كىلەمدە تاجىريبەلى جاۋىنگەر-سپورتشىلارمەن قاتار, اسكەرگە دەيىنگى كۇرەسپەن اينالىسقان جاس ساربازدار دا قاتىسۋعا مۇمكىندىك الدى. جارىسقا سەگىز سالماق دارەجەسىندە اسكەري ءبولىم بولىمشەلەرىنىڭ قۇراما كوماندالارى اتىنان 80 اسكەري قىزمەتشى شىقسا, ونىڭ ىشىندە 18 مەرزىمدى قىزمەت ساربازى بولدى.
جارىستا جاۋىنگەر-سپورتشىلار بىرىنشىسىنەن سوڭعىسىنا دەيىن جوعارى دايىندىق پەن لايىقتى ناتيجە كورسەتتى. ال تورەشىلىك قاتاڭ تارتىپتە, كورنەكى باقىلاۋدى جانە بەينەباقىلاۋدى قولدانۋمەن ءوتتى.
جارىستى ءبولىم كومانديرىنىڭ مىندەتىن ۋاقىتشا اتقارۋشى پودپولكوۆنيك ايدوس يساەۆ اشتى. ول ۇجىمنىڭ جاۋىنگەرلىك دايىندىعى مەن اسكەري رۋحىن ساقتاۋ ءۇشىن وسىنداي سپورتتىق ءىس-شارالاردىڭ ماڭىزدىلىعىن ايتىپ ءوتتى.
«بىرىنشىلىكتىڭ باستى ماقساتى − اسكەري قىزمەتشىلەردىڭ دەنە دايىندىعىن جەتىلدىرۋ, ولاردا جەڭىسكە دەگەن ەرىك-جىگەر مەن جوعارى ناتيجەگە ۇمتىلۋ سياقتى ماڭىزدى قاسيەتتەردى دامىتۋ», دەپ اتاپ ءوتتى پودپولكوۆنيك ايدوس يساەۆ.
التى ساعاتتىق قايسار رۋح, بىلەك كۇشى مەن پىسىقتالعان تەحنيكا جەكپە-جەگىندە بىرىنشىلىكتىڭ جەڭىمپازدارى مەن جۇلدەگەرلەرى انىقتالدى. جالپى كوماندالىق ەسەپتە ارتيللەريا ديۆيزيونىنىڭ اسكەري قىزمەتشىلەرى ۇزدىك ناتيجە كورسەتىپ, اۋىسپالى كۋبوكتىڭ يەگەرى اتاندى.
ولاردىڭ ارتىندا ەكىنشى جانە ءبىرىنشى موتواتقىشتار باتالوندارىنىڭ جاۋىنگەر-سپورتشىلارى ورنالاستى. جەڭىمپازدار كومانداسى الداعى ۋاقىتتا وتەتىن «وڭتۇستىك» وڭىرلىك قولباسشىلىعىنىڭ اسكەري بولىمدەرى اراسىندا وتەتىن جارىستاردا مەحانيكالاندىرىلعان بريگادانىڭ نامىسىن قورعايتىن بولادى.
