قازىر الماتى وبلىسىندا شارۋالاردىڭ 8 پايىزى عانا تامشىلاتىپ سۋارۋ ءادىسىن قولدانادى. ءوڭىر باسشىسى مارات سۇلتانعازيەۆ سۋدى ۇنەمدەۋ تەحنولوگياسىنا كوشۋ ماڭىزدى باعىتتاردىڭ ءبىرى ەكەنىن اتاپ ءوتىپ, جاۋاپتىلارعا ءتيىستى تاپسىرمالار بەرگەن ەدى.
اتالعان باعىتتا جۇمىستار باستالىپ كەتتى. ناقتىراق ايتقاندا, بيىل قىتايلىق كومپانيا وكىلدەرى قوناەۆ قالاسىندا «جىبەك جولى» جشس اتتى اۋقىمدى زاۋىت كەشەنىن ىسكە قوسپاق نيەتتە. وسىعان وراي الماتى وبلىسىنىڭ اكىمى مارات سۇلتانعازيەۆ زاۋىتتىڭ تىنىس-تىرشىلىگىمەن تانىستى.
كومپانيا وكىلدەرىنىڭ سوزىنشە, مۇندا تامشىلاتىپ سۋارۋعا ارنالعان قۇبىرلار مەن قۇرىلعىلار, قۇراما جەم مەن قۇرعاق ءسۇت زاۋىتى, شارۋاشىلىققا ارنالعان جابدىقتار شىعارىلادى. زاۋىت كۇنىنە 1 000 گەكتار اۋماقتى قامتيتىنداي ءونىم وندىرەدى. قاجەتتى شيكىزات كورشىلەس قىتاي ەلىنەن اكەلىنەدى. وندىرىلگەن ءونىم الدىمەن قازاقستانعا, كەيىننەن ەكسپورتقا شىعارىلادى. ايتا كەتەرلىگى, وسى ۋاقىتقا دەيىن ەلىمىزدە بالالارعا ارنالعان قۇرعاق ءسۇت شىعاراتىن بىردە-ءبىر زاۋىت اشىلماعان.
ينۆەستورلار بوس قالعان زاۋىت ورنىن بانكتەن ساتىپ الىپ, 10 ملن دوللار كولەمىندە قارجى قۇيعان. بىلتىردان باستاپ قاراۋسىز قالعان زاۋىتتى يگەرىپ, قاجەتتى جابدىقتارىن اكەلە باستاعان. ەندى تاۋاردى تاسىمالداۋ ءۇشىن تەمىرجول قاجەتتىلىگى تۋىنداپ وتىر.
ءوز كەزەگىندە وبلىس اكىمى مەملەكەتتىك قولداۋدىڭ بارلىق ءتۇرى كورسەتىلەتىنىن اتاپ ءوتتى. ونىڭ ىشىندە سۋبسيديا, «بيزنەستىڭ جول كارتاسى» باعدارلاماسى بويىنشا قاراستىرىلعان كومەك, تەمىرجول سالۋ سەكىلدى بىرقاتار شارا بار.
سونداي-اق ايماق باسشىسى تامشىلاتىپ سۋارۋ ادىسىنە كوشۋ بويىنشا شەڭگەلدى اۋىلى باسقا ەلدى مەكەندەرگە ۇلگى بولۋى كەرەك ەكەنىن ايتتى.
«شارۋالار بۇگىننەن باستاپ وسى زاۋىتتىڭ باسشىلىعىمەن كەلىسىمگە كەلىپ, كەلىسسوزدەر جۇرگىزە باستاۋى كەرەك. گەكتارىنا شاققانداعى قۇرىلعىلاردىڭ سوماسى ازىرشە بەلگىسىز. دەگەنمەن بۇل – ۇلكەن مۇمكىندىك. تاعى ءبىر ايتا كەتەرلىگى, اتالعان ءوندىرىس وشاعى بىزگە جاڭا تەحنولوگيانى اكەلىپ قانا قويماي, شەتەلدىك ستاندارتتارمەن وتاندىق ونىمدەردى تەڭەستىرۋدە», دەدى مارات ەلەۋسىز ۇلى.
ايتا كەتەيىك, قوناەۆ قالاسىندا 4 ءتۇرلى ينۆەستيتسيالىق جوبا جۇزەگە اسىپ كەلەدى. سونىڭ ءبىرى «وسپانوۆا دەۆەلوپمەنت» جشس-نا تيەسىلى بالىق زاۋىتىنىڭ جالپى قۋاتتىلىعى 10 مىڭ توننا بالىق وسىرۋگە قاۋقارلى.
الماتى وبلىسى
