جيىندا قازاقستان پاريج كليماتتىق كەلىسىمىنىڭ قاتىسۋشىسى رەتىندە نەعۇرلىم ارتاراپتاندىرىلعان جانە «جاسىل» ەكونوميكا قالىپتاستىرۋعا ارنالعان قۇرىلىمدىق وزگەرىستەردى باستاعانى ايتىلدى.
«ەلىمىزدەگى بۋلانۋ گازدارى شىعارىندىسىنىڭ تورتتەن ءۇش بولىگىن قۇرايتىن ەنەرگەتيكالىق جۇيەنى تەرەڭ دەكاربونيزاتسيالاۋ قازاقستانداعى ترانسفورماتسيانىڭ نەگىزى بولىپ وتىر. ەنەرگەتيكالىق سەكتوردى دەكاربونيزاتسيالاۋ بىزگە ەكى ەسە پايدا اكەلۋى كەرەك: كومىرتەگى شىعارىندىسىن ازايتۋ مەن كليماتتىڭ وزگەرۋ سالدارىن جۇمسارتۋ جانە تازا وتىنعا كوشۋ ارقىلى اتموسفەرانى لاستايتىن زاتتاردىڭ شىعارىندىسىن ازايتۋ», دەدى ولگا پەرەپەچينا.
سەناتورلار ءىس-شارا بارىسىندا سۋتەگى ەنەرگەتيكاسىن دامىتۋعا ينۆەستورلاردى تارتۋعا جاعداي جاساۋدىڭ ماڭىزدىلىعىن اتاپ ءوتتى. دەپۋتاتتار جەرگىلىكتى اتقارۋشى ورگاندار بارلىق قاجەتتى ينفراقۇرىلىمدى ەسكەرە وتىرىپ, جاڭارتىلاتىن ەنەرگيا كوزدەرىنىڭ جوبالارىنا ارنالعان ىقتيمال جەر ۋچاسكەسىن الدىن الا بەلگىلەۋى ءتيىس دەپ سانايدى.
ەكولوگيا جانە تابيعي رەسۋرستار ءمينيسترىنىڭ ورىنباسارى مانسۇر وشۋرباەۆ «جاسىل» تەحنولوگيا سالاسىنداعى جۇمىس تۋرالى باياندادى. ول قازاقستاندا بىرقاتار زاڭنامالىق قۇجاتتى قابىلداۋ ارقىلى جاسىل ەكونوميكاعا كوشۋ ءۇشىن ۇيىمدىق-قۇقىقتىق نەگىزدەر جاسالعانىن حابارلادى.
كەزدەسۋدە سونداي-اق «ەكونوميكالىق زەرتتەۋلەر ينستيتۋتى» اق, «Qazaq Green» جاڭارتىلاتىن ەنەرگيا كوزدەرى قاۋىمداستىعىنىڭ, جاس عالىمدار اليانسىنىڭ جانە سەنات جانىنداعى جاس ساراپشىلار كلۋبىنىڭ وكىلدەرى بايانداما جاسادى.
