فوتو: dknews.kz
زەرگەرلەر ليگاسىنىڭ مالىمەتىنشە, ەلىمىزدە كونترافاكتىلىك تسەحتار جۇمىس ىستەيدى. وندا ارنايى جابدىقتاردىڭ كومەگىمەن تاۋار تۇركيا, يتاليا نەمەسە رەسەيدە جاسالىنعانىن مالىمدەيتىن جالعان شتامپتار بار. ادال كاسىپورىندار كولەڭكەلى نارىقپەن باسەكەگە تۇسە الماي, ءوندىرىستى توقتاتۋعا ءماجبۇر. سوندىقتان وسى جىلدىڭ 1 شىلدەسىنەن باستاپ ەلىمىزگە اكەلىنەتىن نەمەسە ەل اۋماعىندا وندىرىلگەن باعالى مەتالدار مەن اسىل تاستاردان جاسالعان زەرگەرلىك بۇيىمداردى بولشەك جانە كوتەرمە ساۋداعا وتكىزۋ كەزىندە مىندەتتى تۇردە تاڭبالاۋ جۇرگىزىلەتىن بولدى. ال بۇرىن تاڭبالانعان ءونىمدى اينالىمنان مىندەتتى تۇردە الىپ تاستاۋ كەرەك.
تاۋارلاردى تسيفرلىق تاڭبالاۋ جانە قاداعالاۋ جۇيەسىنىڭ نەگىزگى ماقساتى – ەلىمىزدەگى تاۋار اينالىمىن اشىق ەتۋ. سوندىقتان ەل اۋماعىندا باعالى مەتالدار مەن اسىل تاستاردان جاسالعان زەرگەرلىك بۇيىمداردى مىندەتتى تاڭبالاۋدى ەنگىزۋ دارىلىك زاتتاردى تاڭبالاۋ كەزىندەگىدەي كەزەڭ-كەزەڭمەن ەمەس, ءبىر رەتتىك بولادى.
– زەرگەرلىك بۇيىمدار نارىعى كونتراباندا مەن كونترافاكتىلىك تاۋارلارعا تولى كەزدە تسيفرلىق تاڭبالاۋ بيزنەسىمىزدەگى اشىقتىق پەن ادىلدىكتى قامتاماسىز ەتۋدىڭ ماڭىزدى قۇرالىنا اينالادى. تسيفرلىق تاڭبالاۋ تاۋاردىڭ بۇكىل جەتكىزۋ تىزبەگى بويىنشا ءونىمنىڭ قاداعالانۋىن جاقسارتىپ قانا قويماي, تۇتىنۋشىلارعا ولار ساتىپ الاتىن ونىمدەردىڭ تۇپنۇسقالىعىنا سەنىمدىلىك بەرەدى, سونىمەن قاتار تۇتىنۋشىلاردىڭ الاياقتىعىنا جول بەرمەۋ ارقىلى سالانىڭ تۇراقتىلىعىن قامتاماسىز ەتۋگە ىقپال ەتەدى. بۇل تۇتاستاي العاندا, سالاعا تۇتىنۋشىلاردىڭ سەنىمىن ارتتىرۋعا كومەكتەسەدى. مەملەكەتپەن بىرلەسكەن كۇش-جىگەردىڭ ناتيجەسىندە عانا ءبىز نارىقتىڭ تازالىعى مەن اشىقتىعىن قامتاماسىز ەتىپ, بيزنەستى دامىتۋعا جانە تۇتىنۋشىلار سەنىمىنە قولايلى جاعداي جاساي الامىز. بۇل جاۋاپكەرشىلىكتى, ءتىپتى جوسىقسىز كاسىپكەرلەرگە قاتىستى قىلمىستىق جاۋاپكەرشىلىكتى ءبىر مەزگىلدە كۇشەيتكەندە عانا مۇمكىن. بۇل ەكى شارت تۇتىنۋشىلاردى الداۋدان ساقتايدى, – دەيدى زەرگەرلەر ليگاسىنىڭ توراعاسى قايسار جۇماعاليەۆ.
يندۋستريا جانە قۇرىلىس مينيسترلىگى وكىلدەرىنىڭ ايتۋىنشا, بۇگىندە تاڭبالانباعان زەرگەرلىك بۇيىمداردىڭ قالدىقتارىن ساتۋعا رۇقسات ەتىلگەن جانە ولاردى ساتۋعا ازىرگە ايىپپۇل سالىنباعان. دەگەنمەن ساۋدا جانە ينتەگراتسيا مينيسترلىگىنىڭ تەحنيكالىق رەتتەۋ جانە مەترولوگيا كوميتەتى اكىمشىلىك قۇقىق بۇزۋشىلىق تۋرالى كودەكسكە وزگەرىستەر ەنگىزۋدى جوسپارلاپ وتىرعانىن ەسكە سالا كەتەيىك. تۇزەتۋلەر شاعىن, ورتا جانە ءىرى بيزنەسكە قاتىستى بولادى. وسى جىلى تاۋارلاردى تاڭبالاۋ جانە قاداعالاۋ جونىندەگى بىرىڭعاي وپەراتوردىڭ وكىلدەرى استانا, الماتى جانە شىمكەنت قالالارىندا زەرگەرلىك بۇيىمداردى تاڭبالاۋ بويىنشا وقىتۋ سەمينارلارىن وتكىزەدى.
ەسكە سالا كەتەيىك, ەلىمىزدە مىندەتتى تسيفرلىق تاڭبالاۋ جانە قاداعالاۋ ءۇش ءونىم توبىنا قولدانىلادى: 2020 جىلدان باستاپ تەمەكى ونىمدەرىنە, 2021 جىلدىڭ قاراشاسىنان اياقكيىم ونىمدەرىنە جانە 2022 جىلدىڭ قاراشاسىنان باستاپ 90 دارىلىك زاتقا. ال 2024 جىلدىڭ 1 شىلدەسىنەن باستاپ دارىلىك زاتتاردىڭ 100 پايىزىنا قولدانىلادى.
