فوتو: ا.بايجۇمانوۆ
كلۋب وتىرىسىن اشقان ماۋلەن اشىمباەۆ مەملەكەت باسشىسى قاسىم-جومارت توقاەۆ ءوزىنىڭ جولداۋىندا جانە ۇكىمەتتىڭ كەڭەيتىلگەن وتىرىسىندا ستراتەگيالىق جوسپارلاۋ بويىنشا نەگىزگى مىندەتتەردى بەلگىلەپ بەرگەنىن اتاپ ءوتتى. ەلىمىزدە الەۋمەتتىك دامۋ جانە بيۋدجەتتىك-سالىق ساياساتى ماسەلەلەرىن قايتا قاراۋ, جاڭا ينۆەستيتسيالىق كەزەڭدى باستاۋ, ەكونوميكانى ىرىقتاندىرۋ, سونداي-اق, ينفراقۇرىلىمدى جەدەل جاڭعىرتۋ جونىندەگى مىندەتتەردىڭ ماڭىزى زور ەكەنىن ءمالىم ەتتى.
«پرەزيدەنت قاسىم-جومارت توقاەۆ ۇكىمەتكە 2029 جىلعا قاراي ەكونوميكا كولەمىن ەكى ەسە ارتتىرۋ جونىندە ناقتى مىندەت جۇكتەدى. ەكونوميكانىڭ بارلىق سالاسىندا كەشەندى جۇمىس جۇرگىزبەي اتالعان ماقساتقا قول جەتكىزۋ مۇمكىن ەمەس. بۇل رەتتە مەملەكەتتىڭ ەكونوميكاعا ارالاسۋىنان كەزەڭ-كەزەڭمەن باس تارتۋ ەرەكشە مانگە يە. مەملەكەتتىك ساتىپ الۋ بويىنشا جاڭا زاڭناما قالىپتاستىرۋ, مەملەكەت پەن جەكەمەنشىك سەرىكتەستىكتەگى تىڭ تاسىلدەر جانە جەكەشەلەندىرۋ سياقتى قادامدار دا ۇلكەن ءرول اتقارادى. ەل ەكونوميكاسىنا ينۆەستيتسيا تارتۋ بويىنشا دا اۋقىمدى مىندەتتەر تۇر», دەدى م.اشىمباەۆ.
پالاتا سپيكەرى ەلدەگى قولايلى ينۆەستيتسيالىق احۋالدى ساقتاۋدىڭ ماڭىزدى ەكەنىنە دە نازار اۋداردى. مەملەكەت باسشىسى اتاپ وتكەندەي, بۇل – جاڭادان قۇرىلعان ينۆەستيتسيالىق شتابتىڭ باستى مىندەتى. وسى باعىتتا ينۆەستورلار, ورتالىق جانە وڭىرلەر اراسىنداعى بايلانىستى نىعايتۋعا باسا ءمان بەرىلەدى.
تاعى ءبىر باعىت – تۇرعىن ءۇي-كوممۋنالدىق جانە كولىك-لوگيستيكالىق كەشەندەردىڭ ينفراقۇرىلىمىن جەدەل جاڭعىرتۋ. ماۋلەن اشىمباەۆ سۋ رەسۋرستارىن ءتيىمدى پايدالانۋ ماسەلەلەرىنە جانە اگروونەركاسىپ كەشەنىنىڭ نەگىزگى باسىمدىقتارىنا دا توقتالدى.
كەزدەسۋدە ساراپشىلار ادامي كاپيتالدى دامىتۋعا, سونداي-اق, ناقتى جانە اتاۋلى الەۋمەتتىك قولداۋعا ەرەكشە نازار اۋداردى. بۇل باعىتتا ءبىلىم بەرۋ, دەنساۋلىق ساقتاۋ قىزمەتتەرىنىڭ ساپاسى مەن قولجەتىمدىلىگىن ارتتىرۋعا باسىمدىق بەرە وتىرىپ, الەۋمەتتىك سالانى رەفورمالاۋ قاجەتتىگى ايتىلدى.
ءىس-شارا بارىسىندا جاس ساراپشىلار قازاقستانداعى ستراتەگيالىق دامۋدىڭ ماڭىزدى قىرلارىن تالقىلادى. كلۋب مۇشەلەرى الەمدىك ترەندتەردى ەسكەرە وتىرىپ, ەكونوميكانى ارتاراپتاندىرۋعا, ءومىر ءسۇرۋ دەڭگەيىن ارتتىرۋدىڭ ناقتى ينديكاتورلارىنا قول جەتكىزۋگە, سالاارالىق رەفورمالار جۇرگىزۋگە جانە ورنىقتى دامۋعا قاتىستى وزەكتى ماسەلەلەردى دە قوزعادى.
ءوز كەزەگىندە ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى وتىرىسقا قاتىسۋشىلارعا بەلسەندىلىك تانىتىپ, ساراپتامالىق پىكىرلەرىن بىلدىرگەندەرى ءۇشىن العىسىن جەتكىزدى. ول كەزدەسۋدە ايتىلعان ۇسىنىستار الداعى جۇمىستا ەسكەرىلەتىنىن جانە بىرلەسىپ جۇمىس ىستەۋگە دايىن ەكەنىن دە اتاپ ءوتتى.
