وسىلايشا بيىل دا الماتىدا قازاقستان كورەيلەر قاۋىمداستىعى شىعىس جاڭا جىلىن ايتا-ايتا جۇرەرلىكتەي اتاپ ءوتىپ, رەسپۋبليكا سارايىندا وتكەن مەيرامعا ەكى مىڭنان استام قوناق, بىرنەشە جۇزدەگەن ونەر مايتالماندارىن جينادى. يۋنەسكو-نىڭ ماتەريالدىق ەمەس مادەني مۇرالار تىزىمىنە ەنگەن كورەي ۇلتتىق ءانى «اريراننىڭ» 60 شاقتى نۇسقاسى, 3600-دەي ءتۇرى بولسا, سونىڭ ءبىر عانا ۆارياتسياسىن ءتورت بىردەي حور – «رودينا», بيدانگيل, «ەدەلۆەيس», «رادۋگا» انسامبلدەرى ورىندادى. ال «نامسون» حالىقتىق بي ءانسامبلى, «نامسون» بالالار حورى, «حاسساك» ەتنوفولكلورلىق ءانسامبلى, «ساران», «بيدۋلگي» انسامبلدەرى, «Namson family» كورەي ونەرى ستۋدياسى, «ينسام» شوۋ-توبى, رەسپۋبليكالىق مەملەكەتتىك اكادەميالىق كورەي مۋزىكالىق كومەديا تەاترى ساحنانى ناعىز مەرەكەلىك سالتاناتقا بولەدى.
ايتقانداي, الماتىداعى كورەي مۋزىكالىق كومەديا تەاترى قازاقستاندا عانا ەمەس, الەمدەگى ەڭ العاشقى ەتنيكالىق جانە كورەي تۇبەگىنەن تىس جالعىز مەملەكەتتىك ءارى ەرەكشە تاعدىرلى كورەي تەاترى ەكەنىن ايتا كەتۋ كەرەك.
ال ەكى مىڭ جىلدىق تاريحى بار سوللال مەيرامىنا قايتا ورالاتىن بولساق, ول ەڭ باستى ءارى قوعامدىق ماڭىزدى مەرەكە رەتىندە 1989 جىلى عانا رەسمي تىركەلگەندىكتەن, كورەيانىڭ وزىندە ءبىزدىڭ تاۋەلسىزدىك بەدەرىندەگى ناۋرىز مەيرامى سياقتى, سوڭعى 15-20 جىلدا اۋقىمدى دەڭگەيدە تويلانا باستاعان. دەگەنمەن, كورەي حالقىنىڭ ۇلكەندەرى اي كۇنتىزبەسى بويىنشا كەلەتىن جاڭا جىلىن ۇمىتتىرماۋ ءۇشىن وتباسىندا دارىپتەپ, داستۇرلەرىن جاساپ وتىرعان دەسەدى.
سوللال مەرەكەسى ىقىلىم زامانداردا بىرنەشە اپتا قاتارىنان تويلانسا, ونىڭ العاشقى جانە سوڭعى كۇنى اسا ماڭىزدى بولعاندىقتان, جاستار بيىك قىراتتارعا, توبەگە جۇگىرىپ شىعىپ, كىم ءبىرىنشى تولعان ايدى كورسە سول ادام جىل بويى باقىتقا كەنەلەدى دەپ سەنگەن. ال قازىرگى زاماناۋي كورەيا بۇل مەيرامدى ءۇش كۇن قاتارىنان تويلايدى جانە وتباسىلىق مەرەكە بولعاندىقتان, ءاربىر ادام تۋعان ۇيىنە, اكە-شەشەسىنە اسىعادى. ادەت-عۇرىپ بويىنشا الدىمەن چحارە – وتكەن-كەتكەن اتا-بالاردى ەسكە الۋ راسىمىنە ارنالعان داستارحان جايىلادى. ەكىنشى ءراسىم – سەبە. ۇلكەندەر مەرەكە كۇنى تاڭەرتەڭ مىندەتتى تۇردە كىشكەنتاي بالالارعا سەبەدون تاراتقان كەزدە ەرەسەكتەر بەتىن وڭتۇستىككە, حانبوكي (ۇلتتىق كيىم) كيگەن بالا-شاعا سولتۇستىككە قاراپ تۇرادى. بالالار جاسىنان قاراي, ۇلكەنىنەن باستاپ ءيىلىپ سالەم بەرىپ, اتا-اجەلەرى باتا, ريزاشىلىق رەتىندە اقشا تاراتادى. وسىدان كەيىن عانا ءۇي ءىشى ءۇشىنشى راسىمگە ورالىپ, وتكەن ارۋاقتارعا جايىلعان داستارحان باسىنا جينالىپ, وتكەن كىسىلەردەن دەنساۋلىق, وتباسىنىڭ اماندىعىن سۇراپ, دامنەن اۋىز تيەدى. سوللال مەرەكەسىن قىسقاشا وسىلاي سيپاتتاۋعا بولادى.
الماتىداعى مەرەكە, الدىمەن قازاقستان رەسپۋبليكاسىنىڭ انۇرانىمەن باستالىپ, قولدارىن جۇرەكتەرىنە باسىپ, دۇرك ەتىپ كوتەرىلگەن وتانداستارىمىزعا قازاقستان كورەيلەرى قاۋىمداستىعىنىڭ توراعاسى, بەلگىلى كاسىپكەر يۋري شين جۇرەكجاردى لەبىزىن ارنادى.
يۋري گەرمانوۆيچ: «جاڭا جىل – وتكەنگە ەسەپ بەرىپ, الداعى كۇندەرگە جوسپار قۇراتىن ۋاقىت قانا ەمەس, قوشتاسقان جىلدا بىزگە قولداۋ بىلدىرگەن, كومەكتەسكەن, بارشامىزدىڭ ورتاق ءۇيىمىز – قازاقستاننىڭ كوركەيۋىنە, كورەيلەر قاۋىمداستىعىنىڭ دامۋىنا ۇلكەس قوسقان ءاربىر ادامعا العىس ايتاتىن كۇن!», دەي كەلە, كورەي ءتىلى مەن ءداستۇرىن ۇمىتتىرماي, جالعاستىرىپ كەلە جاتقان قانداستارىنا تاعزىم ەتتى.
ء«بىزدىڭ ارقايسىمىز قازاقستاندىقپىز, ءوز بويىندا تالانتىمەن بىرگە كەمشىلىكتەرى دە بار قاراپايىم ادامدارمىز. ءبىر شاڭىراقتىڭ استىندا تۋىلعان ارقايسىمىزدىڭ قازاقستان ازاماتى بولۋعا قۇقىعىمىز بار. ءبىز ءبارىن بىردەي قۇرمەتتەپ, ءاربىر وتانداسىمىزدى باعالاۋىمىز كەرەك. ءبىز ءارتۇرلىمىز, بىراق تەڭبىز جانە ءبىز ءبىرتۇتاسپىز. ءسىز بەن ءبىز ءۇشىن, بالالارىمىزدىڭ, ەلىمىزدىڭ جارقىن بولاشاعى ءۇشىن وتانىمىزدى ءسۇيىپ, ەلىمىزدىڭ ءار قالاسىنا, ءار اۋىلىنا سەنەيىك! ۇلتارالىق بىرلىكتىڭ كۇشى ارقىلى ەلىمىزدىڭ ابىرويىن اسقاقتاتا بەرەيىك. ويتكەنى, ءبىز ۇلى جاۋىنگەرلەردىڭ ۇرپاعىمىز! ۇلى دالا, ۇلى ەل, ۇلى قازاقستان, سوللال مەرەكەسى قۇتتى بولسىن», دەدى يۋري شين.
قۇتتىقتاۋلار لەگىن وڭتۇستىك كورەيانىڭ الماتىداعى باس كونسۋلدىعىنىڭ باس كونسۋلى نەچحون پاك جالعاستىردى. سالتاناتتى وقيعا اياسىندا قر مادەنيەت جانە اقپارات مينيسترلىگىنىڭ پارمەنىمەن «نامسون» كورەي بي انسامبلىنە «حالىقتىق» (ۇلگىلى) كوركەمونەرپازدار ۇجىمى اتاعى بەرىلىپ, مارتەبەلى سىيلىق انسامبل جەتەكشىسى مارينا كيمگە تاپسىرىلدى.
قۇتتىقتاۋلار ساحنانى ەرتەگىدەي الەمگە الماستىرعان, بۇكىل مۋزىكالىق تەحنولوگيالاردىڭ تابىسىن توعىستىرعان عالامات كونتسەرتكە ۇلاستى.
