– ارمان قايرات ۇلى, بۇگىندە وتاندىق ديپلوماتيانىڭ بەلسەندىلىگى ارتقانى بايقالادى. قويناۋى قازىنا-بايلىققا تولى ەل ءۇشىن حالىقارالىق بايلانىستاردى كۇشەيتۋ اۋمالى-توكپەلى زاماننىڭ تالابىنا ساي بولسا كەرەك. وسى ورايدا قاتار ەلىمەن ىنتىماقتاستىعىمىز قاي دەڭگەيدە, الدىمىزعا قانداي مىندەتتەر قويىپ وتىرمىز؟
– مەملەكەت باسشىسى قاسىم-جومارت توقاەۆ اسا تاجىريبەلى كاسىبي ديپلومات رەتىندە ەلىمىزدىڭ الەمدىك بايلانىستارىنا ۇلكەن دەم بەرگەنى ءسوزسىز. قازاقستاننىڭ التى قۇرلىقتى قامتىعان ەكپىندى ديپلوماتياسى اراب ەلدەرىمەن دە ىنتىماقتاستىقتى نىعايتۋدى كۇشتەپ قولعا الدى. مۇنى پرەزيدەنتتىڭ حالىقارالىق جۇمىس باعىتىنداعى بەلسەندى قىزمەتىنەن بايقاۋعا بولادى.
قاتار – ەلىمىزدىڭ سەنىمدى سەرىكتەسى. ەلدەرىمىزدىڭ ءتۇرلى سالالاردا الەۋەتى مول, العا قويعان مىندەتتەرى ۇقساس, ستراتەگيالىق جوسپارلارى ءبىرىن-ءبىرى تولىقتىرادى دەسەم ارتىق ايتپايمىن. مۇنى ءتيىمدى جۇزەگە اسىرۋ ءۇشىن بىرنەشە ناقتى ينۆەستيتسيالىق جوبا قولعا الىندى. كەلىسىمدەر مەن شارتتار جاسالىپ, ىنتىماقتاستىقتىڭ بارلىق باعىتى بويىنشا جۇمىستى كۇشەيتۋگە جول اشىلدى.
كەلەسى كەزەڭ – ستراتەگيالىق سەرىكتەستىككە قول جەتكىزۋ. وسى ورايدا بيىل 13-14 اقپاندا قازاقستان پرەزيدەنتىنىڭ قاتارعا تۇڭعىش مەملەكەتتىك ساپارى ۇيىمداستىرىلادى. ساپار بارىسىندا ەكى ەل باسشىلارى مازمۇندى كەلىسسوز وتكىزىپ, ىنتىماقتاستىقتى ەسەلەۋ جولدارىن تالقىلايدى. جالپى, ەل باسشىسىنىڭ قاتارعا مەملەكەتتىك ساپارمەن بارۋى ەكىجاقتى قاتىناستار تاريحىنداعى ەڭ ماڭىزدى وقيعا بولماق.
بىلتىر ماۋسىم ايىندا قاتار ءامىرى شەيح ءتاميم بەن حاماد ءال ءتاني ەلوردامىزعا جۇمىس ساپارىمەن كەلىپ, استانا حالىقارالىق فورۋمىنا قۇرمەتتى قوناق رەتىندە قاتىسقانى ءمالىم. بۇعان قوسا مەملەكەت باسشىسى قاتاردىڭ امىرىمەن حالىقارالىق ءىس-شارالار اياسىندا ءۇش رەت جۇزدەستى. ال ودان بۇرىن 2022 جىلى پرەزيدەنتىمىز قاسىم-جومارت توقاەۆتىڭ دوحاعا جۇمىس ساپارىمەن بارعانىن جانە شەيح ءتاميم بەن حاماد ءال ءتانيدىڭ ەلىمىزگە مەملەكەتتىك ساپارى ۇيىمداستىرىلعانىن اتاپ وتپەسكە بولمايدى. ەكى ەل باسشىلارىنىڭ وسىنداي ءجيى كەزدەسۋى ىنتىماقتاستىقتى ەسەلەۋگە دەگەن ءوزارا ۇمتىلىستى ايعاقتايدى.
مەملەكەت باسشىلارى اراسىندا قول جەتكىزىلگەن ۋاعدالاستىقتاردى ورىنداۋ ءۇشىن ۇكىمەت باسشىلىعى مەن مۇددەلى مەملەكەتتىك ورگانداردىڭ باسشىلارى ەكى ەل اراسىندا ءتۇرلى ساپارلار ۇيىمداستىردى. بىلتىر مامىر ايىندا سول كەزدەگى پرەمەر-مينيستر ءاليحان سمايىلوۆ باستاعان قازاقستان دەلەگاتسياسى دوحا قالاسىنا بارىپ, قاتار پرەمەر-ءمينيسترى – سىرتقى ىستەر ءمينيسترى شەيح مۇحاممەد بەن ءابدىراحمان ءال تانيمەن جانە ءىرى كومپانيالاردىڭ باسشىلارىمەن مازمۇندى كەلىسسوزدەر جۇرگىزدى. سونىمەن قاتار پرەمەر-ءمينيستردىڭ ورىنباسارى سەرىك جۇمانعاريننىڭ تەڭ توراعالىعىمەن قازاقستان-قاتار جوعارى دەڭگەيدەگى بىرلەسكەن ۇكىمەتارالىق كوميسسياسىنىڭ 6-وتىرىسى ءوتتى.
بۇعان قوسا ەكى ەلدىڭ سىرتقى ىستەر مينيسترلىكتەرى اراسىندا تىعىز ارىپتەستىك ورناتىلعان. بىلتىر جەلتوقسان ايىندا سىرتقى ىستەر ءمينيسترىنىڭ ورىنباسارى الىبەك باقاەۆ پەن قاتار سىرتقى ىستەر مينيسترلىگىنىڭ باس حاتشىسى احمەد ءال-حاممادي ساياسي كونسۋلتاتسيالاردىڭ كەزەكتى 2-راۋندىن وتكىزدى.
– ناقتى ينۆەستيتسيالىق جوبالار قولعا الىنعانىن اتاپ ءوتتىڭىز. قاتارمەن وسى سالاداعى سەرىكتەستىك جايى قانداي؟
– ينۆەستيتسيالىق سەرىكتەستىك – قازىرگى جۇمىستىڭ نەگىزگى باعىتى. قاتار ينۆەستورلارى, ءىرى كومپانيالارى ەلىمىزدە بىرنەشە جوبانى جۇزەگە اسىرۋعا مۇددەلى. جالپى, قازاقستانمەن سەرىكتەستىكتى كۇشەيتۋگە دەگەن قىزىعۋشىلىقتىڭ كۇرت وسكەنى بايقالادى. بۇعان مەملەكەت باسشىسىنىڭ باستاماسىمەن ەلىمىزدە جۇزەگە اسىپ جاتقان وڭ بەتبۇرىستار ىقپال ەتىپ وتىر.
ناقتى سالالارعا كەلەر بولساق, بۇگىندە قاتاردىڭ «Hassad Food» كومپانياسى استانادا استىق وڭدەۋ زاۋىتىن سالۋ جوباسىن ىسكە اسىرماقشى. بۇل جوبا ەكسپورتىمىزدىڭ الەۋەتىن كۇشەيتۋگە قوماقتى ۇلەس قوسادى دەپ سەنەمىن. زاۋىتتىڭ نەگىزگى ونىمدەرى – گليۋتەن مەن كراحمال. ولار تۇركيا, اقش, كانادا جانە باسقا دا كوپتەگەن ەلدەردە ۇلكەن سۇرانىسقا يە بولاتىنى ءسوزسىز. بۇعان قوسا كاسىپورىننىڭ ارقاسىندا ەلىمىزدە قوسىمشا تۇراقتى جۇمىس ورىندارى اشىلادى.
ايتىپ وتكەنىمدەي, ەلدەرىمىزدىڭ العا قويىپ وتىرعان مىندەتتەرىنىڭ اراسىندا ۇيلەسىمدىلىك بار. وسىنىڭ ءبىرى – اۋىل شارۋاشىلىعى سالاسى. قاتار ءۇشىن ازىق-تۇلىك قاۋىپسىزدىگىن ارتتىرۋ, ءوز نارىعىن ساپالى ءارى ەكولوگيالىق تازا ونىمدەرمەن ۇزدىكسىز قامتاماسىز ەتۋ ماڭىزدى. ال ەلىمىزدە سىرتقى نارىققا ۇسىنا الاتىن مۇمكىندىكتىڭ مول ەكەنى بەلگىلى. مۇنى قاتار تارابى جاقسى ءتۇسىنىپ, سەرىكتەستىك ورناتۋعا دايىندىعىن ءبىلدىرىپ وتىر.
وسىعان بايلانىستى قاتارمەن اگرارلىق سالادا بىرلەسكەن تىكەلەي ينۆەستيتسيالار قورىن قۇرۋ ماسەلەسى قاراستىرىلىپ جاتىر. بۇل قوردىڭ نەگىزگى مىندەتى رەتىندە تاراپتار ەلىمىزدەگى ءسۇت وڭدەۋ سالاسىن دامىتۋدى كوزدەيدى. جوبا ءسۇت ونىمدەرى نارىعىنىڭ باسەكەلەستىگىن ارتتىرىپ قانا قويماي, دايىن ءونىمدى الىس-جاقىن ەلدەرگە ەكسپورتتاۋعا دا مۇمكىندىك بەرەدى. ايتا كەتەرلىگى, قاتارلىق ينۆەستورلار ەلىمىزگە وسى سالاداعى ۇزدىك تەحنولوگيالاردى الىپ كەلۋگە ءازىر.
قاتار مەملەكەتىنىڭ ينۆەستورلارىمەن گاز وڭدەۋ زاۋىتىنىڭ, ماگيسترالدى گاز قۇبىرلارىنىڭ قۇرىلىسى, سونداي-اق قارجى, تەلەكوممۋنيكاتسيا سالالارىنداعى ينۆەستيتسيالىق سەرىكتەستىككە قاتىستى كەلىسسوزدەر جۇرگىزىلىپ كەلەدى. كەلەشەگى زور باعىتتار رەتىندە تاۋ-كەن جانە بالامالى ەنەرگەتيكادا ناقتى جوبالاردى ىسكە اسىرۋ مۇمكىندىكتەرىن تالقىلاپ جاتىرمىز.
اتالعانداردىڭ بارلىعى پرەزيدەنتىمىزدىڭ قاتارعا مەملەكەتتىك ساپارىنىڭ كۇن تارتىبىنە ەنگىزىلگەن. جەمىستى كەلىسسوزدەر ناتيجەسىندە ينۆەستيتسيالىق سالاعا زور سەرپىن بەرىلەدى دەپ كۇتەمىز.
– شەتەلدەن ينۆەستيتسيا تارتۋ ەل ەكونوميكاسىنىڭ قارقىنىن ارتتىرا تۇسەتىنى ءسوزسىز. بۇعان مەملەكەت باسشىسى ايرىقشا نازار اۋدارىپ وتىر. وسى رەتتە «ەكى ەل اراسىنداعى ينۆەستيتسيالىق جوبالاردىڭ قاراپايىم جۇرتشىلىققا تيگىزەر پايداسى قانداي؟» دەگەن ماسەلەگە توقتالا كەتسەڭىز.
– بۇعان دەيىن اتاپ وتكەنىمدەي, ينۆەستيتسيالىق جوبالار دەگەنىمىز – جاڭا كاسىپورىندار, ياعني جاڭا جۇمىس ورىندارى. سونىمەن قاتار كاسىپورىنداردىڭ شىعاراتىن ونىمدەرى يمپورتقا تاۋەلدىلىكتى ازايتا وتىرىپ, جەرگىلىكتى نارىقتا باسەكەنى كۇشەيتەدى, وسىلايشا, ونىمدەردىڭ باعاسى قولجەتىمدىرەك بولىپ, ساپاسى ارتا تۇسەدى دەگەن ءسوز.
قاتار مەملەكەتىن قازاقستانعا ينۆەستيتسيا سالۋعا شاقىرا وتىرىپ, ەلىمىزدەگى الەۋمەتتىك ماڭىزدى نىساندارعا دا نازار اۋدارۋىن تالاپ ەتەمىز. وسى ورايدا استانا قالاسىندا وزىق تەحنولوگيالارمەن جابدىقتالعان, زاماناۋي كوپبەيىندى مەديتسينالىق ورتالىقتىڭ قۇرىلىسىن جۇزەگە اسىرۋ تۋرالى ۋاعدالاستىق بار. اتالعان مەديتسينالىق حاب بىرنەشە باعىت بويىنشا, ونىڭ ىشىندە جەدەل جاردەم, دياگنوستيكالىق جانە وڭالتۋ بلوكتەرىنەن قۇرالادى.
سونىمەن قاتار قازىرگى ۋاقىتتا قاتار دامۋ قورى الماتى وبلىسىندا 120 ورىندىق پەريناتالدى ورتالىقتىڭ قۇرىلىسىن باستاۋدىڭ قاجەتتى شارالارىن قولعا الدى. مۇنىڭ بارلىعى ەكىجاقتى ينۆەستيتسيالىق سەرىكتەستىك كوپتەگەن سالانى, ونىڭ ىشىندە الەۋمەتتىك ماڭىزعا يە جوبالاردى دا قامتيتىنىن كورسەتەدى.
مەملەكەت باسشىسى دوحاعا جوسپارلانعان ساپارى اياسىندا قاتاردىڭ ءىرى كومپانيالارىنىڭ وكىلدەرىمەن كەزدەسەدى جانە ءىس باسىندا جۇرگەن بەدەلدى كاسىپكەرلەرمەن دوڭگەلەك ۇستەل وتكىزەدى. جالپى, ينۆەستيتسيا باعىتىنداعى قىزمەت پەن ونىڭ ناتيجەلەرى مەملەكەت باسشىسىنىڭ جەكە باقىلاۋىندا.
– جۇمىس بارىسىندا ەكونوميكالىق كۇن تارتىبىنە اسا ۇلكەن ءمان بەرىلىپ وتىرعانى كورىنىپ تۇر. ءسىز ەكسپورتقا باعىتتالعان جوبالاردى اتاپ ءوتتىڭىز, ال قازىر قاتار تۇتىنۋشىلارىنىڭ قازاقستان ونىمدەرىنەن حابارى بار ما؟ جالپى سۇرانىس قانداي؟
– قاتار حالقىنىڭ سانى 3 ملن-عا جۋىق بولسا دا, ازاماتتارىنىڭ تۇرمىس دەڭگەيى الەمدە ەڭ جوعارى ەلدىڭ ءبىرى ەكەنى بارشاعا ءمالىم. نارىقتاعى باسەكەلەستىك پەن حالقىنىڭ ساپالى ونىمگە دەگەن تالابى دا سوعان سايكەس.
وسى رەتتە ەكى ەل ۇكىمەتتەرى ساۋدا اينالىمىنىڭ كولەمىن ارتتىرۋدى كوزدەپ وتىرعانىن اتاپ وتۋگە بولادى. بۇل باعىتتا وڭ وزگەرىستەر بار. 2023 جىلى ءوزارا ساۋدا كولەمى 3 ەسەگە ارتتى.
ايتا كەتەرلىگى, ەلىمىزدىڭ شۇيگىندى دالاسىندا جايىلعان مال ەتىنە سۇرانىس ارتىپ كەلەدى. قازىرگى ۋاقىتتا قازاقستاننان ەكسپورتتالعان قوي جانە قۇس ەتى قاتاردىڭ ءىرى ساۋدا جەلىلەرىنىڭ سورەلەرىندە قولجەتىمدى.
بۇعان قوسا ەلىمىزدىڭ شاعىن, ورتا جانە اۋىر ونەركاسىپ ونىمدەرىنە, سونداي-اق اقپاراتتىق تەحنولوگيالار سالاسىنداعى ونىمدەر مەن قىزمەتتەرگە قىزىعۋشىلىقتىڭ ارتقانى بايقالىپ وتىر. وسى ورايدا قازاقستان ىسكەرلەرىنە ءتيىستى قولداۋ كورسەتىپ كەلەمىز.
الايدا جالپى قازىرگى ءوزارا ساۋدا كورسەتكىشتەرى ەكىجاقتى قاتىناستاردىڭ جوعارى دەڭگەيىنە سايكەس كەلمەيتىنى انىق. وسىعان بايلانىستى ەكى ەل باسشىلارى كەلىسسوز بارىسىندا ۇكىمەتتەرىنە ءوزارا الىس-بەرىستى كۇشەيتۋ تۋرالى ناقتى ءارى مەجەلى مىندەتتەردى بەلگىلەپ بەرمەك.
– 2022 جىلى فۋتبولدان الەم چەمپيوناتىن وتكىزگەن ەل رەتىندە قاتار سپورتسۇيەر قاۋىمعا, جالپى كوپشىلىككە تانىس. تانىمالدىقتىڭ ناتيجەسىندە بۇل ەلگە ساياحاتتاپ بارىپ جاتقان حالىق سانى دا ارتقان بولار. وزىمىزگە ورالساق, قازاقستاندا ءتۋريزمدى دامىتۋعا قىرۋار قارجى ءبولىنىپ جاتىر. تۋريزم جانە سپورت مينيسترلىگى شەتەلدىك تۋريستەر اعىمى ەكى ەسەگە ارتتى دەپ مالىمدەدى. وسى ورايدا قاتار مەملەكەتىنىڭ ازاماتتارى دا قازاقستانعا كوپتەپ ساياحاتتاپ جاتىر دەپ ايتا الامىز با؟
– ارينە, ايتا الامىز. رەسمي ستاتيستيكالىق دەرەكتەرگە سايكەس, 2022 جىلى ەلىمىزگە 553 قاتار ازاماتى ساياحاتتاپ كەلگەن بولسا, بىلتىر ولاردىڭ سانى ءبىر مىڭعا جۋىقتادى. شىن مانىندە, قاتاردان قازاقستانعا تۋريست رەتىندە كەلگەن ادام سانى بۇدان دا كوپ, ويتكەنى رەسمي ستاتيستيكا تەك قاتار ازاماتتىعىنا يە ادامداردى ەسەپكە الادى. الايدا قاتار مەملەكەتىندە تۇرعىنداردىڭ باسىم كوپشىلىگى باسقا ەلدەردىڭ ازاماتتارى ەكەنىن اتاپ وتكەن ءجون.
تىكەلەي رەيستەر سانىنىڭ ارتۋى – مۇنىڭ ناقتى كورسەتكىشى. بيىل جاڭا باعىتتار ىسكە قوسىلادى. قازىر قازاقستان مەن قاتار اراسىندا اپتاسىنا تۇراقتى 14 تىكەلەي رەيس جانە ەلىمىزدىڭ 5 قالاسىنان چارتەرلىك رەيستەر ۇشادى. بۇعان قوسا ازاماتتارىمىز 30 كۇنگە دەيىن ۆيزالىق تالاپتاردان بوساتىلعان. سوندىقتان قاتار مەملەكەتىنەن كەلەتىن تۋريستەر سانى ءالى دە ارتادى دەپ ايتۋعا تولىق نەگىز بار.
قاتار مەملەكەتى دە قازاقستان ازاماتتارى ءجيى باراتىن تۋريستىك ورتالىققا اينالىپ كەلەدى. 2022 جىلى 13 مىڭنان استام ازاماتىمىز قاتارعا ساياحاتتاپ بارسا, بىلتىر بۇل كورسەتكىش 40 مىڭعا جۋىقتادى.
ەلىمىزدىڭ تانىمالدىعىن ارتتىرۋ ماقساتىندا تۋريزمگە جاۋاپتى مەكەمەلەرىمىزبەن بىرلەسىپ, دوحاداعى تۋريستىك كورمەلەرگە دە بەلسەندى تۇردە قاتىسىپ وتىرامىز. ءتۇرلى روۋد-شوۋلار ۇيىمداستىرىلادى. قازىر دوحادا ەلىمىزگە ساياحات ۇيىمداستىراتىن بىرنەشە قاتار كومپانياسى بار, ولاردىڭ سانى ارتىپ كەلەدى.
بيىل وسى باعىتتاعى كۇش-جىگەرىمىزدى ەسەلەۋدى جوسپارلاپ وتىرمىز. دوحا قالاسىندا بىرقاتار مادەني ءىس-شارا وتكىزۋ كوزدەلگەن. ونىڭ ىشىندە بيىل قىركۇيەكتە استانادا وتەتىن ايتۋلى دودا – حالىقارالىق كوشپەلىلەر ويىنىنا جەرگىلىكتى حالىقتىڭ نازارىن اۋدارۋعا, قاتارلىق سپورتشىلاردى تارتۋعا مۇددەلىمىز.
– ەندى قاتار مەملەكەتىندە تۇرعىلىقتى ءومىر ءسۇرىپ جاتقان وتانداستارىمىزدىڭ جاي-كۇيىنە توقتالساڭىز. ولار دوحادا قانداي ىسپەن اينالىسادى, جالپى سانى قانشا؟
– بۇگىندە قاتاردا 1 مىڭنان استام قازاقستان ازاماتى تىركەلگەن. ولاردىڭ كوبى ەڭبەك ەتۋ ماقساتىمەن بارعان. سونىمەن قاتار 50-گە جۋىق ازاماتىمىز سول ەلدەگى جوعارى وقۋ ورىندارىندا ءبىلىم الىپ جاتىر. بۇعان قوسا وندا كاسىپكەرلىكپەن اينالىساتىن ازاماتتارىمىز دا بار.
جالپى, ەلىمىزدەن قاتارعا بارىپ جۇمىس ىستەپ جاتقان وتانداستارىمىزدىڭ كوبى ەنەرگەتيكا, مەديتسينا, قارجى, ازاماتتىق اۆياتسيا سالالارىندا ەڭبەك ەتەدى. ايتا كەتەرلىگى ازاماتتارىمىزدىڭ باسىم كوپشىلىگى – حالىقارالىق ەڭبەك نارىعىندا سۇرانىسقا يە اسا بىلىكتى ماماندار.
اسىرەسە مۇناي-گاز سەرۆيسى سالاسىندا ازاماتىمىز كوپ. قاتاردا بۇل سالا وكىلدەرىنە دەگەن سۇرانىس وتە جوعارى. ەلىمىزدەگى ءىرى مۇناي-گاز جوبالارىن كەڭەيتۋ جۇمىستارىنىڭ اياقتالۋىن ەسكەرە وتىرىپ, مۇناي-گاز سەرۆيسى ماماندارىمىز ءۇشىن قاتار كەلەشەگى زور ەل رەتىندە قاراستىرىلادى. بۇل تۋرالى مەملەكەت باسشىسى بىلتىر قىركۇيەك ايىندا وتاندىق بيزنەس وكىلدەرىمەن وتكىزگەن كەزدەسۋىندە مالىمدەگەنى بەلگىلى.
سونىمەن قاتار بىرقاتار ازاماتتارىمىز قاتاردىڭ ۇلتتىق كومپانيالارىندا جانە دوحاداعى ءىرى حالىقارالىق كومپانيالاردا باسشى لاۋازىمدارىنا يە. ولار الەمنىڭ تۇكپىر-تۇكپىرىنەن ۇزدىكتەر باس قوسقان مەكەمەلەردە جۇمىس ىستەۋ ارقىلى قۇندى تاجىريبە جينايدى. ەڭ باستىسى, قاتارداعى ازاماتتارىمىزبەن ءجيى كەزدەسەمىز. ولار ءوز بولاشاعىن قازاقستانمەن بايلانىستىراتىنىن ايتىپ وتىرادى.
– ەكىجاقتى قاتىناستاردى تالقىلاي وتىرىپ, ماڭىزدى ماسەلەلەردىڭ ءتۇيىنىن تارقاتتىڭىز. مەملەكەت باسشىسىنىڭ الداعى ساپارى ەلىمىز ءۇشىن جەمىستى بولادى دەگەن ويدامىز.
– راسىندا, پرەزيدەنتىمىزدىڭ قاتار ەلىنە تۇڭعىش مەملەكەتتىك ساپارىنان كۇتەرىمىز كوپ. كۇن ءتارتىبى اسا وزەكتى ماسەلەلەردى قامتيدى. ەكى ەل باسشىلارى ساياسي, ساۋدا-ەكونوميكالىق جانە مادەني-گۋمانيتارلىق ىنتىماقتاستىقتىڭ بارلىق باعىتى بويىنشا ۋاعدالاستىقتاردى سارالاپ, بولاشاققا ناقتى جوسپارلاردى ايقىنداپ بەرەدى. بۇعان قوسا, عىلىمي, اسكەري جانە اقپاراتتىق تەحنولوگيالار سالاسىنداعى سەرىكتەستىكتىڭ كەلەشەگى تالقىلانادى.
الەمدە تۇراقسىزدىق بەلەڭ العان كەزدە سەنىمدى سەرىكتەستەرىمىزبەن بايلانىستى بۇرىنعىدان دا كۇشەيتە ءتۇسۋ – قاجەتتىلىك. حالىقارالىق ارەنادا قاتار بىرنەشە رەت ەلىمىزگە قولداۋ كورسەتۋدە ايانىپ قالعان جوق. بىزدە دە «دوس بولساڭ – بەرىك بول» دەگەن حالىق دانالىعى بار ەمەس پە؟
مەملەكەت باسشىسى قازاق-قاتار قاتىناستارىن جاڭا ساپالى دەڭگەيگە كوتەردى. ساياسي ديالوگ نىعايدى, ەكونوميكالىق جوبالار ىسكە قوسىلىپ جاتىر, ەكى ەل حالىقتارىنىڭ بايلانىسى ارتىپ, الىس-بەرىسى ۇلعايدى. ءبىزدىڭ مىندەتىمىز – ونى ەسەلەۋ.
– اڭگىمەڭىزگە راحمەت.
اڭگىمەلەسكەن –
قامبار احمەت,
«Egemen Qazaqstan»
