڭىز دۇنيەدەن وتكەننەن كەيىن قارىزدار قىسا باستادى. ونى قايتارۋ اۋىر بولدى, سونداي قيىن كەزەڭدەر بولدى", - دەدى قىتايداعى قازاق كەلىنى.
ول بۇگىندە قايىن جۇرتىمەن وتە جاقسى ارالاسىپ تۇراتىنىن اتاپ ءوتتى. ەنەسى, قاينىسى, ونىڭ وتباسى كەلىپ-كەتىپ تۇرادى ەكەن.
- مەنىڭ سۇيەگىم قازاق بولماسا دا, ەكى قازاق بالانىڭ اناسىمىن. كۇيەۋىم قايتىس بولىپ كەتسە دە بالالارىم بار. ودان بولەك, قازاقتاردى دا شىنايى جاقسى كورەمىن. ماعان قازاق ۇلتىنىڭ سالت-ءداستۇرى, مادەنيەتى قاتتى ۇنايدى, - دەپ اعىنان جارىلدى جاۋحار.
