جولدار جابىلعالى ءتۇرلى جول ۋچاسكەلەرىندە 5 مىڭنان اسا تەحنيكانىڭ قوزعالىسى توقتاتىلعان. ودان بولەك, باقىلاۋ-وتكىزۋ پۋنكتتەرىندەگى تەحنيكانى ازايتۋ ماقساتىندا كولىك مينيسترلىگىنىڭ جول تەحنيكاسى مەن بولىمشەلەردىڭ كۇشىمەن 27 اۆتوكولوننا ۇيىمداستىرىلىپ, 4 مىڭنان استام كولىكتى دىتتەگەن جەرىنە جول باستاپ, جەتكىزگەن.
ءتىپتى الدىن الا تەلەفونعا اۋا رايىنىڭ كۇرت بۇزىلاتىنىن, جولدار جابىلاتىنىن ايتىپ, كۇنىنە بىرنەشە مارتە حابارلاما جولدايدى. سونىڭ ءوزىن كوزىنە ىلمەگەن جۇرگىزۋشىلەر كوبەيمەسە, ازايماي تۇر.
– تۇرعىنداردى ەسكەرتۋ ماقساتىندا اۋا رايىنىڭ ناشارلاۋى جانە جولدارداعى كولىك قوزعالىسىنىڭ شەكتەلۋى تۋرالى قىستىڭ العاشقى ەكى ايىندا 80 حابارلاما ميلليوننان اسا ابونەنتكە جەتتى. ال «Darmen» ءموبيلدى قوسىمشاسى ارقىلى توتەنشە جاعدايلاردىڭ الدىن الۋ تۋرالى 47 اقپارات جاريالاندى. وبلىستاعى 13 راديوستانسادا حالىقتى حاباردار ەتۋ ءۇشىن 21 رەت حابارلاندىرۋ بەرىلدى, – دەيدى وبلىستىڭ توتەنشە جاعدايلار دەپارتامەنتى باسشىسىنىڭ ورىنباسارى, پولكوۆنيك اقىلبەك احمەتجانوۆ.
مۇنداي جاعدايدا جول ۋچاسكەلەرىنە جۇمىلدىرىلاتىن ارنايى تەحنيكا دا, كۇشتىك قۇرىلىم قىزمەتكەرلەرى دە كوپ. بىلتىر 29 جەلتوقسانداعى اقتۇتەك بوراندا 908 ادام مەن 505 تەحنيكا تارتىلعان. توتەنشە جاعدايلار كۇشتەرى, جول پوليتسياسى جانە جول ۇيىمدارىنىڭ كۇشىمەن 66 اۆاريالىق-قۇتقارۋ, 9 ىزدەستىرۋ-قۇتقارۋ جۇمىستارى كەزىندە 259 ادام قۇتقارىلدى. قۇتقارىلعان 259 ادامنىڭ 36-cى – بالا.
ء«ۇش مىڭعا تارتا ادام – قار قۇرساۋىنان, 121 تەحنيكا درەيفتەن شىعارىلدى. جەرگىلىكتى بيلىكپەن بىرلەسە وتىرىپ, 1 324 ادام, ونىڭ ىشىندە, 150 بالا جىلىتۋ ورتالىقتارىنا ورنالاستىرىلدى», دەيدى اقىلبەك قوسمان ۇلى.
جالپى, وبلىستا رەسپۋبليكالىق ماڭىزى بار جول – 1 853,5 شاقىرىم. وسىنىڭ ىشىندە جوندەۋ جۇمىستارى جۇرگىزىلىپ جاتقانى مەن قايتا جاڭعىرتۋدان ءوتىپ جاتقانىن قوسپاعاندا 1 444 شاقىرىم. وسى ءبىر ارالىقتاعى جولدى قاردان تازالايتىن, كۇتىپ-باپتايتىن كومپانيا – «كاجسەرۆيس» جاۋاپكەرشىلىگى شەكتەۋلى سەرىكتەستىگى.
«قازاۆتوجول» ۇك» اق قاراعاندى وبلىستىق فيليالىنىڭ ديرەكتورى ەرلان جۇماعۇلوۆتىڭ ايتۋىنشا, كومپانيا بيىلدىڭ وزىندە جاڭادان 29 قار جيناۋ تەحنيكاسىن ساتىپ العان.
– جاي كۇندەرى – 50-60 تەحنيكا, ال توتەنشە جاعدايلاردا, اۋا رايى ناشارلاعاندا 100-گە تارتا كولىك جولعا شىعادى. مۇنداي كۇندەرى قىزمەتكەرلەر دەمالماستان, ەكى اۋىسىمدا جۇمىس ىستەيدى, – دەيدى ەرلان جۇماعۇلوۆ.
جول جايلى ءسوز قوزعالا كەتسە بولدى, جولاۋشىلاردىڭ دەنى «قازاۆتوجول» ۇك» اق-عا دەگەن نارازىلىعى بارىن ايتادى. «رەسپۋبليكالىق ماڭىزى بار جولدارعا ۋاقتىلى قۇم نەمەسە تۇز سەبىلمەيدى» دەگەن سىن ءجيى الدان شىعادى. بۇعان فيليال باسشىسى ەرلان جۇماعۇل ۇلىنىڭ ايتار ءوز ءۋاجى بار. ايتۋىنشا, قۇم مەن تۇز قوسپاسىن سەبۋدىڭ دە كليماتتىق ءتارتىبى بار. «كليمات جاعدايىنا كەلەتىن بولسا, وسى قوسپا تۇراقتى تۇردە سەبىلەدى», دەيدى ول.
اۋا رايىنىڭ قولايسىزدىعىنا بايلانىستى جولداردى جابۋ ءبىر عانا ورگاننىڭ قۇزىرىندا ەمەس. وبلىستىڭ پوليتسيا دەپارتامەنتىنىڭ جەرگىلىكتى پوليتسيا قىزمەتى باسقارماسى باسشىسىنىڭ ورىنباسارى باۋىرجان حانتەمىروۆ «قازاۆتوجول» ۇك» اق, توتەنشە جاعدايلار قىزمەتى جانە وبلىستىڭ پوليتسيا دەپارتامەنتىنىڭ ءوزارا كەلىسىمى ارقىلى جۇرگىزىلەدى.
– بىلتىر جەلتوقساننىڭ سوڭى مەن بيىل قاڭتار ايىنىڭ باسىندا قار قالىڭ جاۋدى. استانا قالاسىنا بارار جولدا قالعان 4 مىڭعا تارتا كولىكتى جەتكىزدىك. تۇرعىندار جولعا شىعار الدىندا ءوز قاۋىپسىزدىكتەرى ءۇشىن حابارلامالارعا ءمان بەرىپ, كولىكتەرىن سايلاپ شىققانى دۇرىس, – دەيدى باۋىرجان انداقۇل ۇلى.
قالا ىشىندەگى اۋا رايى جاقسى ەكەن دەپ, سوڭىندا جارتى جولدا قالاتىندار بار. كۇن رايىنىڭ احۋالىن اڭداماي, جولعا شىعۋ وتە قاۋىپتى.
– تۇرعىندار قالا سىرتىنداعى اۋا رايىنىڭ قانداي ەكەنىن بىلمەيدى. جول جابۋ – كەزدەيسوق قابىلدانا سالاتىن شەشىم ەمەس. جول بويىندا پاترۋلدە جۇرگەن قىزمەتكەرلەر جاعدايدى بىزگە بەينە جانە فوتوماتەريالدار ارقىلى جىبەرەدى. سونى باسشىلىققا الا وتىرىپ, جولدى جابۋ شەشىمى قابىلدانادى. ال تۇرعىنداردىڭ قاۋىپسىزدىگى ءۇشىن كەيىنگى كەزدە راديوحابارلاردى توقتاتىپ قويىپ, جولدىڭ جابىلعانى تۋرالى حابارلاندىرۋ بەرەمىز. ال پوليتسيا قىزمەتكەرلەرى وتە كۇردەلى جاعدايدا جاندارىن شۇبەرەككە ءتۇيىپ, اقتۇتەك بوراندا ىلەسىپ ءجۇرىپ, كولىكتەردى قاۋىپسىز جەرگە جەتكىزەدى. ونى بىرەۋ بىلسە, بىرەۋ بىلمەي جاتادى, – دەيدى اقىلبەك احمەتجانوۆ.
تۇپتەپ كەلگەندە, قۇزىرلى ورگان وكىلدەرى جول-كولىك وقيعالارىن ازايتۋ ماقساتىندا قاجەتتى ءىس-شارالاردى ۇيىمداستىرىپ وتىر. «جول قوزعالىسىنا كەلگەندە اركىمنىڭ ىشكى ءتارتىبى بولۋى قاجەت», دەيدى قۇقىق قورعاۋ ورگانىنىڭ قىزمەتكەرلەرى. ءسىز وزىڭىزبەن قوسا, جاقىندارىڭىزدىڭ دا, جولاۋشىلارىڭىزدىڭ دا اماندىعىنا تىكەلەي جاۋاپتىسىز. سوندىقتان تارتىپكە باعىنۋ – اماندىقتىڭ العاشقى قادامى.
قاراعاندى وبلىسى
