مادەنيەت جانە اقپارات مينيسترلىگىنىڭ باستاماسىمەن ۇيىمداستىرىلعان ءىس-شاراعا بۇۇ اقپاراتتىق ورتالىعى, بۇۇ جاھاندىق كوممۋنيكاتسيالار دەپارتامەنتىنىڭ وكىلدىگى قولداۋ بىلدىرگەن. اقپارات ايدىنىندا جول سىلتەيتىن مازمۇندى كۋرستاردىڭ سالا ماماندارىنىڭ, جۋرناليستيكا فاكۋلتەتى ستۋدەنتتەرى مەن ماگيسترانتتارىنىڭ ەكولوگيالىق ءبىلىمىن ارتتىرۋىنا تيگىزەر سەپتىگى مول. كۋرستاردىڭ بۇل تسيكلى 2020 جىلدان باستاپ سول كەزدەگى اقپارات جانە قوعامدىق دامۋ مينيسترلىگى مەن ۇلتتىق ۋنيۆەرسيتەت اراسىنداعى ءوزارا تۇسىنىستىك جانە ىنتىماقتاستىق تۋرالى مەموراندۋمدى ىسكە اسىرۋ شەڭبەرىندە وتكىزىلىپ كەلەدى. ءىس-شارا ۋنيۆەرسيتەتتىڭ 90 جىلدىعىنا ورايلاستىرىلعان.
«قازاقستانداعى ەكوجۇيەنى ساقتاۋ جانە قالپىنا كەلتىرۋ: ماسس-مەديا مەن الەۋمەتتىك جەلىلەردىڭ ىقپالى» تاقىرىبىنداعى ساباقتاردى جۋرناليستيكا فاكۋلتەتى مەن يۋنەسكو-نىڭ گەوگرافيا جانە تابيعاتتى پايدالانۋ فاكۋلتەتىنىڭ ءباسپاسوز جانە ەلەكتروندى باق كافەدراسى جۇرگىزدى. كۋرس شەڭبەرىندە «كليماتتىڭ وزگەرۋىمەن كۇرەسۋدەگى مەديا قۇرالدارى», «ەكولوگيالىق پروبلەمالاردى شەشۋدەگى الەۋمەتتىك جەلىلەردىڭ اسەرى», «تۇراقتى دامۋ ماقساتىنداعى ەكولوگيالىق سەرىكتەستىك» تاقىرىبىندا مودۋلدار قاراستىرىلىپ, رەسپۋبليكامىزداعى ەكولوگيالىق جانە كليماتتىق وزگەرىستەر تۋرالى كىتاپتار, ءباسپاسوز جانە فوتوسۋرەتتەر كورمەسى ۇسىنىلدى.
ءىس-شارانى اشقان ۋنيۆەرسيتەتتىڭ اكادەميالىق ماسەلەلەر جونىندەگى پرورەكتورى ءلاززات ەركىنباەۆا باق ارقىلى جالپى جۇرتشىلىق ءۇشىن ەكولوگيا, جاھاندىق كليماتتىڭ وزگەرۋى ماسەلەلەرىن جاريالاۋدىڭ ماڭىزدىلىعىن اتاپ ءوتتى. «ەلىمىز بىرنەشە حالىقارالىق كونۆەنتسيانى راتيفيكاتسيالادى. بۇل رەتتە اقپاراتقا, ونىڭ ىشىندە ەكولوگيالىق مالىمەتكە قول جەتكىزۋ ماڭىزدى. حالىقتىڭ ەكولوگيالىق پروبلەمالار تۋرالى شىنايى دەرەكتەرگە قولجەتىمدىلىگىن قامتاماسىز ەتۋدە جۋرناليستەردىڭ ۇلەسى زور», دەدى ول.
سونىمەن قاتار كليماتتىق ساياسات دەپارتامەنتى تومەن كومىرتەكتى دامۋ باسقارماسىنىڭ ساراپشىسى د.مەلدەقۇل, بۇۇ جاھاندىق كوممۋنيكاتسيالار دەپارتامەنتىنىڭ وكىلى, اقپارات بيۋروسىنىڭ باسشىسى ۆ.سامەك, جۋرناليستيكا جانە تابيعاتتى پايدالانۋ گەوگرافياسى فاكۋلتەتتەرىنىڭ دەكاندارى ت.كوپباەۆ پەن ا.اقتىمباەۆا, باسقا دا ۇيىمداردىڭ وكىلدەرى تىڭداۋشىلارعا ءوز لەبىزىن جەتكىزدى. سپيكەرلەردىڭ دارىستەرى مەن پراكتيكالىق تاپسىرمالارى الەۋمەتتىك جەلىلەردىڭ ەكولوگيالىق پروبلەمالاردى شەشۋگە, تۇراقتى دامۋ ماقساتىندا حالىقارالىق ارىپتەستىك ناتيجەلەرىن تالداۋعا ارنالدى. اۋعانستان, ەفيوپيا جانە بانگلادەش ۋنيۆەرسيتەتتەرىنىڭ وقۋشىلارى ءوز ەلىندەگى مەديا مەن ەكولوگيانىڭ ءوزارا ارەكەتتەسۋ تاجىريبەسىمەن ءبولىستى.
الماتى
