تاراز قالاسىنان 100 شاقىرىم قاشىقتا جاتقان تالاس اۋدانىندا وتكەن جىلى 52 كوشەنىڭ جولى جوندەۋدەن ءوتتى. ارينە, از جۇمىس ەمەس. وسىلايشا, تۇرعىندار كوتەرگەن وزەكتى ماسەلە وڭىنان شەشىلىپ وتىر. اۋدان اكىمدىگىنىڭ ءباسپاسوز قىزمەتى كەلتىرگەن دەرەككە جۇگىنسەك, اۋدانعا قاراستى ەلدى مەكەندەردەگى جولداردى جوندەۋ جۇمىستارى «اۋىل – ەل بەسىگى» باعدارلاماسى اياسىندا جۇزەگە اسقان.
«اۋىلدىقتار «اۋىل – ەل بەسىگى» باعدارلاماسىنىڭ شاراپاتىن كورىپ وتىر. ماسەلەن, وتكەن جىلى ءۇشارال جانە ويىق اۋىلدىق وكرۋگتەرىندە بارلىعى 15,65 شاقىرىمدى قۇرايتىن 21 كوشەنى جوندەۋگە 670 ملن تەڭگە قاراجات بولىنگەن ەدى. قازىنادان قاراستىرىلعان قاراجاتتىڭ 90 پايىزى رەسپۋبليكالىق, قالعان 10 پايىزى اۋداندىق بيۋدجەتتىڭ ۇلەسىندە ەكەنىن ايتا كەتكەن ءجون. كوشەلەردىڭ جولىن جوندەۋ ماسەلەسىنە كەلگەندە جەرگىلىكتى تۇرعىنداردىڭ تالاپ-تىلەگى تولىقتاي ەسكەرىلدى. جول جوندەۋ جۇمىستارى ۋاقتىلى ءارى تياناقتى اتقارىلعانىن ايتا كەتكەن ءلازىم. جەرگىلىكتى اتقارۋشى بيلىك وكىلدەرى قولعا الىنعان جۇمىستىڭ ساپاسىنا ايرىقشا دەن قويدى. مەملەكەتتىك ساتىپ الۋ اشىق كونكۋرسى دەر كەزىندە وتكىزىلىپ, جەڭىمپاز مەردىگەرلەرمەن كەلىسىمشارتتار ۋاقتىلى راسىمدەلىپ, ورتا جوندەۋ جۇمىستارى مەجەلى ۋاقىتتا جۇرگىزىلدى. بۇگىنگى تاڭدا جوسپارلانعان جۇمىس تولىعىمەن اياقتالدى», دەيدى تالاس اۋدانىنىڭ اكىمى نۇربول جۇنىسبەكوۆ.
اۋدان باسشىسى كەلتىرگەن دەرەككە سەنسەك, «اۋىل – ەل بەسىگى» باعدارلاماسى اياسىندا بولىنگەن قاراجات ۇنەمدەلىپتى. سول ۇنەمدەلگەن قارجى ەسەبىنەن بوستاندىق, اقكول جانە ويىق اۋىلدارىنداعى جالپى ۇزىندىعى 3,65 شاقىرىمدى قۇرايتىن 12 كوشەنىڭ جولدارى ورتا دەڭگەيدەگى جوندەۋدەن وتكەن.
تالاس اۋدانىنىڭ ورتالىعى قاراتاۋ قالاسىندا دا جول جوندەۋ جۇمىستارى تالاپقا ساي اتقارىلعان. مونوقالاداعى جالپى ۇزىندىعى 16,8 شاقىرىمدى قۇرايتىن التى كوشەنىڭ جولى تۇرعىندار تىلەگىنە ساي رەتكە كەلتىرىلگەن.
ن.جۇنىسبەكوۆتىڭ ايتۋىنشا, كەڭەس اۋىلدىق وكرۋگىنە قاراستى بولتىرىك شەشەن اۋىلىنداعى نۇرالى كوشەسىنە ورتا جوندەۋ جۇمىستارى جۇرگىزىلىپ, قالپىنا كەلتىرىلگەن. بۇعان قوسا مايتوبە اۋىلىنداعى ب.مومىش ۇلى, ەسەيحان اۋىلىنداعى ا.ومار ۇلى, قاراوي اۋىلىنداعى بايجان, قاسقابۇلاق اۋىلىنداعى تامدى اۋليە جانە بەيبىتشىلىك, تامدى اۋىلىنداعى بىرنەشە كوشە مەن كوكتال اۋىلىنداعى ەسەيحان كوشەلەرىنىڭ جول توسەمى جوندەۋدەن وتكەن. جالپى العاندا اۋدان بويىنشا 52 كوشەنىڭ جولى رەتكە كەلتىرىلگەن ەكەن.
جامبىل وبلىسى,
تالاس اۋدانى
