فوتو: senate.parlam.kz
ماۋلەن اشىمباەۆ وقۋشىلاردىڭ وقىرماندىق ساۋاتى تومەندەپ بارا جاتقانىن ايتتى. سوڭعى جىلدارى ەىدۇ PISA-نىڭ حالىقارالىق ءبىلىم بەرۋ ساپاسىن باعالاۋ رەيتينگى ەىدۇ ەلدەرىندەگى قاتارلاستارىنان ۇلگەرىم جاعىنان ايتارلىقتاي ارتتا قالعانىن كورسەتىپ وتىر. سەنات توراعاسى بۇل ماسەلە ءومىر ءسۇرۋ, كاسىبي بىلىكتىلىكتى قالىپتاستىرۋ باعىتىنداعى نەگىزگى قارىم-قابىلەتتى جويىپ جىبەرۋ قاۋپىن توندىرەتىنىنە الاڭدايتىنىن جەتكىزدى.
«2023 جىلدىڭ جەلتوقسانىندا ءبىز ەىدۇ PISA-2022 ءبىلىم ساپاسىن حالىقارالىق باعالاۋدىڭ جاڭا ناتيجەسىن الدىق. ءبىزدىڭ مەكتەپ وقۋشىلارىنىڭ ناتيجەلەرى بويىنشا ءوسۋ ديناميكاسىنىڭ بولماۋى كوڭىلگە كىربىڭ ۇيالاتادى. كەيبىر كورسەتكىشتەر بويىنشا جاعدايدىڭ ناشارلاپ بارا جاتقانىن بايقاۋعا بولادى. اتاپ ايتقاندا, وقىرماندىق ساۋاتتىڭ تومەندەۋى ەرەكشە الاڭداتىپ وتىر. ءبىزدىڭ وقۋشىلار وزگە ەلدەردەگى قاتارلاستارىنان 3 جىلعا قالىپ بارادى. جالپى, وقۋ ساۋاتىنىڭ تومەندەۋى جۇيەلى ماسەلەلەردى كورسەتەدى. ول بۇگىندە بالالاردىڭ الەۋمەتتىك جەلىلەرگە تىم اۋەس ەكەنىن بىلدىرەدى», دەدى سەنات سپيكەرى.
ماۋلەن اشىمباەۆ وقۋ ساۋاتىن ارتتىرۋ جونىندە ارنايى باعدارلاما قابىلداۋ قاجەتتىگىن اتاپ ءوتتى. زەرتتەۋ ناتيجەسى تەك ستاتيستيكا ەمەس, شەشىم قابىلداۋ قۇرالى جانە ماسەلەنى شەشۋ ءۇشىن ودان ءارى ءتيىمدى ارەكەت ەتۋ جونىندەگى نۇسقاۋلىق ەكەنىن دە تىلگە تيەك ەتتى.
«بىرىنشىدەن, وقۋ-اعارتۋ مينيسترلىگى اياسىندا وقۋ ساۋاتتىلىعىن ارتتىرۋ جونىندە ارنايى باعدارلاما قاجەت. ەكىنشىدەن, ناتيجە بەلگىلى بولعاننان كەيىن (شامامەن - PISA ناتيجەسى بويىنشا) ونى جىلى جاۋىپ قويۋعا بولمايدى. ودان قورىتىندى شىعارۋ كەرەك. سوعان سايكەس ءىس-قيمىل جوسپارىن جاساپ, قالىپتاسقان جاعدايدى وزگەرتۋ قاجەت. سوندىقتان سەناتتىڭ ءتيىستى كوميتەتىمەن بىرلەسە وتىرىپ, الداعى شارالار تالقىلانىپ, ىسكە اسىرىلادى دەپ كۇتەمىز. جالپى, مۇنداي حالىقارالىق زەرتتەۋلەردىڭ ناتيجەلەرىنە وتە بايىپتى قاراۋ كەرەك. كوشباسشى ەلدەردىڭ تاجىريبەسى بويىنشا وقىرماندىق ساۋاتتىلىقتى دامىتۋ جونىندەگى ۇلتتىق باعدارلاما ازىرلەسە دە ارتىق ەتپەيدى», دەدى سەنات توراعاسى.
