فوتو: stan.kz
اۋداندىق توتەنشە جاعدايلار ءبولىمىنىڭ حابارلاۋىنشا, قىزىلكەسىك اۋىلىنىڭ تۇرعىندارىنان – 50, توتەنشە جاعدايلار بولىمىنەن – 11 ادام, 2 موتوپومپا, 2 تەحنيكا جۇمىلدىرىلعان. سونداي-اق 200 قاپ ينەرتتى ماتەريالدارمەن سۋ جايىلعان اۋماقتاردى بەكىتۋ جۇمىستارى جۇرگىزىلدى. اۋىل اكىمى ءو. مازەنوۆتىڭ ايتۋىنشا, كەشە تۇندە جاعداي تولىقتاي تۇراقتالعان, باسپانالار سۋ باسۋ قاۋپىنەن امان.
سونىمەن بىرگە, قاراعاندى–اياگوز–بوعاس اۆتوجولىنىڭ بويىنداعى جىڭىشكە ۋچاسكەسىنىڭ 3 تۇسىنان قار سۋى اعىپ وتكەن. ابىروي بولعاندا, «قازاۆتوجولعا» قاراستى دەۋ-31 مەكەمەسى ماماندارى مەن تەحنيكالارىنىڭ دەر كەزىندە اتقارعان جۇمىستارىنىڭ ناتيجەسىندە كولىك قاتىناسى جەدەل رەتتەلگەن. ويشىلىك–اقسۋات–قۇمكول باعىتىنداعى جول قاتىناسى دا ادەتتەگىدەي قالىپتى جاعدايدا ءجۇرىپ جاتىر.
ويشىلىك اۋىلدىق وكرۋگىنىڭ كوككەمەر قىستاۋىنا دا ەرىگەن قار سۋى كىرگەن. مۇنداعى بەس ءۇيدىڭ ەكەۋى بوكتەردە ورنالاسقاندىقتان جاعدايىنا الاڭداۋشىلىق بولماعانىمەن, ءبىر ءۇيدىڭ اۋلاسى, قوراسى سۋ استىندا قالعان. جەرگىلىكتى اتقارۋشى بيلىكتىڭ ۇيىمداستىرۋىمەن 2 تەحنيكا جىبەرىلىپ, كوككەمەردەگى ءبىر ايەل ادام دەر كەزىندە ويشىلىك اۋىلىنا ورنالاستىرىلدى.
ويشىلىك اۋىلىندا قارعىن سۋ دامباعا تىرەلىپ, اۋىلدىڭ شىعىس جانە باتىس جاعىمەن ەكىگە ءبولىنىپ تاسي اققان. سول جەردەگى 1 ءۇيدىڭ اۋلاسىنا, 3 ءۇيدىڭ قورا-جايىنا سۋ كىرگەنىمەن, ادامدارىنا قاۋىپ تونگەن جوق. ول جەردە 2 جۇك تيەگىش, 2 ماز كولىگى, 3 تراكتور, 15 ادام جۇمىلدىرىلىپ, دايىندالعان ينەرتتى ماتەريالداردى توگىپ, بوگەتتى قومداۋ جۇمىستارى جۇرگىزىلىپ جاتىر.
– قارعىن سۋ ءبىزدىڭ ءۇيدىڭ جانىنان اعىپ وتە شىقتى. اۋدانداعى توتەنشە جاعدايلار بولىمىنەن ءتيىستى كومەك دەر كەزىندە كەلدى. اۋىل بولىپ ۇيىمداستىرۋ جۇمىستارىنا ءبارىمىز دە قاتىستىق. ايتەۋىر بۇگىن قار جاۋىپ, اياز ءتۇسىپ, سۋ جايىلىسىنىڭ ءارى قاراي كەتۋى دەر كەزىندە توقتادى. مالىمىز ءدىن امان, – دەيدى ويشىلىك اۋىلىنىڭ تۇرعىنى رۋسلان قاناپيەۆ.
قازىرگى ۋاقىتتا ەرىگەن قار سۋىنىڭ كولەمى ازايدى, قاۋىپ سەيىلدى.
اباي وبلىسى
