پويىز بيلەتتەرىن قالاي تەز ءارى ارتىق شىعىنسىز الۋعا بولادى؟

كومپانيا قازاقستاندا سۇرانىس كوپ باعىتتار قاتارىندا «الماتى-استانا», «استانا-پاۆلودار», «استانا-قاراعاندى» جانە «استانا-قوستاناي» پويىزدارىن اتادى.

قتج پويىزعا بيلەتتى تەز, ارتىق شىعىنسىز الۋدىڭ 3 قادامىن ايتتى:

1.بيلەتتەردى الدىن-الا ساتىپ الۋ

پويىز بيلەتتەرى رەسمي 45 كۇن بۇرىن ساتىلىمعا شىعادى. جول ءجۇرۋ قاعازىن bilet.railways.kz سايتىنان تىكەلەي نەمەسە ۆوكزالدا ورنالاسقان كاسسالاردان ساتىپ الۋعا بولادى. ساپار ەرتەرەك بەلگىلى بولسا بيلەتتى الدىن-الا الساڭىز اقشاڭىزدى ۇنەمدەيسىز ءارى جول ءجۇرۋ ۋاقىتى تاياعان سايىن بيلەت ازاياتىنىن, تاۋسىلاتىنىن ەسكەرگەن ءجون. بيلەت الۋعا ەرتە قام جاساۋ ارقىلى بارار جەرىڭىزگە قالاعان, قولايلى ورىندا جەتىپ الۋعا مۇمكىندىك بەرەدى.

2. بيلەتتى ونلاين ساتىپ الۋ.

تەحنولوگيا دامىعان بۇگىنگى كەزەڭدە بيلەتتەردى كومپانيانىڭ رەسمي سايتىمەن قاتار, ءتۇرلى پلاتفورمادا وڭاي, جىلدام الۋعا بولادى. بۇل ارەكەت ۆوكزالعا بارىپ-كەلۋ ۋاقىتىڭىزدى ۇنەمدەپ قانا قويماي, جول شىعىنىڭىزدى دا قىسقارتادى. قوسىمشا كوميسسيالىق شەگەرىمدەر دە ۇستالمايدى.

3. جاڭا بيلەتتەردىڭ ساتىلىمعا شىعۋ مەرزىمىن قاداعالاۋ.

ەلدە, اسىرەسە, مەرەكە قارساڭىندا بيلەتتەر جىلدام ساتىلىپ كەتەدى. الايدا بۇل ەندى بيلەتسىز قالۋدى اڭعارتپايدى. 

«بيلەتتەر سانى شەكتەۋلى نەگىزدە ساتىلىمعا شىعادى. سوندىقتان ۇنەمى bilet.railways.kz سايتىن قاداعالاپ وتىرۋ كەرەك. سەبەبى كەي جولاۋشى بيلەتىن قايتارىپ جاتادى. سونىمەن قوسا بيلەتتى «كۇتۋ پاراعى» ارقىلى ساتىپ الۋ مۇمكىندىگى بار. بۇل قىزمەت ارقىلى جول ءجۇرۋ بيلەتتەرىن تابا الماعان جاعدايدا, كۇتۋ پاراعىنا تىركەلىپ, بيلەتتى 7 كۇن بۇرىن جانە پويىز جونەلتىلگەنگە دەيىن ەكى ساعاتتان كەشىكتىرمەي ساتىپ الۋعا مۇمكىندىك بەرىلەدى. سونداي-اق «كۇتۋ پاراعىنا» سايتتا دا تىركەلە الاسىز. ورىن پايدا بولعان جاعدايدا جولاۋشىنىڭ سايتتاعى جەكە كابينەتىنە جانە تەلەفون نومەرىنە بوساعان بيلەتتى ساتىپ الۋ جونىندە سمس-حابارلاما كەلەدى», دەپ ءتۇسىندىردى «قتج» ۇلتتىق كومپانياسىنىڭ ءباسپاسوز قىزمەتى.

بۇدان بولەك بيلەت مۇلدەم تابىلماعان جاعدايدا كەيبىر مەكەمە بەلگىلى ءبىر كۇنگە حابارلاندىرۋ جىبەرۋ قىزمەتىن ۇسىنادى. قىزمەتكە قوسىلعان كەزدە تەلەفونىڭىزعا بيلەتتەر قايتا ساتىلا باستاعانى تۋرالى سمس-حابارلاما كەلەدى.

اقپاراتتى ناقتىلاڭىز

جولاۋشىلار تۋىنداعان ساۋالى مەن شۇعىل اقپاراتتى 1433 ءنومىرى مەن KTZH_PP_BOT Telegram-بوتى جانە @jolaushylar_tasymaly رەسمي Instagram اككاۋنتى ارقىلى تەگىن سۇراپ, بىلە الادى.