ءبىر جىل بۇرىن ۇستالعان براكونەرلەر سوتتالدى

بۇعان دەيىن سولتۇستىك قازاقستان وبلىسىنىڭ پوليتسەيلەرى اسا ءىرى كولەمدە جاسالعان زاڭسىز اڭ اۋلاۋ فاكتىلەرىن اشقانى تۋرالى حابارلانعان ەدى.

2023 جىلدىڭ باسىندا وبلىستىق پوليتسيا دەپارتامەنتى ۇيىمداسقان قىلمىسقا قارسى كۇرەس باسقارماسى قىزمەتكەرلەرىنىڭ نازارىنا ءسىبىر ەلىكتەرىن ونەركاسىپتىك اۋقىمدا براكونەرلىك جولمەن اتىپ الۋمەن اينالىساتىن ادامدار توبى ءتۇستى.

اقپان ايىنىڭ سوڭىندا ۆاز-2115 اۆتوكولىگىمەن جۇرگەن پەتروپاۆل قالاسىنىڭ ءۇش تۇرعىنى ۇستالدى. تەكسەرىس بارىسىندا كولىكتەن تىركەلمەگەن تەگىس ۇڭعىلى ەكى مىلتىق پەن ءسىبىر ەلىگىنىڭ ءتورت ولەكسەسى تابىلدى. ودان ءارى جەدەل-ىزدەستىرۋ ءىس-شارالارى بارىسىندا ساياجاي ۋچاسكەلەرىنىڭ بىرىندە قويما مەن مۇشەلەۋ تسەحى انىقتالدى. سول جەردەن ەلىكتىڭ تاعى 2 ولەكسەسى, 40 تەرى, 12 باس پەن 119 تۇياق تابىلدى.

كەيىن قىلمىستىق توپقا تاعى ءبىر ازاماتتىڭ قاتىسى بارى انىقتالدى. ۇيىمداسقان قىلمىسقا قارسى كۇرەس باسقارماسى ۇستالعان ادامدار براكونەرلىك قىزمەتپەن بايلانىستى زاڭسىز بيزنەس قۇرعانىن مالىمدەدى. ولار ۇيىمداسقان قىلمىستىق توپتى قۇرىپ, كوشباسشى, مەرگەن, قاساپشى جۇرگىزۋشى بولىپ ءوزارا ءبولىپ العان ارەكەتتەرىن ىسكە اسىرعان.

«ۇيىمداسقان قىلمىستىق توپ قاتىسۋشىلارى براكونەرلىك كاسىپتى جۇزەگە اسىرۋ ءۇشىن تىركەلمەگەن قارۋ, وق-ءدارى, گيلزالار مەن بىتىرالار ساتىپ العان. ال جابايى جانۋارلاردىڭ ەتىن تانىستارىنا وتكىزىپ وتىرعان. ساراپشىلاردىڭ قورىتىندىسىنا سايكەس, مەملەكەتكە 68 ميلليون تەڭگەدەن استام شىعىن كەلتىرىلدى. اتالعان فاكتىلەر قازاقستان رەسپۋبليكاسى قىلمىستىق كودەكسىنىڭ 262-بابى مەن 337-بابى بويىنشا سوتقا جىبەرىلدى», دەلىنگەن اقپاراتتا.

بۇرىن دا سوتتى بولعان قىلمىستىق توپتىڭ باسشىسى 11 جىلعا باس بوستاندىعىنان ايىرىلسا, سىبايلاستارى 8 جىلعا سوتتالدى. ۇكىم زاڭدى كۇشىنە ەنگەن جوق.