كىتاپ دۇكەندەرىنە ءجيى باس سۇعاتىن وقىرمان بۇل باسپانى جاقسى بىلەدى. باسپا قازاق جازۋشىلارىنىڭ تاڭداۋلى شىعارمالارىن, الەم ادەبيەتىنىڭ وزىق تۋىندىلارىن قازاق تىلىندە ۇسىنا وتىرىپ, وقىرمانداردىڭ ۇزدىك شىعارمالاردى انا تىلىندە وقۋىنا ۇلەس قوسىپ كەلەدى. «فوليانت» باسپاسىنىڭ باس رەداكتورى فاريدا توباشالوۆا 2023 جىل ۇجىم ءۇشىن تابىستى بولعانىن ايتادى.
«باسپامىزدىڭ كىتاپ قورجىنى قازاق تىلىندەگى 150 كىتاپپەن تولىقتى. ونىڭ 60-قا جۋىعى – كوركەم ادەبيەت, 70-ءى – بالالارعا ارنالعان, 20-سى نون-فيكشن جانرىنداعى كىتاپتار. اتاپ وتسەك, اين رەندتىڭ 3 كىتاپتان تۇراتىن «اتلانت سىلكىندى» اتتى انتيۋتوپيالىق رومانىن اعىلشىن تىلىنەن اۋدارىپ شىعاردىق. سونىمەن قاتار ماريو پيۋزونىڭ «وكىل اكە», نەمىس عالىمى روبەرت كيندلەردىڭ «ستاليندىك كوشپەندىلەر», گرەگوري دەۆيد روبەرتستىڭ «شانتارام», مارگارەت ميتچەللدىڭ «جەل وتىندەگى تاعدىرلار», رەماركتىڭ «سالتانات قاقپاسى» سياقتى الەمگە تانىمال تۋىندىلار قازاق تىلىندە باسىلىپ شىقتى. بالالارعا بازارلىق رەتىندە بايانعالي ءالىمجانوۆتىڭ «400 ءتاتتى تاقپاعى» مەن كەڭەس ورازبەك ۇلىنىڭ «تۇران باھادۇرلەرى نەمەسە ەر, بي, ناردىڭ ەرلىك جورىقتارى» اتتى كىتاپتارى دا جاس وقىرمانعا ۇسىنىلدى», دەيدى باس رەداكتور.
مۇنداعى كوركەم ادەبيەتتىڭ ءوزى ء«سوز-مارجان», «الەمدىك كلاسسيكا», «ۇزدىك شەتەل ادەبيەتى», «ۇزدىك بەستسەللەر», «نوبەل سىيلىعىنىڭ يەگەرى», «التىن تامىر», «شىتىرمان وقيعالار», «الەمدىك دەتەكتيۆ شەبەرلەرى», «بۇگىنگى پروزا» اتتى 9 سەريامەن شىعادى.
«ال بيىلعى جوسپارعا كەلسەك, وسى جىلى 200-دەن اسا كىتاپ شىعارۋدى كوزدەپ وتىرمىز. اسىرەسە بالالار ادەبيەتىنە ۇلكەن ءمان بەرىپ وتىرمىز. سوندىقتان قازاق بالالار جازۋشىلارىنىڭ شىعارمالارىن كوپتەپ شىعارۋ ماقساتىندا «قازاق بالالار ادەبيەتى» اتتى جاڭا سەريانى قولعا الدىق. بۇل سەريامەن س.بەگالين, ب.سوقپاقباەۆ, س.مۇراتبەكوۆ, س.ءجۇنىسوۆ, ت.رىمجانوۆ سىندى جازۋشىلاردىڭ شىعارمالارىن جاڭا فورماتتا, ەرەكشە ديزاينمەن شىعارامىز. سونداي-اق جاڭا اۆتور ءامىر شىڭعىسحاننىڭ «زامان. كەنتاۆردىڭ باسىنان كەشكەندەرى» اتتى فانتاستيكالىق حيكاياتى جاقىندا وقىرمانعا ۇسىنىلادى», دەدى ف.توباشالوۆا.
سونداي-اق ول بىلتىر جاس جازۋشىلاردى قولداۋ ماقساتىندا «بۇگىنگى پروزا» اتتى جاڭا سەريا اشىلىپ, جادىرا شامۇراتوۆانىڭ «ساندىق», الىشەر راحاتتىڭ «ماحابباتىم – سonstant. پاراللەل» روماندارى شىققانىن اتاپ ءوتتى. بيىل دا وسى سەريا جالعاسىپ, ۇلاربەك دالەي, قاناعات ابىلقايىر, باقىتگۇل سارمەكوۆا, ميرا شۇيىنشاليەۆا, قويشىبەك مۇباراك, ەسبول نۇراحمەت, اياگۇل مانتاي, ەربولات ابىكەن, باسقا دا جازۋشىلاردىڭ كىتاپتارى جارىق كورمەك.
«قازاق ادەبيەتىنىڭ وزىق تۋىندىلارى مەن قازاق مادەنيەتى تۋرالى كىتاپتاردى باسىپ شىعارۋعا ارنالعان تاعى ءبىر جاڭا جوبانى قولعا الدىق. جوبا اياسىندا ۇلتىمىزدىڭ سالت-ءداستۇرى, ادەت-عۇرپى, تانىمى, ءتىلى مەن ءدىلى جايىندا اقپاراتتىق-تانىمدىق كىتاپتار مەن قازاقتىڭ ءتول ادەبيەتىنىڭ پروزا-پوەزيالىق تۋىندىلارى جارىق كورەدى. ءوز وقىرماندارىمىز بەن شەتەلدىكتەرگە دە قازاق حالقىن «ەتنوس» رەتىندە تانىتۋ ماقساتىندا كىتاپتاردى قازاق, ورىس, اعىلشىن تىلىندە باسىپ شىعارۋدى جوسپارلاپ وتىرمىز», دەيدى باس رەداكتور.
اتالعان جوبا اياسىندا شىعاتىن «قازاق قازىناسى» سەرياسىندا قازاقتىڭ ماتەريالدىق جانە رۋحاني مادەنيەتى تۋرالى كەڭىنەن باياندايتىن بولات بوپاي ۇلىنىڭ «قازاق كادەسى», «كيىز ءۇي – عالام مودەلى», «قازاق مىنەزى» جانە باسقا دا قۇندى كىتاپتار باسىلىپ شىعادى. بەلگىلى ەتنوگراف اقسەلەۋ سەيدىمبەكتىڭ بىرنەشە كىتابى, قازاق كلاسسيك جازۋشىلارىنىڭ شىعارمالارىن اعىلشىن تىلىندە شىعارۋ بويىنشا جۇمىستار جۇرگىزىلىپ جاتىر.
سونىمەن قاتار بەلگىلى قالامگەرلەردىڭ مەرەيتويى دا ەلەۋسىز قالمايدى. بيىل جۇسىپبەك ايماۋىت ۇلىنىڭ تۋعانىنا 135 جىل, ءسابيت دونەنتاي ۇلىنا 130 جىل تولادى. وسىعان وراي باسپادان ج.ايماۋىت ۇلىنىڭ «قارتقوجا», س.دونەنتاي ۇلىنىڭ «كوركەمتاي» شىعارمالارىن باسىلىپ شىقپاق.
ايتا كەتەيىك, «فوليانت» باسپاسى جىلدا ەلوردا تورىندە «Eurasian Book Fair» ەۋرازيالىق حالىقارالىق كىتاپ كورمە-جارمەڭكەسىن ۇيىمداستىرادى. كورمە الىس-جاقىن شەتەلدەردەن – تۇركيا, قىتاي, رەسەي, باسقا دا ەلدەر مەن وتاندىق باسپالاردى جانە كىتاپ دۇكەندەرىن ءبىر الاڭعا بىرىكتىرۋدى, ەلدەگى باسپا ءىسى يندۋسترياسىن دامىتۋدى كوزدەيدى. اتالعان كورمە بيىل 17-21 ءساۋىر ارالىعىندا 6-رەت وتكەلى وتىر.
