بۇگىندە قاراعاندى قالاسى اكىمدىگىنىڭ اقىندارعا دەگەن قامقورلىعى ەرەك بولىپ تۇر. پوەزيا كەشتەرىنىڭ بىرىنەن سوڭ ءبىرىنىڭ دۇركىرەپ وتۋىنە شاھار بيلىگىنىڭ شاراپاتى زور. وسى ءبىر ادەبي-سازدى كەشتى ۇيىمداستىرۋعا دا قازاقستان جازۋشىلار وداعىنىڭ وبلىستىق فيليالىنا قولداۋ كورسەتتى.
ادەبي-سازدى كەشتىڭ شىمىلدىعىن ساكەن تەاترىنىڭ اكتەرلەرى ءتۇردى. اقىن ءۇنىن اڭساپ كەلگەن كورەرمەن مۇقاعاليدىڭ داۋىرىنە ساپار شەكتى. مۇزبالاق اقىننىڭ ولەڭدەرى وقىلدى, اندەرى دە ءوزىنىڭ سانىمەن تەبىرەنە ورىندالدى.
پوەزيا كەشىندە اباي اتىنداعى مەملەكەتتىك سىيلىقتىڭ يەگەرى سەرىك اقسۇڭقار ۇلى, قويلىباي اسانوۆ, قايرات اسقار, ءىلياس مۇقاي, ەرعانات كەڭەسبەك ۇلى, سالتانات سماعۇلتەگى, سۇلتان داۋلەتحان, اينۇر جاپپارقۇلوۆا سەكىلدى اقىندار جىردان شاشۋ شاشتى. سونداي-اق ەرىك نارىن, ادىلەت شوپەن, كامشات حاسەن, ەركەبۇلان ەلەۋسىز ۇلى سىندى جاس بۋىن دا كورەرمەندى ءتانتى ەتتى.
بۇدان سوڭ كوپشىلىك ستۋدەنت جاستاردىڭ ونەرىن تاماشالادى.
مىنە, وسىلاي ءار بۋىندى جەكە-جەكە توپتاستىرىپ, ساحناعا شىعارۋ ارقىلى ۇيىمداستىرۋشىلار قاراعاندىنىڭ ادەبي ورتاسىن كورسەتتى.
ەرەكشە فورماتتاعى ادەبي-سازدى كەشكە وبلىس اكىمىنىڭ ورىنباسارى ەرلان قۇسايىن قاتىستى.
قاراعاندى وبلىسى
