فوتو: time.kz
– ساۋالىمىزدى قوعامدا ءدۇمپۋ تۋدىرعان, ءالى دە تالقىلانىپ جاتقان 97 كگ سالماقتىڭ فينالدىق بەلدەسۋىنە قاتىستى قويساق. كوردىڭىز, قالاي بولدى؟ ەرەسەكتەر اراسىندا ەركىن كۇرەستەن تۇڭعىش الەم چەمپيونى ريزابەك ايتمۇحاننىڭ جاڭا سالماققا اۋىسقاننان كەيىنگى العاشقى دوداسى عوي. ازيا چەمپيوناتىنىڭ ءتورت دۇركىن جۇلدەگەرى (2 كۇمىس, 2 قولا) الىشەر ەرعالي مول تاجىريبەنىڭ ارقاسىندا اسىپ تۇسكەندەي كورىندى.
– ارينە, الىشەر ەرعالي 97 كگ سالماقتا ادبەن توسەلىپ ىسىلعان بالۋان. ريزابەك بىلتىر تۇڭعىش الەم چەمپيونى اتانعان سوڭ سىي-قۇرمەتكە كەنەلدى, كوپ قىدىردى. مۇنىڭ بارلىعى دا جاتتىعۋعا كەسىرىن تيگىزەدى.
فوتو: نۇرعالي جۇماعازى
– ءسوزىڭىزدىڭ جانى بار, فينالدىق بەلدەسۋدىڭ العاشقى كەزەڭىندە بەلسەندى بولىپ ءتىپتى ۇپاي باسىمدىعىمەن الدا تۇرعان ريزابەك سوڭعى مينۋتتا قوس ءبۇيىرىن سوعىپ سىلەلەپ قالدى.
– الىشەر – سىرالعى بالۋان, وقۋ-جاتتىعۋ جيىنىن داعىستاندا وتكىزىپ, ازىرلىك جۇرگىزدى. مىنە, توككەن تەردىڭ وتەۋىنە قازاقستان چەمپيوناتىنىڭ التىن مەدالى بۇيىردى.
– الدا بىشكەكتە وتەتىن ايماقتىق ىرىكتەۋ ءتۋرنيرى تۇر. كىمدەردىڭ باراتىنى ەل بىرىنشىلىگىندەگى كورسەتكىشكە ساي ايقىندالا ما؟
– ءيا, قازاقستان چەمپيوناتىندا جۇلدە العان بالۋاندار وليمپيادا ليتسەنزياسى ءۇشىن وتەتىن تۋرنيرگە قاتىسادى. قىرعىزستاندا وتەتىن ايماقتىق ىرىكتەۋگە چەمپيون اتانعان بالۋانداردىڭ بارۋى زاڭدىلىق. ودان كەيىن ىستانبۇلداعى الەمدىك ىرىكتەۋ دوداسىنا بىشكەكتە جولداما بۇيىرماعان سالماق دارەجەسىندەگى بالۋاندار قاتىسادى.
– بىشكەككە دە, ىستانبۇلعا دا تەك ىشكى بىرىنشىلىكتە چەمپيون اتانعان بالۋاندار بارۋى ءتيىس پە؟
– ونداي قاتىپ قالعان قاعيدا جوق. ۇشتىككە ەنگەن بالۋاننىڭ قاي-قايسى دا بابىنا ەنىپ دوداعا تۇسۋگە ساي بولسا, قاتىسادى. بىشكەكتە جولداما الا الماعان بالۋاندى ىستانبۇلعا دا سۇيرەي بەرگەن ورىندى ما؟ وزگە سپورتشىلاردىڭ دا الەۋەتىن باعامداۋ كەرەك.
– كەلەر كۇننىڭ ەنشىسىندەگى جوسپار قانداي؟
– باستى مەجە – پاريج وليمپياداسى. سوعان ءتورت كوزىمىز تۇگەل قاتىسىپ, ەلگە جۇلدەلى ورالساق دەگەن ءۇمىت باسىم. باحرەين ۇلتتىق قۇراماسى بىرلەسكەن جاتتىعۋ جيىنىن وتكىزسەك دەگەن ىقىلاس تانىتتى. قىرعىزستان بالۋاندارى دا بىزبەن بىرگە دايىندىق وتكەرۋگە قۇمبىل وتىر. بالۋاندار از كۇن تىنىققان سوڭ جاتتىعۋدى باستايمىز. رەسەيگە اتتانىپ, سول ەلدىڭ ساڭلاقتارىمەن بىرلەسكەن جاتتىعۋ وتكىزسەك دەيمىز.
– ەل چەمپيوناتىن تاماشالادىڭىز, قاي سالماقتاعى بالۋاندار ءتانتى ەتتى؟
– جاستاردىڭ قالىڭ شوعىرى ءوسىپ كەلە جاتقانىن اڭعاردىق. 18-19 جاستاعى بالۋاندار تاجىريبەلى قارسىلاستارىنان قايمىقپاي بەلدەستى. 57كگ سالماقتا چەمپيون اتانعان راحات قالجاننىڭ كۇرەسۋ ونەرى و باستان تارتىمدى ەدى. جىگەرلى, قايمىقپايدى, التىن مەدال الادى دەپ ىشتەي سەنىم ارتتىپ ەدىم, ءۇمىت اقتالدى. سول سەكىلدى 65 كگ سالماقتا جەڭىسكە جەتكەن ماڭعىستاۋلىق مايس اليەۆتىڭ دە الەۋەتى زور. بىراق بۇلاردى ءىرى دوداعا قازىر قوسساق, جاسىتىپ الۋىمىز مۇمكىن, جاستاردان ەرەسەكتەر اراسىنا ەندى ءوتىپ وتىر. 86 كيلودا چەمپيون اتانعان نۇرجان يساعاليەۆتىڭ دە جاتتىعۋدا جانىن سالىپ ەڭبەك ەتەتىنى ءتانتى ەتۋشى ەدى, وتەۋىنە مىنە التىن مەدال بۇيىرىپ وتىر.
– باستى مەجە پاريج جازعى وليمپياداسى دەدىڭىز عوي. «توعىز ۇلىم ءبىر توبە, ەر توستىگىم ءبىر توبە» دەگەندەي, قۇراما بالۋاندارىنىڭ اراسىندا كىمدەردەن ءۇمىت كۇتەسىز؟
– وليمپيادانىڭ مەدالىن ولجالايدى دەپ الەم بىرىنشىلىگىنىڭ ەكى دۇركىن جۇلدەگەرى, ازيانىڭ ەكى مارتە چەمپيونى ازامات داۋلەتبەكوۆكە (86 كگ) زور سەنىم ارتىپ وتىرمىز. قالعان بالۋاندار جولداما السا, ولاردىڭ اراسىنان جارقىراپ شىعاتىن تالانتتار بارىنا ءشۇبا كەلتىرمەيمىن. «ارىق ايتىپ, سەمىز شىققان» ءجون قاشاندا, سوندىقتان كۇنى بۇرىن تون پىشكەندەي بولمايىن. جەتىستىك تەك ەڭبەككە عانا بۇيىرادى, سوندىقتان بارىمىزدى سالۋىمىز كەرەك.
