اۋعانستانداعى سوعىس ارداگەرلەرى مەن مۇگەدەكتەرىن ۇيلەستىرۋ كەڭەسىنىڭ توراعاسى مۇرات ابدىشۇكىروۆ 22 296 وتانداسىمىزدىڭ اۋعان سوعىسىنا قاتىسقانىن, 929 ادام قازا تاۋىپ, 19 ادام حابار-وشارسىز كەتىپ, مىڭداعان ازامات مۇگەدەك بولىپ ورالعانىن اتاپ ءوتتى. بەس وتانداسىمىزعا كەڭەس وداعىنىڭ باتىرى, بىرەۋىنە حالىق قاھارمانى اتاعى بەرىلسە, ەكى جاۋىنگەر «ايبىن» وردەنىمەن ماراپاتتالعان.
«الماتى اكىمدىگى ارداگەرلەردى ۇدايى قولدايدى. 15 اقپان قارساڭىندا جانە 9 مامىرعا قاراي ينتەرناتسيوناليست جاۋىنگەرلەر 100 مىڭ تەڭگەدەن الادى. اۋعان سوعىسىنىڭ ارداگەرلەرى مەديتسينالىق كورسەتكىشتەرى بويىنشا ساناتوري-كۋرورتتىق ەم الۋعا قۇقىلى. قازىر كۆوتا جىلىنا 170 جولداماعا دەيىن ۇلعايتىلدى. مۇنىڭ ءبارى بىزگە سول سوعىس تۋرالى, جەرلەستەرىمىزدىڭ ەرلىگىن ۇمىتۋعا قۇقىق بەرمەيدى. ءوز باتىرلارىن قۇرمەتتەيتىن جانە ماقتان تۇتاتىن حالىق – ۇلى حالىق», دەيدى م.ابدىشۇكىروۆ.
اتاۋلى كۇن قارساڭىندا الماتىدا بىرقاتار اۋقىمدى ءىس-شارا وتپەك. اتاپ ايتساق, 15 اقپان كۇنى 28 گۆاردياشى-پانفيلوۆشىلار ساياباعىندا اۋعانستاندا قازا تاپقان الماتىلىقتاردى ەسكە الۋ ماقساتىندا «ماڭگىلىك الاۋ» مونۋمەنتىنە گۇل شوقتارىن قويۋ ءراسىمى وتەدى. قالانىڭ بارلىق اۋدانىندا ينتەرناتسيوناليست جاۋىنگەرلەرگە قۇرمەت كورسەتىلىپ, اسكەري قويان-قولتىق ۇرىس شەبەرلەرىنىڭ كورمە قويىلىمدارى مەن اسكەري-پاتريوتتىق كونتسەرتى ۇيىمداستىرىلماق. ال 14 اقپاندا ورتالىق مەملەكەتتىك مۋزەيدە مەرەيتويلىق كۇنگە ارنالعان كورمە اشىلادى.
«كوك بايراق» قوعامدىق بىرلەستىگىنىڭ توراعاسى اۋەز بەيسەنباەۆ, وتكىزىلەتىن ءىس-شارالار جاس ۇرپاقتى تاريحپەن تانىستىرۋ ءۇشىن قاجەت ەكەنىن اتاپ ءوتتى. سونىمەن قاتار الماتى قالاسىنىڭ بارلىق وقۋ ورنىندا جاستاردىڭ بويىندا پاتريوتيزم سەزىمىن وياتۋ ماقساتىندا «ەرلىك ساباقتارى» وتكىزىلەدى. ۇيىمداستىرۋشىلار قالا تۇرعىندارى مەن قوناقتارىن ءىس-شارالارعا بەلسەنە قاتىسۋعا شاقىردى.
الماتى
