فوتو: primeminister.kz
پرەمەر-مينيستر قىزمەتتەن كەتۋىنە قاتىستى تۇسىنىكتەمە بەردى. ول, ەڭ الدىمەن, وسى قىزمەتتى سەنىپ تاپسىرعان مەملەكەت باسشىسىنا العىس ايتتى.
«پرەزيدەنت قاسىم-جومارت كەمەل ۇلى توقاەۆقا سىندارلى ۋاقىتتا قازاقستان رەسپۋبليكاسىنىڭ ۇكىمەتىن باسقارۋعا سەنىم بىلدىرگەنى ءۇشىن زور العىسىمدى بىلدىرەمىن. وتكەن ەكى جىل قوعام ءۇشىن شەشۋشى كەزەڭ بولدى. مەملەكەت باسشىسى جاڭا ادىلەتتى قازاقستاندى قۇرۋعا باعىتتالعان اسا ماڭىزدى ساياسي جانە ەكونوميكالىق رەفورمالارعا باستاماشىلىق جاسادى», دەدى ءاليحان سمايىلوۆ.
سونداي-اق ءاليحان سمايىلوۆ ءوزى ۇكىمەتتىڭ تىزگىنىن ۇستاعان كەيىنگى ەكى جىلدا اتقارىلعان شارۋالاردى قورىتىندىلادى.
«ۇكىمەت وسى رەفورمالاردى ىسكە اسىرۋ جانە ەلىمىزدىڭ تۇراقتى الەۋمەتتىك-ەكونوميكالىق دامۋىن قامتاماسىز ەتۋ ءۇشىن قىزمەت ەتتى. ۇكىمەت پەن جەرگىلىكتى اتقارۋشى ورگانداردىڭ بىرلەسكەن جۇمىسىنىڭ ارقاسىندا بىرقاتار ناتيجەگە قول جەتكىزىلدى. وتكەن جىلدىڭ قورىتىندىسى بويىنشا ەكونوميكانىڭ ءوسۋى 5,1%-ءتى قۇرادى. بارلىق نەگىزگى سەكتورلار وڭ دامۋ ديناميكاسىن كورسەتتى. ينفلياتسيا ەكى ەسەگە تومەندەتىلدى. ەلىمىزگە تارتىلعان تىكەلەي شەتەلدىك ينۆەستيتسيالار كولەمى ەكى جىل قاتارىنان سوڭعى ونجىلدىقتاعى ەڭ جوعارى كورسەتكىشتەردىڭ ءبىرى بولدى. ونىڭ جىلدىق كولەمى 26-28 ملرد دوللاردى قۇرادى. ۇلتتىق قوردىڭ اكتيۆتەرى بىلتىر 4 ملرد دوللارعا ءوسىپ, 60 ملرد دوللاردان استى. رەيتينگتىك اگەنتتىكتەر ۇلتتىق ەكونوميكانىڭ تاۋەلسىز رەيتينگى مەن ينۆەستيتسيالىق سەنىمدىلىگىن راستادى», دەدى ول.
ءاليحان سمايىلوۆ بىرگە قىزمەت اتقارعان ارىپتەستەرىنە, دەپۋتاتتارعا, ەل دامۋىنا ۇلەس قوسىپ جۇرگەن بارلىق ازاماتقا العىس ايتتى.
