جاڭا وقۋ جىلىندا ەۇۋ بارلىق پەداگوگيكالىق باعىتتار بويىنشا باكالاۆريات دەڭگەيىنە ارنالعان Minor باعدارلاماسىن ەنگىزەدى. ستۋدەنتتەر ينكليۋزيۆتى ءبىلىم بەرۋدىڭ ءۇش قوسىمشا ءپانىن وقيدى: «ينكليۋزيۆتى سىنىپتا وقىتۋدىڭ امبەباپ ديزاينى», «ەرەكشە ءبىلىم بەرۋدى قاجەت ەتەتىن بالانىڭ وتباسىنا پسيحولوگيالىق-پەداگوگيكالىق قولداۋ كورسەتۋ» جانە «ەرەكشە ءبىلىم بەرۋدى قاجەت ەتەتىن تۇلعالاردى تيۋتورلىق قولداۋ». وسى باعىتتا ەۇۋ قىزمەتكەرلەرى ەرەكشە ءبىلىم بەرۋ قاجەتتىلىكتەرى بار ستۋدەنتتەرمەن جۇمىس جاساۋ باعىتىندا وقىتۋشىلارعا ارنالعان ادىستەمەلىك ۇسىنىمدار ازىرلەدى.
دارىندى جاستاردى عىلىمعا تارتۋ ماقساتىندا 2024-2025 وقۋ جىلىنان باستاپ باكالاۆريات باعدارلامالارىنا ەكى جاڭا مودۋل ەنگىزىلەدى. ولاردىڭ ءبىرى عىلىمي كومپونەنتتى قاراستىرادى جانە ستۋدەنتتەر وقۋدىڭ ءبىرىنشى جىلىنان زەرتتەۋ جۇمىستارىمەن اينالىسادى. ەكىنشى مودۋل جاساندى ينتەللەكتتى زەرتتەۋگە باعىتتالعان. ستۋدەنتتەر وسى باعىتتا بىلىمدەرىن كەڭەيتىپ, وزىق تسيفرلىق تەحنولوگيالاردى مەڭگەرەدى.
«جىل سايىن تەحنيكالىق, ينجەنەرلىك جانە پەداگوگيكالىق ماماندىقتاردى مەڭگەرۋگە نيەت بىلدىرگەندەر سانى ارتىپ كەلەدى. ءبىزدىڭ ۋنيۆەرسيتەت ەڭبەك نارىعىنىڭ قاجەتتىلىكتەرىنە جانە تەحنولوگيانىڭ دامۋىنا سايكەس ءبىلىم بەرۋ باعدارلامالارىن ۇنەمى جەتىلدىرەدى جانە جاڭالارىن ازىرلەيدى. ءبىز جۇمىس بەرۋشىلەرمەن, شەتەلدىك ۋنيۆەرسيتەتتەرمەن, ءىرى كومپانيالارمەن بىرلەسىپ ەڭبەك نارىعىنىڭ سۇرانىسى بويىنشا جاڭا يننوۆاتسيالىق ءبىلىم بەرۋ باعدارلامالارىن ازىرلەپ جاتىرمىز. قازىر بىزدە 40-قا جۋىق يننوۆاتسيالىق باعدارلاما بار. ولاردىڭ 18-ءى پەداگوگيكالىق, ينجەنەرلىك جانە تەحنيكالىق باعىتتاردى قامتيدى. ەۇۋ-دا وقىتۋ پروتسەسى 3 تىلدە جۇرگىزىلەدى جانە 45 ءبىلىم بەرۋ باعدارلاماسى اعىلشىن تىلىندە قاراستىرىلعان. سونداي-اق ۋنيۆەرسيتەتىمىز قىسقارتىلعان ءبىلىم بەرۋ باعدارلاماسى بويىنشا ءۇش جىل ماتەماتيكا ءپانى مۇعالىمدەرىن دايىنداسا, بيىل «عارىشتىق تەحنيكا جانە تەحنولوگيالار» ءبىلىم بەرۋ باعدارلاماسى بويىنشا دوكتورانتۋرا اشىلدى», دەدى ەۇۋ اكادەميالىق ماسەلەلەر دەپارتامەنتىنىڭ ديرەكتورى بايجۇمان قاشحىنباي.
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە پەداگوگيكالىق, ينجەنەرلىك, تەحنيكالىق باعىتتاعى جوعارى بىلىكتى كادرلاردى دايارلاۋعا كوپ كوڭىل بولىنەدى. بۇگىنگى تاڭدا ۋنيۆەرسيتەتتە وسى سالالاردا ءۇش دەڭگەي بويىنشا 12 مىڭنان استام ستۋدەنت ءبىلىم الادى. 244 ءبىلىم بەرۋ باعدارلامانىڭ 100-ءى پەداگوگيكالىق, ينجەنەرلىك-تەحنيكالىق باعىتتار بويىنشا قاراستىرىلعان.
