ءىس-شارانى اشقان ءماجىلىس سپيكەرى, «Amanat» پارتياسىنىڭ توراعاسى ەرلان قوشانوۆ پرەزيدەنتىمىزدىڭ جەدەل شەشۋدى قاجەت ەتەتىن ەڭ ماڭىزدى ماسەلەلەردى ايقىنداپ بەرگەنىن اتاپ ءوتتى. «مەملەكەت باسشىسى قاسىم-جومارت توقاەۆ تاپسىرمالاردى ورىنداۋعا ءتيىمسىز بيۋروكراتيالىق تاسىلدەر كەدەرگى كەلتىرىپ وتىرعانىن اتاپ ءوتتى. بۇگىندە ناقتى ناتيجەگە باعىتتالعان كاسىبي ءتاسىل قاجەت. بۇل قاعيدانى ءبىز زاڭ شىعارۋ بارىسىندا دا ۇستانۋىمىز كەرەك. ماجىلىستە ازىرلەنگەن ءاربىر زاڭ پرەزيدەنتتىڭ مەملەكەتتى دامىتۋ مەن حالىقتىڭ ءال-اۋقاتىن ارتتىرۋدى كوزدەيتىن مىندەتتەرىن جۇزەگە اسىرۋ ءۇشىن جۇمىس ىستەۋى ءتيىس», دەدى ول.
ءماجىلىس سپيكەرى مەملەكەت باسشىسى «Amanat» ۇسىنعان ۇمىتكەردى پرەمەر-مينيستر لاۋازىمىنا تاعايىنداعانىن جانە بۇل شەشىم پرەزيدەنتتىڭ پارتياعا دەگەن زور سەنىمىن كورسەتكەنىن اتاپ ءوتتى. «مەملەكەت باسشىسى ەكونوميكا ءوسىمىن جىل سايىن كەمىندە 6 پايىز دەڭگەيىندە ۇستاپ وتىرۋ جانە 2029 جىلعا قاراي ءىجو كولەمىن 450 ملرد دوللارعا جەتكىزۋ جونىندە الدىمىزعا ناقتى مىندەت قويدى. وسىعان بايلانىستى, پارلامەنت دەپۋتاتتارى مەن ۇكىمەت مۇشەلەرى بىرلەسىپ, تىعىز جۇمىس ىستەۋى كەرەك. الدا تۇرعان بارلىق تاپسىرمانى تەك ءبىر جۇدىرىق بولىپ جۇمىلساق قانا ءتيىمدى جۇزەگە اسىرا الامىز», دەدى ەرلان قوشانوۆ.
پرەزيدەنت تاپسىرمالارىن ورىنداۋعا ارنالعان جيىن بارىسىندا پارتيا فراكتسياسىنىڭ مۇشەلەرى دە ءسوز الدى. اسحات ايماعامبەتوۆ حالىقتى مەملەكەتتىك الەۋمەتتىك قولداۋ تەتىكتەرىن قايتا قاراۋ, نۇرتاي سابيليانوۆ قۇرىلىس كودەكسىنە جانە مەملەكەتتىك ساتىپ الۋ جونىندەگى جاڭا زاڭ جوباسىنا تۇزەتۋ ەنگىزۋدە دەپۋتاتتار تاراپىنان اتقارىپ جاتقان جۇمىستاردى, سەرگەي پونومارەۆ سۋ رەسۋرستارىن ءتيىمدى پايدالانۋ جانە سۋ كودەكسىن ازىرلەۋ, بولاتبەك ناجمەتدين ۇلى كولىك-لوگيستيكالىق الەۋەتتى دامىتۋ, بەرىك بەيسەنعاليەۆ بيۋدجەت جانە سالىق ساياساتىنىڭ تيىمدىلىگىن ارتتىرۋعا قاتىستى ءوز ۇسىنىسىن ايتتى. ال نۇرجان اشىمبەتوۆ پرەزيدەنتتىڭ اۋىل شارۋاشىلىعى باعىتىنا قاتىستى تاپسىرمالارىن جۇزەگە اسىرۋ جوسپارلارى تۋرالى مالىمەت بەردى. جيىندى قورىتىندىلاي كەلە, ءماجىلىس سپيكەرى ەرلان قوشانوۆ «Amanat» فراكتسياسى پرەزيدەنت تاپسىرمالارىن جۇزەگە اسىرۋ جۇمىسىن كۇشەيتۋگە ءتيىس ەكەنىن اتاپ ءوتتى.
